Yokana 21

Yesu Oneeno ne Josiao Kanyaare

1Ingei mano, Yesu oko bobo neeno ne josiao mege i dog nam me Tiberia. En enyutere but gi iepone ni: 2Simoni Petero, Tomasi kame kolwongo be Bangi, Natanael me Kana i Galilaya, awobe ka Sebedayo, kede josiao mege are apat oudo tie karacel. 3#Luka 5.5Simoni Petero oko waco ne gi be, “Ango atie ot cik.” Gin kiko waco ne be, “Wada oyaro ot kedi.” Gin kiko donyo i yi yee; do likame kiko mako deknam moro iwor nono. 4Kakame piny oudo tie do ru kede, Yesu oko cungo i dog nam, do josiao oudo likame ngeo be en inonono. 5Yesu oko penyo gi be, “Idwe, iudunu deknam moro?” Gin kiko dwoko ne be, “Li.”

6 # Luka 5.6 En eko waco ne gi be, “Ucunu ber bwoi i bad tetu cam me yee; ibinunu udo mogo.” Gin kiko uco bwoi, do wano bwoi i yi yee oko bwono gi, pien oudo emako deknam atot adikinicel.

7Ngasiao kame Yesu maro nono oko waco ne Petero be, “Rwot kom inonono!” Kakame Simoni Petero owinyo kede be Rwot inonono, en eko ngapo igoen mege pien oudo egonyo gi pi tic, di eko somo edonyo i yi pii. 8Do josiao icegun ka oko bino i dog nam kede yee, di kitie wano bwoi kame opong kede deknam, pien likame oudo kitie kakabor kede dog nam, do oudo kitie kakame boro mere romo bala tien tol acel. 9Kakame kiwok kede i wi itela, kiko neno mac odop kuno di deknam tie i wie, kede mugati da oudo tie. 10Yesu oko waco ne gi be, “Kelunu ber deknam mogo kame nan imakunu kan.”

11Simoni Petero oko donyo i yi yee di eko wano bwoi kame deknam adongo oudo opong iye nono ooko i dog nam. Wel me dek nam kame tie iye oudo romo tol acel kede ot kany kiwie adek. Bed bala deknam oudo tot, do bwoi likame oko nyil. 12Yesu oko waco ne gi be, “Bianu ocamunu.” Do likame tie ngasiao moro kame oko bedo kede nwangcuny me penye be, “In ngai!” Gin oudo kingeo be Rwot inonono. 13Yesu oko bino di eko kwanyo mugati, eko mino gi, di bobo eko kwanyo deknam da eko mino gi.

14Man oudo nan do tien me adek kame Yesu onyutere ne kede josiao ingei yaruno en kikom jo oto.

Yesu kede Petero

15Ingei gin tieko cam me odiko, Yesu oko penyo Simoni Petero be, “Simoni wot ka Yokana, in imara kalamo jo icegun gi?”

Simoni oko dwoko be, “Ebo Rwot; in ingeo be ango amari.” Yesu oko waco ne be, “Pit idwe me romini na.” 16En eko bobo penye tien me are be, “Simoni wot ka Yokana, in imara?”

Simoni oko dwoko ne be, “Ebo Rwot, in ingeo be ango amari.” En eko waco ne Simoni be, “Gwok romini na.” 17Yesu bobo oko penye tien me adek be, “Simoni wot ka Yokana, in imara?” Petero likame oko bedo kede yomcuny, pien Yesu openye tien me adek be, “In imara?” En eko dwoko ne Yesu be, “Rwot, in ingeo gi dedede; in ingeo be ango amari.” Yesu oko waco ne be, “Pit romini na. 18Ateteni, ateteni awaco ni be, di oudo bin pwodi in atin awobi, oudo in itweo rakoba nin keni di iko ot kakame in imito. Do ka iti, ibino rieno badi malo di ngat apat en kame ko tweno ni rakoba, di en eko teri kakame likame in oudo imito ot iye.” 19(Yesu bin owaco man pi nyuto epone kame Petero oudo oyaro to kede di eko mino Rubanga deyo.) Ingei mano, en eko waco ne Petero be, “Luba.”

Yesu kede Ngasiao kame oudo Emaro

20 # Yokana 13.25 Petero oko lokere di eko neno ngasiao kame Yesu oudo maro nono di tie lubo gi, en ngat kame oudo ogongere di iyapiyapi kede kor Yesu i kacam me otieno, en ngat kame oko penyo Yesu be, “Rwot, ngai inonono kame bino rupao in?” 21Kakame Petero onene kede, en eko penyo Yesu be, “Rwot, do en kono?”

22Yesu oko waco ne be, “Ka mit nango tie be edong di ekuo tuno ango dwogo, nyo kame tie loli iye? In luba!”

23Kop noni oko sarakin obukui but imiegu be ngasiao noni likame bino to, do di oudo likame kowaco ne be likame ebino to; do Yesu oudo owaco be, “Ka mit nango tie be edong di ekuo tuno ango dwogo, nyo kame tie loli iye?”

24Ngasiao noni en kame nan tie mino ijura i kom gi nogi, doko en kame ewandiko gi nogi. Wan ongeo be ijura kame emio tie me ateni.

25Do tie da jame apat atot kame Yesu otimo, kame ka koto kowandiko gin dedede, aparo be itabun kame kowandiko oudo koto opongo piny di oko alamar.

Currently Selected:

Yokana 21: BILKDC13

Highlight

Copy