KULOVOKA 36
36
1Ngoco vaMbezalele naOholyave vazatenga milimo, namalunga vosena vakweci mangana mumicima, vaze nahake Yehova mangana nakunangakana, mangana vatacikize mwakuzacila milimo yahakuzacila zuvo yajila, mwosenomu natulweze Yehova.
Mose mwavakanyisa vatu kuneha mawana akwavo
2Mose asanyikile Mbezalele naOholyave namalunga vosena vakweci mangana mumicima, vaze ahakile Yehova mangana mumicima yavo, mutu himutu uze wakatwile mucima wenyi kwiza kumilimo ayizate.
3Wana wosena uze Vanehele vana vaIsalele hamilimo yahakuzacila zuvo yajila nakuyitunga vautambwile kuli Mose. Kaha valingile civamunehela lika mawana akulyanukila hacimene hacimene.
4Vaka-mangana vosena vaze vazacile milimo yazuvo yajila yosena, malunga vosena vejile kufuma kumilimo yize vazacile,
5vahanjikile kuli Mose ngwavo, Vatu vali nakuneha vyuma vyavivulu vyakulisala vyahakuzata milimo eyi nalweze Yehova kulinga.
6Mose ahanyine luximbi, kaha valuhicixile muluvila kucilombo kwosena ngwavo, Cipwe lunga cipwe pwevo kanda azata ceka milimo yawana wazuvo yajilako. Ngoco vamanyixile vatu kuneha ceka vyuma.
7Mwomwo vyuma vize vapwile navyo vyaswile lyehi kumilimo yosena vayilinge, vyalisalile nawa.
Navatunga tavanaku
(Kulo. 26.1-37)
8Muli vaze vazacile milimo, malunga vosena vakweci mangana mumicima vatungile #36.8:Tala 25.9.tavanaku nalikumi lyamahina, awanda wamwaza wakuhosa utoma nawou uxikima nawou waungonyi nawou ucila, navakeluve, tungiso yaveno. Mbezalele awatungile.
9Kusuhwa calihina limwe capwile jikuvite makumi avali najikuvite jitanu najitatu, kutohwa calihina limwe capwile jikuvite jiwana. Mahinosena apwile akweseka mumwe.
10Mahina atanu awanungile limwe kulikwavo, namahina akwavo atanu awanungile limwe kulikwavo.
11Atongelele makulu awanda uxikima kukulo yalihina limwe kumutwe walyo kuunungililo. Ngoco nawa mwalingile kukulo yalihina likwavo lyapwile kusongo kuunungililo wamucivali.
12Atongelele makulu makumi atanu kulihina limwe, namakulu makumi atanu kulihina likwavo lyapwile kuunungililo wamucivali, aze makulu apwile akulitalasana.
13Afulile jifwenete jaulu makumi atanu, kaha anungasanyine mahina limwe kulikwavo najifwenete, ngoco tavanaku hiyapwile yimwe.
14Atungile mahina amangona avapembe nawa kupwa mbalaka helu lyatavanaku. Awatungile mahina likumi nalimwe.
15Kusuhwa calihina limwe capwile jikuvite makumi atatu, kutohwa calihina limwe capwile jikuvite jiwana. Mahinaze likumi nalimwe apwile akweseka mumwe.
16Anungile mahina atanu nahawo, namahina atanu nalimwe nahawo.
17Atongelele makulu makumi atanu kukulo yalihina limwe lyapwile kusongo kuunungililo, namakulu makumi atanu kukulo yalihina lyapwile kusongo kuunungililo wamucivali.
18Afulile jifwenete jaunengu makumi atanu jakunungasanyisa mbalaka mangana yipwenga yimwe.
19Alingile nawa cifwiko cambalaka camalambu avizamba jamikoko akulomba acila, nacifwiko camalambu avambau helu.
20Asongele maliva atavanaku, amikexa, akwimana.
21Kusuhwa caliliva limwe capwile jikuvite likumi, kutohwa caliliva limwe capwile kuvite yimwe nacimbwa cakuvite.
22Liliva hililiva lyapwile navana vakulinunga vavali. Ngoco mwalingile kumaliva atavanaku osena.
23Asongele maliva atavanaku, maliva makumi avali kuluhaci lwakutala kusulo.
24Afulile manevo vapalata makumi awana muxi yamalivaze makumi avali, manevo vavali muxi yaliliva limwe, vakusokekela vana valyo vavali, manevo vavali muxi yaliliva likwavo, vakusokekela vana valyo vavali.
25Kaha kuluhaci lwatavanaku lwamucivali, elu lwakutala kunote, asongeleleko maliva makumi avali,
26namanevo vapalata makumi awana, manevo vavali muxi yaliliva limwe, manevo vavali muxi yaliliva likwavo.
27Kumutamba wakunyima yatavanaku kutala kumuyakumbi, asongeleleko maliva atanu nalimwe.
28Asongelele maliva avali mujimbango jatavanaku kunyima,
29apwile akulunjika avali kuxi, ngoco apwile akuya mumwe nakwilu lyawo namucinunga cimwe, ngoco mwalingile kumaliva amujimbango jivali osenavali.
30Kwapwile maliva atanu naatatu, namanevo vapalata, manevo likumi navatanu naumwe, manevo vavali muxi yaliliva hililiva.
31Asongele mikambo yamikexa, yitanu yakumaliva akuluhaci lwatavanaku lumwe,
32namikambo yitanu yakumaliva akuluhaci lwatavanaku lukwavo, namikambo yitanu yakumaliva atavanaku akumutamba wakunyima kutala kumuyakumbi.
33Mukambo wahakaci aulingixile kuhitamo mukaci kamaliva kusongo nakusongo.
34Alamikile ulu hamaliva, afulile makulu awo aulu akutwama mikambo yawo, kaha alamikile ulu hamikambo.
35Atungile lihina lyakuvatasana lyawanda uxikima, nawou waungonyi, nawou ucila, nawou wamwaza wakuhosa utoma, alitungile navakeluve, tungiso yaveno.
36Alisongelele jipanda jamikexa jiwana, ajilamikile ulu. Malovo ajo apwile aulu, kaha ajizuzulwilile manevo vapalata vawana.
37Atungile civamba cakucikolo cambalaka, cawanda uxikima nawou waungonyi nawou ucila nawou wamwaza wakuhosa utoma, tongeso yavaka-kutonga nawino,
38najipanda jaco jitanu namalovo ajo. Alamikile ulu nakumitwe yajo nakumyalaci yajo. Oloze manevo vapwile vaunengu.
Currently Selected:
KULOVOKA 36: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
