Yokana 18

Komako Yesu

(Matayo 26.47-56; Marako 14.43-50; Luka 22.47-53)

1Di Yesu otieko waco kope nogi, en eko ot kede josiao mege, di kiko ngolo aditot me Kideron, kakame oudo poto tie iye, di en eko donyo iye karacel kede gi. 2Yuda ngat kame bin orupao en da oudo ngeo kuno, pien Yesu oudo maro ot riamo karacel kede josiao mege kuno. 3Di do Yuda oko tero ekodet me isirikalen kede jotic mogo adongodongo kuno, kame owok kibut jodongo me josaseredoti kede kibut Iparisayon. Gin kioto kunono di oudo kimako italan kede mac acal bala me rau kede jame me yi. 4Yesu oudo ngeo gi dedede kame bino timere i kome, omio en eko wokun anyim di eko penyo gi be, “Imounu ngai?”

5Gin kiko dwoko ne be, “Yesu me Nasaret.”

Yesu oko waco ne gi be, “Ango inononi.”

Yuda, ngat kame oudo orupao en, oudo tie cungo kede gi. 6Kakame Yesu owaco ne gi kede be, “Ango inononi,” gin kiko riangar cen, di kiko popoto piny. 7Yesu oko bobo penyo gi be, “Kara ber wun imounu ngai?”

Gin kiko dwoko be, “Yesu me Nasaret.”

8Yesu oko dwoko ne gi be, “Atieko waco ne wu be ango inononi. Pi mano ka itienu mona, wekunu jogi oti.” 9Man otimere pi cobo kop kame oudo Yesu owaco be, “Likame tie ngatamoro korwenyo kikom jo kame oudo imia.”

10Di do Simoni Petero, bala kame oudo etie kede epima, oko kwanyo epima mere di eko tongo kede yit epasoit me Ngatel Josaseredoti teletel. Nying epasoit nono oudo Maliko. 11#Matayo 26.39; Marako 14.36; Luka 22.42Yesu oko waco ne Petero be, “Dwok epima ni i akularu mere. Mam ango apoore pi mato ikopo me can kame Papa na otieko mina?”

Kotero Yesu i nyim Anas

12Kikano, ekodet me isirikalen kede ngadwong gi, kede ipolisin me Iyudayan oko mako Yesu di kiko twene. 13Gin kiko ber cako tere but Anas, ngat kame oudo obedo papa me dako ka Kayapa, kame oudo obedo Ngatel Josaseredoti i mwaka nono. 14#Yokana 11.49-50Kayapa nono en kame oudo bin omio Iyudayan tam be, eber ka dano acel oto pi jo.

Petero Odagi Yesu

(Matayo 26.69-70; Marako 14.66-68; Luka 22.55-57)

15Simoni Petero kede ngasiao ace oko lubo Yesu. Kite kame ngasiao nono oudo ngere kede but Ngatel Josaseredoti, omio en eko donyo i diakal me Ngatel Josaseredoti karacel kede Yesu, 16do Petero oko dong cungo i dog erute. Ngasiao nono, kame oudo ngere but Ngatel Josaseredoti, oko dok ooko, di eko yamo kede nyako kame oudo daro dog erute, di eko kelo Petero da i diakal. 17Nyako kame oudo daro dog erute oko penyo Petero be, “Mam ida ibedo ngat acel kikom josiao me icuo noni?”

Petero oko dwoko be, “Likame ango.”

18Ipasoi kede isirikalen oudo odopo mac kitie cungo di kiyo, pien piny oudo ngic. Petero da oudo tie cungo kede gi di eyo mac.

Ngatel Josaseredoti Opepenyo Yesu

(Matayo 26.59-66; Marako 14.55-64; Luka 22.66-71)

19Ngatel Josaseredoti oko penyo Yesu kop i kom josiao mege kede pwony mere. 20Yesu oko dwoko ne be, “Ango atieko waco ne piny kop kakaler; doko abedo pwonyo jo i sinagogan kede i tempulo, kakame Iyudayan dedede cokere iye. Likame tie gimoro kame ango awaco i mung. 21Pinyo komio ipenyanu? Penyunu jo kame oudo owinyo kop kame awaco ne gi; gin kingeo gikame ango oudo awaco.”

22Kakame Yesu otieko waco kede kop noni, sirikale acel kame oudo tie cungo kuno oko bape di waco ne be, “Mam epone kame in idwoko kede kop ne Ngatel Josaseredoti ino?”

23Yesu oko dwoko be, “Ka awaco kop arac, nyut gikarac nono, do ka awaco kop aber, pinyo komio ibapa?”

24Anas oko mino kotere but Kayapa di kotwee, ngat kame oudo obedo Ngatel Josaseredoti.

Petero bobo Odagi Yesu

(Matayo 26.71-75; Marako 14.69-72; Luka 22.58-62)

25Simoni Petero oudo tie cungo di eyo mac. Gin kiko waco ne be, “Mam ida ngat acel kikom josiao mege?” En eko dagi di ewaco be, “Likame ango.”

26Ngat acel kikom ipasoi me Ngatel Josaseredoti, wad gi icuo kame Petero oudo otongo yite, oko penye be, “Mam oudo aneni di itienu kede Yesu i poto?”

27Petero oko bobo dagi; cucuto di do tongweno oko kok.

Kotero Yesu i nyim Pilato

(Matayo 27.1-2, 11-14; Marako 15.1-5; Luka 23.1-5)

28Di do kiko kwanyo Yesu ki ot ka Kayapa kiko tere i ot me ngapug. Piny oudo pwodi odiko sek. Gin likame kiko donyo i ot me ngapug, pien likame oudo kimito be kimunaun, me wek kitwer camo ebaga me Bwot. 29Pilato oko donyo ooko but gi, di eko waco ne gi be, “Kop nyo kame itienu pido iye dano ni?”

30Gin kiko dwoko ne be, “Koto oudo dano ni likame obedo ngatim tim areco, koto wan likame okele buti.”

31Pilato oko waco ne gi be, “Wun terenu kikomu, ikounu ngolo ne kop di lubere kede Iswil wu.”

Iyudayan oko waco ne be, “Iswil likame yei ne wan neko ngatamoro.” 32#Yokana 3.14; 12.32(Man otimere pi mino kop kame Yesu oudo owaco cobere kakare, pi nyuto epone kame eyaro to kede.)

33Pilato oko bobo donyo i ot me ngapug, di eko lwongo Yesu, eko penye be, “In en abaka me Iyudayan?”

34Yesu oko dwoko ne kede peny be, “Kop no owok kibuti, arabo jo apat en kame owaco ni i koma?”

35Pilato oko penye be, “Do oudo ango abedo Ngayudaya? Ateker ni kede jodongo me josaseredoti en kame okeli buta; nyo kame oudo in itimo?”

36Yesu oko dwoko be, “Ajakanut na likame obedo me piny kan, ka koto di ajakanut na obedo me piny kan, oudo koto jotic na oyi tetekeny kur mia i cing Iyudayan; do ajakanut na likame wok ki piny kan.”

37Pilato oko penye be, “Mam in do abaka?”

Yesu oko dwoko be, “In iwaco be ango abaka, ango oudo konywala pi kop noni, doko kop noni da en komio ango abino i piny, me wek abed ijura i kom gi me ateni. Ngat acelacel kame tie i ateni winyo dwana.”

38Pilato oko penye be, “Ateni en nyo?”

Kongolo ne Yesu Kop me To

(Matayo 27.15-31; Marako 15.6-20; Luka 23.13-25)

Di do Pilato bobo oko donyo ooko but Iyudayan, eko waco ne gi be, “Likame ango audo raco moro kame en etimo. 39Do wun itienu kede itok wu be miero agony ne wu mabus acel i kare me Ebaga me Kalamo; benyo, imitunu be agony ne wu Abaka me Iyudayan?”

40Gin kiko lelemo be, “Likame icuo no, do gony ne wan Baraba!” Baraba oudo obedo ngayak.

Currently Selected:

Yokana 18: BILKDC13

Highlight

Copy