Matayo 4

Atama ka Yesu

(Marako 1.12-13; Luka 4.1-13)

1 # Iburanian 2.18; 4.15 Di do Tipo Kacil oko telo Yesu ot i tim pi Sitani tame. 2Ingei Yesu kanyo kec pi ceng ot ongwon kede iwor da ot ongwon, kec oko neke. 3Di ngatam jo oko bino di oko waco ne be, “Ka in Wot ka Rubanga, wac ne kide gi lokere dok mugati.”

4 # Iswilia 8.3 Do Yesu oko dwoko ne be, “Iwandik kacil waco be, ‘Dano likame kuo kede cam kenekene, do kede kop acelacel kame wok ki dog Rubanga.’ ”

5Di Sitani oko tero Yesu i Bomba Kacil, di eko kete i amidu me tempulo, 6#Sabuli 91.11-12di en eko waco ne be, “Ka in Wot ka Rubanga, som piny ki kan, pien iwandik kacil waco be,

“‘Rubanga bino ciko imalaikan mege piri, di gin kiko gwoki;

gin kibino gagao in i cing gi,

tetekeny kur itwom tieni i wi engaro.’ ”

7 # Iswilia 6.16 Yesu oko waco ne be, “Bobo da iwandik kacil waco be,

“‘Kur itam Rwot Rubanga ni.’”

8Sitani bobo oko tero Yesu i wi moru abor twatwal di eko nyuto ne ajakanuto dedede me piny kede deyo gi, 9en eko waco ne Yesu be, “Abino mini mago dedede ka iriondiko piny di iko wora.”

10 # Iswilia 6.13 Yesu oko waco ne be, “Orwa tenge, in Sitani! Pien iwandik kacil waco be, ‘Wor Rwot Rubanga ni di itio ne en kene.’ ”

11Di Sitani oko weko Yesu, di do imalaikan oko bino konye.

Yesu Ocako Tic mere i Galilaya

(Marako 1.14-15; Luka 4.14-15)

12 # Matayo 14.3; Marako 6.17; Luka 3.19-20 Kakame bin Yesu owinyo kede be koketo Yokana i otkol, en eko dok Galilaya. 13#Yokana 2.12En eweko Nasaret di eko kato ot bedo i Kaperanaum, bomba kame tie i dog nam me Galilaya, i adulion me Sebulun kede Naputali. 14Man otimere pi mino cobere kakare gikame bin enabi Isaya owaco be,

15 # Isaya 9.1-2 “Lobo me Sebulun kede me Naputali,

kame tie tetu nam adwong, ki loka tetuca me Yorodan,

Galilaya, lobo me jo kalikame Iyudayan.

16Jo kame oudo bin bedo i colo oneno lero adwong,

doko jo kame bin bedo i piny acol me to,

lero otieko tuno ne gi.”

17 # Matayo 3.2 Cako i kare nono, Yesu oko cako pwonyo kope mege di ewaco be, “Swilarunu, pien Ajakanut me malo odoko iyapiyapi.”

Yesu Olwongo Jocik Ongwon

(Marako 1.16-20; Luka 5.1-11)

18Di bin Yesu oudo tie ririto dog nam me Galilaya, en eko neno imiegu are, Simoni (kame kolwongo be Petero), kede omin mere Anderia. Gin oudo kitie uco bwoi i nam pien gin oudo jocik. 19Yesu oko waco ne gi be, “Lubanu, di ako bino loko wu idokunu jo kame coko jo buta akaka cik.” 20Cucuto nono, gin kiko weko bwoini gi di kiko lube. 21Di pwodi oudo en etie meede kede ot, eko neno bobo imiegu icegun are, Yakobo kede Yokana, awobe ka Sebedayo, di kitie iiko bwoini gi i yi yee, gin kede papa gi Sebedayo. Yesu oko lwongo gi, 22cucuto gin kiko weko papa gi kede yee kiko lubo Yesu.

Yesu Opwonyo Jo, Etatamo Kop Aber doko Ecango Jotuwo

(Luka 6.17-19)

23 # Matayo 9.35; Marako 1.39 Yesu oko ririmo Galilaya dedede di epwonyo jo i sinagogan gi, bobo di etuco Kop Aber me Ajakanut me malo kede di ecango jo kame tie kede iponeso me tuwo dedede apapat kede goro dedede me kom. 24Rwonge mere oko sarakin i piny lung me Siria, omio di oko kelo ne jo dedede kame oudo tie kede tuwo me iponeso apapat, kiton jo kame oudo tie kede jwogi, jo kame oudo tie kede tuwo me ikwikwing kede tuwo kame neko kom dano lung. En eko cango gi. 25Ekodet adwong me jo oko lube, gin bin kiyai ki Galilaya, Dekapoli, Yerusalem, ki Yudea, kede ki loka tetuca me nam me Yorodan.

Currently Selected:

Matayo 4: BILKDC13

Highlight

Copy