KUPUTUKA 28
28
1Isaka asanyikile Yakova, amukiswile, amulwezele ngwenyi, Kanda ukambata pwevo wakuli vana vamapwevo vamuKananeko.
2Katuka, uyenga kuPatane-alame, kuzuvo yaMbetwele ise yanoko, ukambate pwevo kuze, wakuli vana vaLavane ndumbwanoko.
3Kalunga Ukweci ngolo josena akakuwahise, akakuhane lusemo, akakuvulise, mangana ukapwe uliwuka lyavatu veka naveka.
4Akakuhane nawa kukisula cize capwile caApalahama, nayove navaka-tanga yove nawa, mangana ukahete lifuci lino unazuzumananga, eli ahanyine Kalunga kuli Apalahama.
5Isaka asuwile Yakova, kaha ikiye ayile kuPatane-alame kuli Lavane mwanaMbetwele kaSulya ndumbwa-Laveka naye yaYakova naEsau.
6Jino Esau amwene omu akiswile Isaka Yakova nakumusuwula aye kuPatane-alame, mangana akambate pwevo kuze, nomu amulwezele hakumukisula ngwenyi, Kanda ukambata pwevo wakuli vana vamapwevo vamuKananeko,
7nomu ononokele Yakova kuli ise nanaye nakuya kuPatane-alame.
8Kaha Esau amwene omu vapihililile vana vamapwevo vakuKanane kumeso aise Isaka.
9Ngoco Esau ayile kuli Iximele, ambacile Mahalate MwanaIximele mwanaApalahama ndumbwaNevayote kupwa pwevo lyenyi wakulunjika hali mapwevo vaze apwile navo.
Kalunga mwalisolola kuli Yakova
10Kaha Yakova afumine kuMbelexeva nakuya mujila yaHalane.
11Axikilile kumwe nakusavala kuze ufuku wosena, mwomwo haze likumbi lyalingile hilinalauka lyehi. Kumalolwaze apwileko akwacile lilolwa limwe nakusacilaho mutwe wenyi, nakusavala tulo kuze.
12Alotele, kaha kumana, ndondelo yakwimika hamavu, songo yayo yinahete mwilu, #Yowa. 1.51.navangelo jaKalunga vapwile nakunyina nakusulukaho.
13Kaha tala, Yehova emanyine helu lyayo, amwambile ngwenyi, Ami yami Yehova Kalunga kaiso Apalahama, Kalunga kaIsaka. Lifuci eli uli nakusavala nangukakuhanalyo navaka-tanga yove.
14Vaka-tanga yove navakavula nge lukungu lwahamavu. Ove naukazevumuka nakumuyakumbi nakumwizakumbi nakunote nakusulo. Kaha muli ove namutanga yove vaka-jitanga jahamavu josena navakamona kutokwa.
15Kaha tala, Ami nguli nayove hamwe, nangukulamanga kwexokwo naukaya, nangukakuneha ceka kulifuci lino. Mwomwo kangwexi kukakusezako, palanga nomu ngunalingi eci ngunakuvulukila.
16Yakova atonene kutulo twenyi, alyambile ngwenyi, Camwenemwene Yehova ali kuno, kahami kangwacitacikijileko.
17Evwile woma, alyambile ngwenyi, Kumona kuno, owoma! Kuno kakwexi kwekako, kuzuvo yaKalunga kaha, kuno kucikolo camwilu.
18Yakova amenekele cimenemene, ambacile lilolwa lize asacilile mutwe wenyi, alimikile kupwa lilolwa lyakwimika, kaha ahingunwinyineho maji.
19Alukile kuze ngwenyi, #28.19:Nge ngwenyi, Kuzuvo yaKalunga.kuMbetele. Oloze hakulivanga lijina lyalimbo lize lyapwile Luze.
20Yakova alixingile ngwenyi, Kaci nge Kalunga mwapwa nayami hamwe nakungulamanga mujila yino nguli nakuya, nakunguhana kulya ngulyenga nakuvwala nguvwale,
21mangana ngukeze ceka kuzuvo yatata nakeke, kaci nge Yehova mwapwa Kalunga kami,
22kaha lilolwa lino ngunemika nalikapwa zuvo yaKalunga, kaha kuvyuma vyosenovyo naukanguhana, Camwenemwene nangukakuhanako vyakusokesa mumakumi.
Currently Selected:
KUPUTUKA 28: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.