Marako 15

Kotero Yesu i nyim Pilato

(Matayo 27.1-2, 11-14; Luka 23.1-5; Yokana 18.28-38)

1Odiko sek di piny oru, jodongo me josaseredoti oko ariamakin kede joadongo me piny, jopwony me Iswil karacel kede kansulo lung, kiko poro kop i kom Yesu. Gin kiko tweno Yesu di kiko tere ot mine i cing Pilato. 2Pilato oko penye be, “In en ibedo abaka me Iyudayan?” Yesu oko dwoko ne be, “In en iwaco kamanono.”

3Jodongo me josaseredoti oko pide pi kope atot. 4Pilato bobo oko penye be, “Likame tie kop kame iromo dwoko? Winy ber twon kope kame kitie pidi iye.”

5Do Yesu likame oko medo dwoko kop moro, omio Pilato oko uro.

Kongolo ne Yesu Kop me To

(Matayo 27.15-26; Luka 23.13-25; Yokana 18.39—19.16)

6Bin i kare dedede me Ebaga me Kalamo, Pilato oudo maro gonyo mabus acel kame jo penye be egonyi. 7I kare nono, oudo tie icuo moro kame nyinge Baraba, kame oudo tie i otkol karacel kede jojemo kame oudo otimo nek i kare kame logologo oudo tie kede. 8Ekodet me jo oko cokere, kiko cako penyo Pilato pi timo ne gi bala kite kame lem enare timo kede. 9En eko penyo gi be, “Imitunu be agony ne wu Abaka me Iyudayan?” 10En oudo engeo be jodongo me josaseredoti oudo omio Yesu i cinge pi nyeko gi.

11Do jodongo me josaseredoti oko supo ekodet pi waco ne Pilato pi gonyo ne gi Baraba akaka Yesu. 12Pilato bobo oko penyo ekodet be, “Di do ako timo nyo ne icuo kame wun ilwongunu be abaka me Iyudayan?”

13Gin kiko dwoko di kilelemo be, “Gure i kom musalaba.”

14Pilato doko oko penyo gi be, “Pinyo, nyo arac kame en etimo?” Do gin kiko medo lelemo kitek be, “Gure i kom musalaba.”

15Do pi kite kame Pilato oudo mito yomo kede cuny jo, omio en eko gonyo ne gi Baraba, di eko mino kodao Yesu, di eko mine i cing isirikalen pi ot gure i kom musalaba.

Isirikalen Otimo ne Yesu Tim me Anywar

(Matayo 27.27-31; Yokana 19.2-3)

16Isirikalen oko tero Yesu i ot me ngapug adwong, kiko lwongo isirikalen icegun dedede. 17Kiko ngapo ne Yesu ekanso akwakwar di kiko cweno okuto aluka kiko rwako ne i wie. 18Kiko cako mote be, “Yoga abaka me Iyudayan.” 19Gin kiko jwato wie kede ebela, di kingungulo lau i kome, di ki riondiko piny i nyime di kiluro ne wi gi di kicuko mine wor. 20Kakame kitieko timo ne kede tim me anywar go, kiko gonyo egoe akwakwar nono, di kiko ngapo ne igoen mege di do kiko tere ot gure i kom musalaba.

Koguro Yesu i kom Musalaba

(Matayo 27.32-44; Luka 23.26-43; Yokana 19.17-27)

21 # Joroma 16.13 Kiko dino icuo moro me Sirene kame nyinge Simoni pi yeno musalaba ka Yesu. En oudo eyai ki paco etie ot i bomba. Simoni oudo obedo papa me Alekesanda kede Rupus. 22Kiko tero Yesu kabedo kame kolwongo be Gologota, kame dwong mere be, “Kabedo me cogowic.” 23Kiko mine bwini kame konyalo kede yat kame nyinge maya, do en gire likame eko mato. 24#Sabuli 22.18Gin kiko gure i kom musalaba di kiko popoko igoen mege di kiuco alulu pi neno gikame ngat acelacel poore tero. 25Kiko gure i kom musalaba esawa adek me odiko. 26Iwandik kame oudo koketo malo i wie kame nyuto kop kame kopide iye oudo somere be, “Abaka me Iyudayan.” 27Doko kiko guro joyak are da kede Yesu; acel i bade tetu cam kede acel i bade tetu ngodal. 28#Isaya 53.12(Di iwandik kacil kame waco be, “Komare koribe i kom jotur iswil,” oko cobere kakare.)

29 # Sabuli 22.7; 109.25; Marako 14.58; Yokana 2.19 Jo kame oudo beo kuno oudo yayango wi gi di kiwaco ne kop me anywar be, “Ee! In oudo iyaro turo tempulo di bobo iko gere pi ceng adek, 30nan do ber lakere keni di iko wok piny ki musalaba!”

31Iepone acel nono da jodongo me josaseredoti karacel kede jopwony me Iswil oudo yamo kop me anywar i kom Yesu be, “En elako jo apat do doko likame etwero lakere kene. 32Ber kong Kirisito abaka me Isirael wok piny ki musalaba nan, tetekeny wan oneni di oko yei en.”

Jo kame bin koguro kede Yesu da oko donyo yeyeto en.

To ka Yesu

(Matayo 27.45-56; Luka 23.44-49; Yokana 19.28-30)

33Piny lung oko doko col cako esawa kanyape me iceng tuno esawa kanyangon. 34#Sabuli 22.1Iesawa kanyangon, Yesu oko kok kede dwan amalo be, “Eli, Eli, lama sabaktani?” kame dwong mere be, “Rubanga na, Rubanga na, pinyo komio ijala?”

35Jo kame oudo tie cungo kuno owinyo kop mere kiko waco be, “Winyunu, etie lwongo Elia!” 36#Sabuli 69.21Dano acel kikom gi oko ringo di eko rwako ecango i bwini awac, eko rwako i wi tir di eko keto i dog Yesu be ejwijwio. En etimo kaman di ewaco be, “Odarunu ber, omito neno ka Elia oyaro bino kwanye tenge ki kom musalaba.”

37Yesu oko kok kede dwan amalo eko omo cunye di eko to.

38 # Yai 26.31-33 Di egoe kame bin poko isenge me tempulo oko yec cako ki malo tuno piny. 39Kakame ngadwong me isirikalen me Roma, kame oudo tie cungo kuno i nyim musalaba oneno kede kite kame Yesu oto kede, en eko waco be, “Ateteni icuo ni oudo obedo Wot ka Rubanga!”

40 # Luka 8.2-3 Oudo mon mogo da tie kuno kame tie nene ki tenge. Kikom gi oudo tie iye Maria Magadalina, Maria toto me Yakobo atidi kede Jose, kede Salume. 41Gin oudo kibedo mon kame bin lubo Yesu di pwodi oudo etie Galilaya di kikonye, karacel kede mon ace atot kame oudo oupere kede en tuno Yerusalem.

Koyiko Yesu

(Matayo 27.57-61; Luka 23.50-56; Yokana 19.38-42)

42-43Di piny oyuto, Yosepu me Arimatea oko tuno. En oudo ebedo dano me kansulo kame koworo, kame oudo tie kuro bino me Ajakanut ka Rubanga. Kite kame ceng nono oudo obedo kede ceng me iikere, ceng kame Sabato lubo, en eko bedo kede nwangcuny di eko ot but Pilato pi penyo kom Yesu. 44Pilato oko uro ka ateteni Yesu oudo otieko to. En eko lwongo ngadwong me isirikalen di eko penye ka Yesu oudo otieko to. 45Kakame etieko udo kede niang kibut ngadwong me isirikalen be Yesu oudo otieko to, en eko mino Yosepu akarunikin me kwanyo kome. 46Yosepu oko do wilo esuka acil, di eko tako kom Yesu ki musalaba, eko bone kede esuka nono di en eko piele i ates kame oudo koroko i lela. En eko loro kidi di eko umo kede dog ates. 47Maria Magadalina kede Maria toto me Jose oko neno kakame koketo iye kom Yesu.

Currently Selected:

Marako 15: BILKDC13

Highlight

Copy