KUPUTUKA 38
38
Yuta naTamale
1Kaha casolokele hamakumbi aze Yuta afumine kuli vandumbwenyi, axikumukile, axikilile kuli mutu umwe wakuAtulame, lijina lyenyi ikiye Hila.
2Yuta amwene pwevo mwanakaKanane kuze, lijina lyenyi ikiye Xuwa. Amumbacile, engilile muli ikiye.
3Kahemicile lijimo, asemene mwana walunga. Yuta amulukile lijina lyenyi ngwenyi, Ele.
4Emicile ceka lijimo, asemene mwana walunga, amulukile lijina lyenyi ngwenyi, Onane.
5Ceka nawa asemene mwana walunga, amulukile lijina lyenyi ngwenyi, Xela. Kaha Yuta apwile kuKezeve haze pwevo amusemene.
6Yuta amumbacilile mwanenyi watwatwa Ele pwevo, lijina lyenyi ikiye Tamale.
7Kaha Ele, mwanaYuta watwatwa, apwile wamupi kumeso aYehova, kaha Yehova amujihile.
8Yuta ambile kuli Onane ngwenyi, #Luxi. 25.5, 6; Mateu 22.24.Ingila muli pwevo lyayayove, umulingile milimo yandumbwalunga lyenyi, umusemene yayove vana.
9Onane atacikijile ngwenyi, Vana kavexi kupwa vamiko. Xikaho casolokele, omu engilile muli pwevo lyayayenyi, avamwangilile hamavu, kucina mwamusemena yayenyi vana.
10Oloze cize alingile capihile kumeso aYehova, xikaho amujihile naikiye nawa.
11Kaha Yuta ambile kuli nayewenu Tamale ngwenyi, Ijiva kutwamanga muujike kuzuvo yaiso palanga nomu nakulu lyehi mwanami Xela. Mwomwo alyambile ngwenyi, Kucina ikiye nawa mwakafwa nge mwavayayenyi. Kaha Tamale ayile nakutwama kuzuvo yaise.
12Omu mwahicile makumbi amavulu, pwevo lyaYuta, uze mwanaXuwa, afwile. Vamuvendejekele Yuta, kaha ayile kuli vaka-kutewula mikoko jenyi kuCimina, naikiye nasepa lyenyi Hila wakuAtulame.
13Vamulwezele Tamale ngwavo, Tala, isowenu mwaya kuCimina akatewule mikoko jenyi.
14Kaha alizulile mahinenyi autuliwe, aliwuvile naciwuva kumeso enyi, avwalile mahineka, ayile nakutwama kucikolo caEnaime cili mujila yakuya kuCimina. Mwomwo amwene ngwenyi, Xela nakulu lyehi, kaha kavanguhangixile kuli ikiyeko.
15Yuta hakumumona amujinyine ngwenyi, Pwevo muka-ujila, mwomwo aliwuvile naciwuva kumeso enyi, xikaho.
16Apeukilile kuli ikiye mujila, amwambile ngwenyi, Acitave mwane ngwingile muli ove. Mwomwo katacikijileko ngwenyi, ikiye nayewenu. Uze pwevo amwambile ngwenyi, Naungwonda ika numba wingile muli ami?
17Amwambile ngwenyi, Nangukakutumina mwanapembe wakutanga. Uze pwevo amwambile ngwenyi, Naunguhana cijikilo, tahi? palanga nomu naukamutuma.
18Yuta amwihwile ngwenyi, Ngukuhane cijikilo cika? Amwambile ngwenyi, Nguhane kazekeso kove, navinunga vyove, namukombo uli mulivoko lyove. Amuhanyinevyo, kahengilile muli ikiye. Uze pwevo emicile lijimo naikiye.
19Uze pwevo akatukile, ayile, afumixile ciwuva kumeso enyi, avwalile ceka mahinenyi autuliwe.
20Yuta atumine mwanapembe kulivoko lyasepa lyenyi wakuAtulame, mangana akatambule cijikilo kulivoko lyapwevo, oloze kamuwanyineko.
21Kaha ehwile kuli malunga vakutwama kuze ngwenyi, Uze pwevo muka-ujila atwamanga kuEnaime kutenga yajila ali kulihi? Vamwambile ngwavo, Kuno kakwapwile pwevo muka-ujilako.
22Akindulukile kuli Yuta, amwambile ngwenyi, Kangwamuwanyineko. Kaha nawa, malunga vakutwama kuze vangwambanga ngwavo, Kuno kakwapwile pwevo mukaujilako.
23Yuta amwambile ngwenyi, Akamutambule, kucina natutwama nasonyi. Tala, ngwatumanga uno mwanapembe, kahove kawamuwanyineko.
24Kaha casolokele, omu mwahicile tukweji vatatu, vamulwezele Yuta ngwavo, Nokowenu Tamale nalingi ujila. Kaha nawa, nemita lijimo kuujila wenyi. Yuta ambile ngwenyi, Vamulovole #Levi 21.9.vamulumbe.
25Omu Vamulowele atumine kuli isewenu, amwambile ngwenyi, Lunga ukweci vyumevi ikiye nanguhane lijimo. Amwambile nawa ngwenyi, Aci tale vyumevi, kazekeso, navinunga, namukombo, vinapu vyeya?
26Yuta avitavilile, ambile ngwenyi, Ikiye wakwoloka kunguhambakanami, mwomwo kangwamuhanyine kuli mwanami Xelako. Kaha kalimwene ceka nenyiko.
27Jino casolokele halikumbi lyakusapuluka, kumana, mujimo lyenyi mwapwile vapasa.
28Kaha casolokele hakusapuluka, mwana umwe alowele livoko lyenyi. Cifungiji akwacile kulivoko lyenyi, akaxilileko wanda ucila, ambile ngwenyi, Ou nalivange kusemuka.
29Kaha casolokele, omu ahilwixile ceka livoko, ndumbwenyi asemukile. Cifungiji ambile ngwenyi, Unalicicimikila ika? Xikaho vamulukile lijina lyenyi ngwavo, #38.29:Nge ngwavo, Kulicicimika.Peleze.
30Kaha jino, munyima yenyi mwasemukile songo yenyi, uze wawanda ucila kulivoko lyenyi, kaha vamulukile lijina lyenyi ngwavo, Zela.
Currently Selected:
KUPUTUKA 38: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.