KULOVOKA 27

Lijiko lyakulumbila mawana akulumba

(Kulo. 38.1-7)

1Lijiko lyakulumbila ukalisonga lyamukexa. Kusuhwa calyo cikapwe jikuvite jitanu, kutohwa calyo cikapwe jikuvite jitanu. Lijiko lyakulumbila likapwe namavinji awana. Kuzandama calyo cikapwe jikuvite jitatu.

2Ukalisongela jimbinga jalyo hamavinji alyo awana. Jimbinga jalyo jikapwe jakununga mumwe nalikiko. Kaha ukalilamika unengu.

3Ukafula jindeho jalyo jakufumixila wuto walyo, najifwoxolo jalyo, Hajimbaxiya jalyo, namalovo alyo akukwacisa nyama, namapanda alyo akukwacila kakahya, vyuma vyalyo vyosena Ukavifula vyaunengu.

4Ukalitungila jisambo jakuselula jaunengu, kaha ukafulila makulu aunengu kumavinji ajisambo awana.

5Ukajihaka muxi yamukusa walijiko lyakulumbila, kumavu, mangana jisambo jakuselula jitwamenga hakaci kalijiko lyakulumbila.

6Ukasonga mivanda yalijiko lyakulumbila, mivanda yamikexa, kaha Ukayilamika unengu.

7Mivanda yalyo vakayingise mumakulu, kaha mivanda yikapwe kujihaci jalijiko lyakulumbila jivali hakulikulika.

8Ukalisonga lyamaliva, mwamupolongwa. Nge omu vanakulwezelyo hapili, ngoco munavakalisonga.

Cipango catavanaku

(Kulo. 38.9-20)

9Ukatunga cipango #27.9: Tala 25.9.catavanaku. Kuluhaci lwakutala kusulo kukapwe mahina acipango akusukika awanda wamwaza wakuhosa utoma, kusuhwa likulukaji lyajikuvite kuluhaci lumwe.

10Jipanda jaco jikapwe makumi avali, namanevo makumi avali, vaunengu. Kaha malovo akujipanda namyalaci yajo vikapwe vyapalata.

11Ngoco nakuluhaci lwanote nawa kukapwe mahina akusukika kusuhwa likulukaji lyajikuvite, najipanda jaco makumi avali namanevo makumi avali, vaunengu. Malovo ajipanda namyalaci yajo vikapwe vyapalata.

12Kaha kukutohwa cacipango kumutamba wakumuyakumbi kukapwe mahina akusukika, kusuhwa jikuvite makumi atanu, najipanda jawo likumi namanevo likumi.

13Kaha kutohwa cacipango kumutamba wamusamuko cikapwe jikuvite makumi atanu.

14Mahina akusukika akuluhaci lwacikolo lumwe akapwe kusuhwa jikuvite likumi najitanu, najipanda jawo jitatu namanevo vatatu.

15Kaha kuluhaci lukwavo kukapwe mahina akusukika kusuhwa jikuvite likumi najitanu, najipanda jawo jitatu namanevo vatatu.

16Kucikolo cacipango kukapwe civamba kusuhwa jikuvite makumi avali, cawanda uxikima nawou waungonyi nawou ucila nawanda wamwaza wakuhosa utoma, tongeso yavaka-kutonga nawino, najipanda jawo jiwana namanevo vawana.

17Jipanda jacipango josena jingulwixi ndo jikapwe jakunungasana namyalaci yapalata, namalovo ajo apalata, namanevo vaunengu.

18Kusuhwa cacipango cikapwe likulukaji lyajikuvite, kutohwa caco cikapwe makumi atanu kwosena. Kaha kuzandama caco cikapwe jikuvite jitanu, mahina awanda wamwaza wakuhosa utoma, namanevo vaunengu.

19Vyuma vyatavanaku vyosena kumilimo yayo yosena vikapwe vyaunengu, najimbambo jayo josena, najimbambo jacipango josena.

Omu navalamanga linongo

(Levi 24.1-4)

20Kahove ukalweza vana vaIsalele ngwove, Ngunehelenu maji alive akutwa atoma akulinongo, akumunyikisa linongo makumbi osena.

21VaAlone navana venyi vamalunga vakalilongese vakalilame kufumisa kucingoloxi nakutwala hakuca kumeso aYehova, #27.21:Tala 25.22.mumbalaka yakuliwanyina kusali yalihina lyakuvatasana lili kulutwe lwaunjiho. Cikapwenga cilika haya myaka yosena mukusemunwina cavo cosena hali vana vaIsalele.

Currently Selected:

KULOVOKA 27: LUE70

Highlight

Copy