KULOVOKA 19
19
VaIsalele navatwama kupili Xinai
1Hakakweji wamucitatu kufumisomu valovokele vana vaIsalele mulifuci lyaEjipitu, halikumbi lize vene Vahetele mupambo yaXinai.
2Kahomu valingile hivanakatuka lyehi kuLefwicime, vanahete lyehi mupambo yaXinai, vatungile cilombo mupambo, kaha vaIsalele vatungile cilombo kuze kulutwe lwapili.
3Mose akandukile kuli Kalunga, kaha Yehova atambakanyine kuli ikiye nalizu lyakufuma hapili ngwenyi, Vambulile vatu vakuzuvo yaYakova ngana, uvalweze vana vaIsalele ngwove,
4Enu mwamona lyehi muze ngwavalingile vaEjipitu, nomu ngunamiveleka kumavava avangonga nakumihetesa kuno kuli Ami.
5Xikaho jino, kaci nge namwono-nokanga vene mulizu lyami nakulamanga luxiko lwami, kaha namupwanga muluheto lwami lwakusakula muli vatu vosena, mwomwo mavu osena anapu ayami.
6Kaha namupwanga muwangana wavapilixitu kuli Ami, mumuyaci wajila. Awa akiko mazu nauhanjika kuli vana vaIsalele.
7Mose ejile, asanyikile vakulwane javatu, avalwezele mazu osenawa vamulwezele kuli Yehova.
8Vatu vosena vamukumbulwile hohamwe ngwavo, Mazu osena nahanjika Yehova natuwalinganga. Kaha Mose ambulwile mazu avatu kuli Yehova.
9Yehova ambile kuli Mose ngwenyi, Tala, nangwiza kuli ove mulivwi lilava, mangana vatu vevweko omu nanguhanjika nove, vetavenga kuli ove haya myaka yosena. Kaha Mose ambulwile mazu avatu kuli Yehova.
10Yehova ambile kuli Mose ngwenyi, Yako kuli vatu uvajilike nalelo nahamene, vakose mahinavo.
11Kaha pwenu mwalizanga lyehi halikumbi lyamucitatu, mwomwo halikumbi lyamucitatu Yehova mwafuma mwilu nakwiza hapili Xinai kumeso avatu vosena.
12Uvafunjikila vatu ngiza jingulwixi ndo, ngwove, Lilamenunga kucina namukanduka hapili, cipwe kukwata kungiza yayo. Wose mwakwata hapili navamujiha cakumujiha.
13Kavexi kumunangika livokoko, oloze navamwasa malolwa cakumwasa malolwa, mokomoko navamwasa mivwi cakumwasa mivwi, cipwe kanyama cipwe mutu, kexi kuyoyako. Omu navemba luneta nakutwalaho, veze kupili.
14Mose axikumukile kupili, ejile kuli vatu, ajilikile vatu, kaha vakosele mahinavo.
15Ambile kuli vatu ngwenyi, Pwenu mwalizanga lyehi halikumbi lyamucitatu, kanda mupandama kuli mapwevoko.
16 #
Hepe. 12.18, 19. Kaha casolokele, halikumbi lyamucitatu nacimene kwapwile mikalateta namiveso nalivwi lilava hapili, nakuvuma caluneta cakutezuka cikuma, ngoco vatu vosena vaze vapwile kucilombo vacikimine woma.
17Mose alowele vatu kucilombo valiwane naKalunga, kaha Vemanyine kumavu yapili.
18 #
Samu 104.32; 144.5. Pili Xinai yosena yapwile nakufwinda wixi, mwomwo Yehova asulukileho #Hepe. 12.18.mukakahya, kaha wixi wako wafwinjile nge wixi wakulilungu, kaha #Samu 68.7, 8.pili yosena yandendele cikuma.
19Omu capwile kuvuma caluneta nakuya nakutezuka cikuma, Mose ahanjikile kaha Kalunga amukumbulwile nalizu.
20Yehova afumine mwilu ejile hapili Xinai, helu lyapili. Yehova asanyikile Mose eze kwilu lyapili, kaha Mose akandukileko.
21Yehova ambile kuli Mose ngwenyi, Xikumuka, ulweze vatu nangolo kucina navalicicimika kuli Yehova nakumutala, kucina vakwavo vavavulu navanonga.
22Navapilixitu nawa, vaze veji kupandamanga kuli Yehova valijilike, kucina Yehova mwavalovokela.
23Mose ambile kuli Yehova ngwenyi, Vatu kavexi kuhasa kukanduka hapili Xinaiko. Mwomwo watulwezanga nangolo ngwove, Funjikenu ngiza kupili jingulwixi ndo, muyijilike.
24Yehova amwambile ngwenyi, Yako, xikumuka. Kaha ukanduka ceka, nayove naAlone nawa hamwe. Oloze vapilixitu navatu veka kanda valicicimika nakukanduka kuli Yehovako, kucina nanguvalovokela.
25Ngoco Mose axikumukile kuli vatu avalwezele.
Currently Selected:
KULOVOKA 19: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.