Matayo 8

Yesu Ocango Adobo

(Marako 1.40-45; Luka 5.12-16)

1Kakame Yesu owok kede piny ki wi moru, ekodet ati me jo oko lube. 2Kikano icuo moro kame tie kede tuwo me dobo oko bino bute di oko riondiko piny i nyime di ewaco be, “Rwot, ka cunyi mito, ikaruno canga.”

3Yesu oko rieno cinge di oko mule di ewaco be, “Amito, cangi!” Cucuto nono dobo mere oko cango. 4#Jolebi 14.1-32Yesu oko waco ne be, “Nen be likame iwaco ne ngatamoro gi kotimere, do ot inyutere but ngasaseredoti di iko mino giayala kame bin Musa ociko, pi nyuto ne jo be in itieko cango.”

Yesu Ocango Ngatic me Ngadwong me Isirikalen me Roma

(Luka 7.1-10)

5Kakame Yesu odonyo kede Kaperanaum, ngadwong me isirikalen me Roma bin oko bino bute oko donyo bako ne doge 6di ewaco be, “Rwot, ngatic na tie i apien, etie kede aramo alit, doko tuwo oneko kome lung.”

7Yesu oko waco ne be, “Ango ayaro bino di ako cange.”

8Do ngadwong me isirikalen nono oko dwoko ne Yesu be, “Rwot, ango likame apoore me in bino i oda, do in kenekene wac kop nono, di ngatic nango ko bino cango. 9Pien ada atie i akarunikin me jo kame loa, doko ada atie kede isirikalen kame tie i akarunikin na; ka aciko acel kikom gi be, ‘Oti,’ en eko ot; doko ka awaco ne ace da be, ‘Bia,’ en ebino; kede ka awaco ne epasoit na be, ‘Tim gini,’ di en eko timo.”

10Kakame Yesu owinyo kede kop mere, en eko uro di eko waco ne jo kame bin lube be, “Ango pwodi likame audo epone me yei ni, akadi i piny me Isirael da. 11#Luka 13.29Awaco ne wu be, jo atot oyaro bino ki tetu kide kede ki tetu potoceng di gin kiko bino camo ebaga kede Aburaam, Isaka kede Yakobo i Ajakanut me malo. 12#Matayo 22.13; 25.30; Luka 13.28Do jo kame poore bedo i Ajakanut kobino uco gi ooko i kabedo me colo, kakame kibino koko kede mwodo lak gi kiye.” 13Yesu oko waco ne ngadwong me isirikalen nono be, “Ot do, wek etimere ni di lubere kede yei ni.”

Ngatic me ngadwong me isirikalen nono oko cango esawa nono.

Yesu Ocango Jo Atot

(Marako 1.29-34; Luka 4.38-41)

14Kakame Yesu odonyo kede i ot ka Petero, en eko neno toto me dako ka Petero di tie buto, pien musuja oudo omake. 15Yesu oko mako cinge, di musuja oko weke, en eko yai malo eko cako tedo gi.

16Otieno nono jo oko kelo ne Yesu jo atot kame jwogi omako, en eko riamo tipere areco kede twer me kop mere, doko di en eko cango jo dedede kame oudo tuwo. 17#Isaya 53.4Etimo man pi mino cobere kakare gikame bin enabi Isaya owaco be, “En ekwanyo goro me kom wa di eko yeno tuwo wa.”

Jo mogo kame oudo mito Lubo Yesu

(Luka 9.57-62)

18Aso, kakame Yesu oneno kede ekodet me jo di oluke, en eko waco ne josiao mege be, “Ongolunu loka tetuca.” 19Ngapwony moro me Iswil oko bino bute di oko waco ne be, “Apwony ango ayaro lubi kabedo dedede kame in ibino ot iye.”

20Yesu oko waco ne be, “Ekwee tie kede bur me buto, kede winy da tie kede ude gi, do Wot ka dano likame tie kede kakame epielo iye wie.”

21Ngasiao mere ocelu da oko waco ne be, “Rwot wek ber aoti ayik Papa na.”

22Do Yesu oko waco ne be, “In luba, wek jo oto en kame yik joe gi oto.”

Yesu Okweo Yamo Atek i Nam

(Marako 4.35-41; Luka 8.22-25)

23Kakame Yesu odonyo kede i yi yee, josiao mege da oko lube iye. 24Kikano yamo atek oko ngoole i yi nam, omio ebuka oko donyo lepulepun i yi yee, do Yesu oudo onino. 25Gin kiko ot cene di kiwaco ne be, “Rwot lak wa, otienu do to.”

26En eko waco ne gi be, “Pinyo komio itienu kede lworo, okwecunu wun jo kame yei wu nonok?” En eko yai di eko coko yamo kede nam, di kiko kwei cuu.

27Josiao oko uro di kiwaco be, “Epone me dano kacal nadi tin ine, kame akadi yamo kede nam da winyo dwane?”

Yesu Ocango Cuo Are kame tie kede Jwogi

(Marako 5.1-20; Luka 8.26-39)

28Di do Yesu bin ongolo loka nam i piny me Gerasene, en eko riamo kede cuo are kame owok ki wi atesin. Gin oudo kitie kede jwogi, doko oudo kiger twatwal, omio jo oudo lworo lubo yongayo nono. 29Kikano gin kiko lelemo kitek be, “Okwe Wot ka Rubanga, nyo kame itie mito timo ne wan? Mam in ibino kan pi mino wa alola di kare kopoore pwodi likame otuno?”

30Esawa nono, oudo tie esipan me ipegei kame tie cam i kakabobor kede gi. 31Jwogi nogo oko ngangao Yesu be, “Ka iriamo wa tenge kikom jogi, cwai wa ooti i kom esipan me ipegei ka.”

32En eko waco ne gi be, “Otunu.” Gin kiko wokun kiko ot donyo i kom ipegei. Esipan me ipegei lung oko dipere ringo piny lor ki wi emukura, kiko donyo i nam, gin dedede kiko mwony kiko to i pii.

33Jo kame oudo tie kwano ipegei nogo oko ringo, kiko ot i bomba, di do kiko tatamo ne jo gi dedede kame otimere, kiton gi kotimere ne jo kame oudo tie kede jwogi. 34Di jo dedede me bomba oko wok pi riamo kede Yesu. Esawa kame kinene kede, kiko donyo ngangao en be eyai tenge ki adul gi.

Currently Selected:

Matayo 8: BILKDC13

Highlight

Copy