KUPUTUKA 25
25
Vaka-tanga yaApalahama vakuli Ketula
(Miji. 1, 1.32-33)
1Jino Apalahama ambacile pwevo weka, lijina lyenyi apwile ikiye Ketula.
2Ikiye asemene nenyi Jimilane naYokoxane naMetane naMicane naIxivake naXuwa.
3Yokoxane asemene Xeva naNdetane. Vana vaNdetane ava, ava vaAxule, ava vaLetuxe, ava vaLeume.
4Vana vaMicane ava, ou Efwa, ou Efwele, ou Hanoke, ou Avita, ou Eleta. Ava vosena vapwile vana vaKetula.
5Apalahama amuhanyine Isaka vyuma vyenyi vyosena.
6Oloze vana vamapwevo vakwingilila vaze apwile navo Apalahama, Apalahama avahanyine mawana. Kaha ximbu apwile acili wamutonyi, avasuwile vafume kuli mwanenyi Isaka, vaye kumusamuko kulifuci lize lili kumusamuko.
Apalahama mwafwa, navamufunda
7Awa akiko makumbi amyaka yakuyoya caApalahama, yize ayoyele, myaka likulukaji namakumi atanu naavali namyaka yitanu.
8Kaha mwono waApalahama wamufumine, afwile haukule wamwaza namyaka yenyi yayivulu, vamutwalile kuli vakaka jenyi.
9Kaha vana venyi Isaka naIximele vamufunjile muwina wakusendeleka wakuMakapela, mumavu aEfwelone mwanaZohale kaHete, aze ali kwakamwihi naMamele,
10mavu aze alanjile Apalahama kuli vana vaHete. Mwamuze vafunjile Apalahama mwomumwe napwevo lyenyi Sala.
11Kaha casolokele, omu alingile Apalahama hanafu lyehi, Kalunga awahixile mwanenyi Isaka, kaha Isaka atwaminenga kuMbele-lahai-loi.
Vaka-tanga yaIximele
(Miji. 1, 1.28-31)
12Eci cikiko kusemunwina caIximele mwanaApalahama, uze asemene Apalahama naHangale kaEjipitu ndungo yaSala.
13Awa akiko majina avana vaIximele, hamajinavo, mwaya kusemumwina cavo. MwanaIximele watwatwa ikiye Nevayote, naKetale, naAtavele, naMivisame,
14naMixima, naNduma, naMasa,
15naHatate, naTema, naYetule, naNafwixe, naKetema.
16Ava vakivo vana vaIximele, awa akiko majinavo, nge kumembo avo, nakuvilombo vyavo, vamyata likumi navavali nge mwaya miyaci yavo.
17Eyi yikiko myaka ayoyele Iximele, myaka likulukaji namakumi atatu namyaka yitanu nayivali, kaha mwono wenyi wamufumine, afwile, kaha vamutwalile kuli vakaka jenyi.
18Vana venyi vatungile kufumisa kuHavila palanga nakuXule kwakamwihi naEjipitu, omu nauya nakutalikisa kuAsulya. Atwaminenga kwakulitalasana navandumbwenyi vosena.
Kusemuka caEsau naYakova
19Eci cikiko kusemunwina caIsaka mwanaApalahama. Apalahama asemene Isaka.
20Kaha Isaka apwile namyaka makumi awana omu ambacile pwevo lyenyi Laveka mwanaMbetwele kaSulya wakuPatane-alame, ndumbwaLavane kaSulya.
21Kaha Isaka amulembelelele Yehova hali pwevo lyenyi, mwomwo ikiye apwile mumba, xikaho. Yehova amwitavilile hakumulembelela, kaha pwevo lyenyi Laveka emicile lijimo.
22Vana valipikile mujimo lyenyi. Ikiye alyambile ngwenyi, Kaci nge ngana, ikaze ngunapu ngana? Kaha ayile nakwihula kuli Yehova.
23Yehova amwambile ngwenyi, Mujimo lyove muli miyaci yivali,
Mujimo lyove namukasemuka atu vajitanga jivali.
Vatu vamwe navakapwa nangolo kuhambakana vakwavo,
Kaha #Loma 9.12.mukulwane mwakononoka kuli songo yenyi.
24Jino omu atelemo makumbi enyi numba asapuluke, kumana, mujimo lyenyi mwapwile vapasa.
25Uze watete asemukile, apwile ucila, kumujimba wenyi kwosena kwapwile nge cikovelo camangona, kaha vamulukile lijina lyenyi ngwavo, Esau.
26Munyima yenyi mwasemukile songo yenyi, kaha livoko lyenyi lyakwacile kukakukunya kaEsau. Ngoco vamulukile lijina lyenyi ngwavo, #25.26:Nge ngwavo, Ou wakukwata kukakukunya, mokomoko ngwavo, Ou mwonga mukwavo.Yakova. Isaka apwile namyaka makumi atanu nalimwe omu avasemene pwevo lyenyi.
Esau mwalanjisa utwatwa wenyi
27Vaze vana vamalunga vazovolokele. Esau apwile cinyanga wakuzangama, mutu wamucipapa. Yakova apwile mutu wakuunda, wakutwama mujimbalaka.
28Jino Isaka azangile Esau, mwomwo alilenga nyama yenyi azombele, xikaho. Oloze Laveka azangile Yakova.
29Yakova atelekele vyakulya, kaha Esau ejile hakufuma mucipapa, nafu lyehi cizava.
30Esau ambile kuli Yakova ngwenyi, Aci nguhane ovyo vicila ngulye, mwomwo ngunafu cizava. Xikaho vamulukile lijina lyenyi ngwavo, #25.30:Nge ngwavo, Ucila.Etome.
31Yakova amwambile ngwenyi, Ngulanjise lelo utwatwa wove.
32Esau amwambile ngwenyi, Kumana, ngunasake kufwa, nyi ngulamine utwatwou ika?
33Yakova ambile ngwenyi, Lixinge lelo kuli ami. Alixingile kuli ikiye, kaha #Hepe. 12.16.amulanjixile Yakova utwatwa wenyi.
34Yakova amuhanyine Esau mbolo namakunde akuteleka, kaha alile, anwine, akatukile nakuliyila kwenyi. Ngoco Esau alumbilixile utwatwa wenyi.
Currently Selected:
KUPUTUKA 25: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.