Luka 15

Oromo Korwenyo

(Matayo 18.12-14)

1 # Luka 5.29-30 Kikano jorar esolo kede jodubo dedede oudo tie nyiko but Yesu pi mito winyo kop mere. 2Iparisayon kede jopwony me Iswil oko donyo ingungur di kiwaco be, “Icuo ni kom gamo jodubo, doko di ecamo kede gi.”

3Di do Yesu oko yamo ne gi agole ni be, 4“Ngai kikom wu, ka etie kede romini tol acel, di acel kikom gi oko rwenyo, likame eweko romini ot kanyangon kiwie kanyangon icegun ka i itela, di eko ot mono acel korwenyo nono tuno ude? 5Kame eude, en erionge i ngute kede kilel. 6Ka etuno i paco, en elwongo jowote, karacel kede jokio mege dedede, di eko waco ne gi be, ‘Lelunu karacel keda, pien audo oromo na kame oudo orwenyo.’ 7Iepone nono da, awaco ne wu be, kilel bino bedo dwong i malo pi ngadubo acel kame swilaro, kalamo pi jo ot kanyangon kiwie kanyangon kopoore, kame li kede gikame kipoore swilaro kiye.

Ogap Korwenyo

8“Arabo dako mene ka etie kede ogap tomon, di ogap acel kikom gi oko rwenyo, likame ecwinyo etala, di eko weno ot di emo kiber tuno kede di eude? 9Aso, kame etieko ude, elwongo jowote kede jokio mege dedede karacel, di en eko waco ne gi be, ‘Lelunu karacel keda, pien audo ogap na kame oudo orwenyo ca.’ 10Iepone nono da, ango awaco ne wu be, imalaikan ka Rubanga bino bedo kede kilel adwong adikinicel pi ngadubo acel kame swilaro.”

Awobi Korwenyo

11Di Yesu oko waco be, “Oudo tie icuo moro acel kame tie kede awobe mege are. 12Awobi atidi oko waco ne papa mere be, ‘Papa, mia iner na me jame nin.’ Di do icuo nono oko popoko jame mege ne awobe mege nogo. 13Ingei ceng anonok, awobi atidi oko coko jame mege dedede, di eko yai ot i piny abor kakame en eko dudubo kiye jame mege dedede i kuo me atatai. 14Kakame bin etieko dudubo kede gi dedede kame oudo etie kede, kec atek oko poto i piny nono, di do kuo oko cako doko tek ne. 15Di en eko ot but icuo moro kame oudo obedo anywali me piny nono, icuo nono oko cwane pi ot gwoko ipegei mege. 16En oudo cunye romo bedo yom pi camo aligo me muranga kame bin ipegei camo; do likame tie ngatamoro kame oko mine gimoro. 17Do kakame wie oko yabere kede, en eko waco be, ‘Jotic ka papa na adi en kame camo cam di ko bwono gi, di ango ine atie kan ayaro to kec! 18Ayaro yai ako ot but papa na, di ako waco ne be, Papa, ango atieko dubo i nyim Rubanga kede i nyimi; 19ango do likame apoore pi in lwonga be wodi; tera do bala ngat acel kikom jotic ni.’ 20Di do en eko yai, di eko ot but papa mere.

“Do di pwodi oudo etie kakabor, papa mere oko nene di oko bedo kede cuny me kisa i kome, di eko ringo bute, eko gwake i kore, di eko note. 21Di wode oko waco ne be, ‘Papa, ango atieko dubo i nyim Rubanga kede i nyimi da; ango do likame apoore pi in lwonga be wodi.’ 22Do papa mere oko waco ne jotic mege be, ‘Susunyunu kelo ekanso aber ingapunu ne, di ikounu rwako epeta i lwete, kede ikounu ngapo ne amuka. 23Di ikounu kelo etobait kame mio ingolunu, me wek ocamunu kede kilel; 24pien woda ni oudo oto, do nan ekuo bobo; oudo erwenyo, do nan eudere.’ Di do jo oko cako camo ebaga.

25“I kare kame gigo oudo tie timere kede, wode adwong oudo pwodi tie i poto; kakame oudo do etie dwogo kede di do enoko paco, en eko winyo wer kede miel me jo. 26En eko lwongo ngatic acel, eko penye gikame oudo tie timere. 27Ngatic nono oko dwoko ne be, ‘Omini atidi en kame odwogo, di papa ni oko neko ne etobait amio; pien eude di ekuo, doko di kome yot.’

28“Do awobi adwong cunye oko wang, di eko dagi donyo i ot. Papa mere oko wok ooko di oko donyo ngangao en. 29Do en eko waco ne papa mere be, ‘Neningo, mwakini gi dedede ango abedo timo ni tic, doko likame adagi winyo cik ni moro akadi acel; do in likame pwodi imia akadi atin diel moro da me wek acam ebaga kede jowota. 30Do wodi ni, kame ocamo jame nin kede imalayan nan odwogo, di in iko ngolo ne etobait amio!’ 31Do papa mere oko dwoko ne be, ‘Okwe woda, in itie keda nakanaka, doko gi dedede kame ango atie kede obedo megi. 32Oudo epoore ne wan tedo ebaga kede kilel, pien omini ni oudo oto, do nan ekuo; oudo erwenyo, do nan eudere.’ ”

Currently Selected:

Luka 15: BILKDC13

Highlight

Copy