KUPUTUKA 32
32
Yakova mwalizanga akaliwane naEsau
1Yakova ayile mujila yenyi, kaha vangelo jaKalunga va muwanyine.
2Omu avamwene Yakova ambile ngwenyi, Eli lizavu lyaKalunga. Kaha alukile kuze ngwenyi, #32.2:Nge ngwenyi, Kumazavu avali.KuMahanaime.
3Yakova atumine valuwa kulutwe lwenyi kuli yayenyi Esau kuSeile, kulifuci lyavaEtome.
4Avalwezele ngwenyi, Mukamwambulila mwata wami Esau ngwenu, ngamba yove Yakova ngwenyi, Ngunazuzumananga kuli Lavane, ngunakaximbula kuze palanga nakulikumbi lyalelo.
5Ngunahete vangombe navimbulu namautanga avimuna vavandende navandungo vamalunga navava vamapwevo. Kaha ngunatumu nakukulwezove mwata wami, mangana nguwane likoji kumeso ove.
6Valuwa vakindulukile kuli Yakova, vamwambile ngwavo, Twahetanga kuli yayove Esau, kaha ivene ali nakwiza nakukusesa, namalunga makulukaji awana nawa vali nenyi hamwe.
7Kaha Yakova evwile woma mateli nakulyonyinga. Ahandunwine vatu vaze apwile navo, namautanga avimuna vavandende nawawa avangombe navangamela, nakulinga mazavu avali.
8Alyambile ngwenyi, Kaci nge Esau mwawana lizavu limwe nakuliveta, kaha lizavu linasaleho nalihasa kucina.
9Kaha Yakova ambile ngwenyi, Ove Kalunga katata Apalahama, Kalunga katata Isaka, Ove Yehova, Ove yove wangwambile ngwove, Kinduluka kulifuci lyove kuli vausoko wove, kaha nangukuwahisa,
10kuvilinga vyove vyalikoji vyosena nakumucano wove wosenou unangulweze ami ngamba yove kangwatela cipwe cacindende kahako. Mwomwo ngwazaukile uno Yotau namukombo wami kaha, oloze jino ngunapu mazavu avali.
11Aci ngupululule mwane mumavoko ayayami, mumavoko aEsau, mwomwo ngunamwivu woma, kucina mweza nakungujiha, navanevo navana vavo nawa.
12KahOve wangwambile ngwove, Nangukakuwahisa cakukuwahisa, nakuvulisa vaka-tanga yove nge musekulula wakukalungalwiji, uze vahona kulava hakuvula cawo.
13Ufuku uze asavalile kuze. Kaha kuvyuma vize apwile navyo asakwileko wana auhane kuli yayenyi Esau,
14vapembe vavihwevo makulukaji avali, navapembe vavizamba makumi avali, namikoko vavihwevo makulukaji avali, namikoko vavizamba makumi avali,
15navangamela vakukamuna mavele makumi atatu navana vavo, navangombe vavihwevo makumi awana, navangombe vavikuji likumi, navimbulu vavihwevo makumi avali navana vavo likumi.
16Avahanyine mumavoko avangamba jenyi, utanga nahawo utanga nahawo. Ambile kuli vangamba jenyi ngwenyi, Zaukenu kulutwe lwami, museze tando hakaci kautanga nautanga.
17Alwezele ou wakulivanga ngwenyi, Omu mwakuwana yayami Esau nakukwihula ngwenyi, Ove uweya? ngwenyi, Uli nakuya kulihi? ngwenyi, Ava vali kulutwe lwove vanapu veya?
18ukamwambulila ngwove, Vanapu vangamba yove Yakova, ukiko wana natumu kuli mwata wami Esau. Kaha tala, ivene nawa ali munyima.
19Alwezele ngoco nayou wamucivali nawa nayou wamucitatu, navosena vatambukile munyima yamautanga ngwenyi, Mukiko vene mumukamwambulila Esau omu namukamuwana.
20Kaha mukamwambulila nawa ngwenu, Kaha nawa, tala, ngamba yove Yakova ali munyima. Mwomwo alyambile ngwenyi, Nangutulisa utenu wenyi nawanou uli nakuya kulutwe lwami, kaha hakukuminyina numba ngumone meso enyi. Kwiji, pamo mwangwitavila.
21Ngoco wana uze wazaukile kulutwe lwenyi, kaha ivene asavalile ufuku uze navakwavo hamwe.
Yakova mwalipika nalunga kuPenyele
22Akatukile ufuku uze, ayile namapwevo jenyi vavali, navandungo jenyi vamapwevo vavali, navana venyi likumi naumwe, kaha azaukile kucau caYavoke.
23Ayile navo nakuvazawisa kalwiji, nakuzawisa nawa vyuma vize ahetele.
24Yakova asalile uka wenyi, kaha kwasolokele lunga alipikile nenyi palanga namukuku lyakuca.
25Omu amwene ngwenyi, Ngunamuhono, amukwacile mulukuma lwenyi. Kahomu alipikile nenyi lihinji lyaYakova lyatungumukile mulukuma.
26Uze lunga amwambile ngwenyi, Ngwece, mwomwo hinakuca. Yakova amwambile ngwenyi, Kangwexi kukwecako, xina kuvanga unangukisula.
27Uze lunga amwihwile ngwenyi, Lijina lyove yoveya? Ambile ngwenyi, Yami Yakova.
28Uze lunga ambile ngwenyi, Kavexi kukakuvuluka ceka lijina lyove yove Yakovako, Oloze ngwavo, Yove #32.28:Nge ngwenyi, Ou mwalipika naKalunga.Isalele, mwomwo unalipiki naKalunga navatu nakuvahasa, xikaho.
29Yakova amwihwile ngwenyi, Aci ngulwezeko lijina lyove mwane. Amwambile ngwenyi, Unangwihwila lijina lyami ika? Kaha amukiswile kuze.
30Yakova alukile kuze lijina #32.30:Nge ngwenyi, Kumeso aKalunga.lyaPenyele. Mwomwo ngwenyi, Ngunamono Kalunga meso nameso, kaha nalame mwono wami.
31Omu azaukile Penwele, likumbi lyamututukilile, kaha ikiye himwambilikita hatungi yenyi.
32Xikaho nakulikumbi lyalelo nawa vana vaIsalele kavexi kulya wama wamulukumako, mwomwo akwacile mulukuma lwaYakova muwama wamulukuma.
Currently Selected:
KUPUTUKA 32: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.