Matayo 12

Peny kame mako Ceng Sabato

(Marako 2.23-28; Luka 6.1-5)

1 # Iswilia 23.25 I kare nono Yesu oko ot di ebeo ki poti me engano Ceng Sabato moro acel; kec oudo oneko josiao mege, omio kiko cako gigito wit engano di kimwodo nyige mege. 2Do kakame Iparisayon oneno kede gi noni, gin kiko waco ne Yesu be, “Neningo, josiao ni tie timo gikame Iswil wa gengo jo timo Ceng Sabato.”

3 # 1 Samuel 21.1-6 Yesu oko dwoko ne gi be, “Benyo, wun likame pwodi isomunu gikame riki Daudi otimo di bin kec oneke, en karacel kede jo kame oudo tie kede? 4#Jolebi 24.9En bin edonyo i ot ka Rubanga di eko camo mugati kame oudo tie giamia but Rubanga, kame en akadi jo kame oudo tie kede en da oudo likame poore pi camo, do josaseredoti kenekene en kame oudo poore camo. 5#Wel 28.9-10Benyo, arabo likame isomunu i Iswil ka Musa, epone kame josaseredoti kame tie i tempulo oturo kede Iswil me Sabato, do di likame kobino ngolo ne gi kop iye? 6Awaco ne wu be, gimoro kame pire tek kalamo tempulo tie kan. 7#Matayo 9.13; Kosea 6.6Koto oudo ingeunu dwong me kop kame waco be, ‘Ango amito cuny me kisa do weko giayala,’ koto oudo likame ingolunu raco i wi jo kame li kede kop moro. 8Pien Wot ka dano en Rwot me Sabato.”

Icuo kame Bade Omito

(Marako 3.1-6; Luka 6.6-11)

9Yesu oko yai ki kuno, di eko ot donyo i sinagoga. 10Kikano icuo kame bade omito oudo tie kuno. Jo mogo oko penye be, “Iswil wa yei cango dano Ceng Sabato?” Gin kipenye kamano tetekeny kiud kop moro kame kiromo pide iye.

11 # Luka 14.5 Yesu oko penyo gi be, “Ngai kikom wu, ka etie kede oromo mere acel di oko poto i bur i Ceng Sabato, likame ebino mako di eko woto ooko? 12Dano pire tek kalamo oromo tien adi? Pi mano, Iswil yei ne wa timo bero i Ceng Sabato.” 13Di en eko waco ne icuo nono be, “Riei badi.” Icuo nono oko rieno bade, di bade oko doko ber bala bade ocelu. 14Do Iparisayon oko ot tenge, kiko poro kop me neke.

Ngatic kame Rubanga Oyero

15Kakame Yesu ongeo kede gikame oudo kitie tamo i kome, en eko yai tenge ki kuno. Jo atot oko lube, di en eko cango gin dedede, 16di eko ciko gi be kur kimie engere. 17En etimo man pi mino cobere kakare gikame bin Rubanga owaco i dog enabi Isaya be,

18 # Isaya 42.1-4 “Man en ngatic na kame ayero,

en kame cunya maro, doko cunya yom i kome.

Abino mine Tipo na Kacil,

di en eko bino tuco ne jo kalikame Iyudayan be ango angolo kop kede ateni.

19En likame ebino piem kitek kede jo,

arabo bedo ngat kame ngaredo,

doko likame kobino winyo dwane di etie yamo i dier gudo me bomba.

20En likame ebino turo magada ka ogom,

doko likame ebino neko etala kame liel midumidu

tuno di etieko mino ngolo kop me ateni ka Rubanga oudo loc;

21di jo kalikame Iyudayan ko bino keto gen gi i kome.”

Yesu kede Belsebul

(Marako 3.20-30; Luka 11.14-23)

22Di jo oko kelo ne Yesu icuo kame oudo tie kede jwogi kame omio wange kede lebe oto. Yesu oko cange, di do en eko cako yamo kede neno piny. 23Jo dedede kame oudo tie kuno oko uro di kipenyere be, “Dano ni karuno bedo akwar Daudi?”

24 # Matayo 9.34; 10.25 Do kakame Iparisayon owinyo kede gikame Yesu otimo, gin kiko waco be, “Dano ni riamo jwogi kede twer kowok kibut Belsebul, ngadwong me jwogi.”

25Yesu oudo ngeo tam gi, omio en eko waco ne gi be, “Ajakanut acelacel kame pokere, di kiko donyo dagere udo kony mere otieko doko li, doko bomba arabo paco kame tie kede apokapoka iye likame karuno cungo. 26Aso, ka Sitani bobo riamo Sitani wad gi, udo ajakanut mere opokere; nan do ajakanut mere nono bino cungo benyo? 27Aso, kame ango ariamo jwogi pi twer kame Belsebul en komia, do idwe wu riamo jwogi kede twer kame wok kibut ngai do? Pi mano, gin kibino bedo jongolkop wu. 28Do ka ango ariamo jwogi pi twer me Tipo ka Rubanga, udo Ajakanut ka Rubanga otieko do tuno butu.

29“Arabo dano karuno donyo i ot me ngat atek di eko yako jame mege benyo benyo di pwodi likame kong egeo tweno dano atek nono? Ka egeo timo kamano en kamio ekaruno yako jame mege.

30 # Marako 9.40 “Ngat kalikame tie pira udo edaga, kede dano kame likame coko kede ango udo en esasaro. 31Pi mano, awaco ne wu be, kobino sasiro jo ki dub dedede kede acae i kom Rubanga, do dano kame waco kop me acae i kom Tipo Kacil likame kobino sasiro en. 32#Luka 12.10Doko ngat kame waco kop arac i kom Wot ka dano, kobino sasiro en; do ngat kame waco kop arac i kom Tipo Kacil, likame kobino sasiro en i kare kanataman akadi i kare kame bino bino.

Yat kede Anyakini mere

(Luka 6.43-45)

33 # Matayo 7.20; Luka 6.44 “Ka imito udo anyakini abeco, poore imi yat kome bed yot, do ka kom yat likame yot, en enyako anyakini areco. Pien yat ngere kede anyakini mere. 34#Matayo 3.7; 23.33; 15.18; Luka 3.7; 6.45Wun idwe me twole! Ikarununu yamo kope abeco benyo benyo do di wun ibedunu jo areco? Pien dog dano waco gikame opong i cunye. 35Dano aber kelo gi aber ki jamini abeco kame en ekano, kede dano arac da kelo gikarac ki jamini areco kame en ekano.

36“Awaco ne wu be i ceng me ngolo kop ngat acelacel bino tatamo pinyo komio en oudo ebedo daco yamo kop acelacel kame bin en ewaco. 37Pien kop kame wok ki dogi en kame bino mini ilo pido, doko kop kame wok ki dogi da en kame bino mino kongolo kop loi.”

Kopenyo Yesu pi Timo Giaura

(Marako 8.11-12; Luka 11.29-32)

38 # Matayo 16.1; Marako 8.11; Luka 11.16 Di do mogo kikom jopwony me Iswil kede Iparisayon oko waco ne Yesu be, “Apwony, wan omito neni di itimo gianena moro.”

39 # Matayo 16.4; Marako 8.12 Do Yesu oko dwoko ne gi be, “Jo me i kare ni kame timo tim areco kede kalikame yei Rubanga penyo pi mito neno gianena moro, do likame tie gianena moro kame kobino mino gi, kwanyo kenekene gianena kame bin otimere ne enabi Yona. 40#Yona 1.17Pien bala kite kame bin Yona otieko kede ceng adek kede iwor adek i yi eputa, kamanono da Wot ka dano bino bedo piny i yi lobo pi ceng adek kede iwor adek. 41#Yona 3.5I ceng me ngolo kop jo me bomba me Ninebe bino cungo di kiko mino kop lo jo me i kare ni, pien bin gin kiwinyo kop kame Yona opwonyo kiko swilaro ki dub gi; do nenunu, otienu kan kede gikame pire tek kalamo Yona. 42#1 Abakai 10.1-10; 2 Iyutun 9.1-12I ceng me ngolo kop abaka adako me tetu piny bino cungo kede jo me i kare ni di en eko pido gi, piento en bin eyai ki ajikini me lobo kakabor pi ot winyo kop me rieko kibut abaka Sulumani, do nenunu, otienu kan kede ngat kame pire tek kalamo Sulumani.

Dwogo me Tipo arac i kom Dano

(Luka 11.24-26)

43“Ka tipo arac oyai ki kom dano, ebeo i adulion otuo di emo kakame eromo wei iye, do likame en eko karuno udo. 44En eko bino waco be, ‘Abino dok i oda kame awok kiye.’ Kame en edwogo, ebino udo ode no di koweo yie doko di koike kiber. 45Di do en eko ot eko kelo tipere kanyaare icegun areco kalamo en, gin kiko donyo di kiko bedo kuno; di kuo me dano no ko doko rac kalamo kite kame oudo etie kede i agege. Aso, ebino timere kamanono da ne jo areco me i kare noni.”

Imiegu ka Yesu kede Toto mere

(Marako 3.31-35; Luka 8.19-21)

46Kakame Yesu oudo pwodi tie yamo kede jo, toto mere, kede imiegu mege oko cungo ooko, di oudo kimito yamo kede Yesu. 47Ngatamoro oko waco ne Yesu be, “Toto ni kede imiegu ni tie cungo ooko di kimito yamo kedi.”

48Do en eko dwoko ne ngat kame kocwao be, “Ngai en kame toto na, doko alu en kame imiegu na?” 49En eko cimo josiao mege di ewaco be, “Toto na kede imiegu na gin ige! 50Pien ngat kame timo gikame Papa na kame tie i malo mito, en kobedo omina, amina kede toto na.”

Currently Selected:

Matayo 12: BILKDC13

Highlight

Copy