Ageini 16
16
Agar kede Isimael
1Sarai dako ka Aburam oudo likame onywalo ne atin moro. Do oudo en etie kede atin nyako apasoit mere, kame bin nyinge Agar, kame oudo obedo dano me Misiri. 2Sarai bin oko waco ne Aburam be, “Neningo, ango Rwot otieko twona nywal; but kede apasoit na me wek amoto aud atin kibute.” Aburam di oko winyo kop ka Sarai. 3Di Sarai dako ka Aburam oko mino Agar, kame oudo obedo dano me Misiri, nyako kame bin tie apasoit mere, but cware Aburam pi doko dako mere. Manoni bin otimere di Aburam oudo otieko mwakini tomon i Kanan. 4Aburam bin oko buto kede Agar di Agar oko udo yie. Kakame Agar oko neno kede be en etieko udo yie, eko donyo neno Sarai kede acae.
5Di do Sarai oko bin waco ne Aburam be, “Rac kame kotimo na bed i wii! Ango en kame bin amio apasoit na buti, do nan kakame en eneno kede be yie tie, eko donyo nena kede acae. Rwot en kame do ngol kop i dierediere nango kedi!”
6Di Aburam oko waco ne Sarai be, “Neningo, apasoit nin tie i twer nin; tim ne bala kame in imito.” Di do Sarai oko donyo tere kirac, omio en eko ringo tenge kibute.
7Malaika ka Rwot oko ude i nget atan me pii kame bin tie i wi tim, atan kame bin tie i yongayo aoto Sur. 8Di eko penye be, “Agar, apasoit ka Sarai, in iwok ki tuai, doko itie ot tuai?” En di eko dwoko ne be, “Ango atie ringo Sarai dako kame ango oudo abedo i cinge.” 9Malaika ka Rwot oko waco ne be, “Dok bute di iko yei ne pugi.” 10Eko bobo waco ne be, “Abino mino ikwae ni nyai nyai kalikame kokaruno maro kede wel gi. 11Neningo, nan in itieko udo yi, in ibino nywalo atin awobi di iko bino cako nyinge Isimael,#16.11Isimael dwong mere be Rubanga winyo. pien Rwot otieko winyo koko ni me can. 12En ebino bedo bala punda me obar; ebino suro jo dedede, doko jo dedede da bino sure; doko likame en ebino bedo kiber kede joawade mege dedede.”
13Agar oko penyere be, “Kom ateteni ango aneno Rubanga di ako dong kuo i cen me nene?” Manono oko mino en di do eko cako nying Rwot kame bin oyamo kede be, “In en El Roi.”#16.13 El Roi dwong mere be Rubanga kame neno. 14Manono en omio oko cako nying atan nono be Beerlakairoi;#16.14 Beerlakairoi dwong mere en atan me Ngat kame Kuo, kame nenango. en etie i dierediere me Kades kede Bered.
15 #
Jogalatia 4.22
Agar bin oko nywalo ne Aburam atin awobi di Aburam oko cako nyinge Isimael. 16Mwakini me dongo ka Aburam oudo tie ot kanyauni kiwie kanyape i kare kame Agar onywalo kede Isimael.
Currently Selected:
Ageini 16: BILKDC13
Highlight
Share
Copy
Want to have your highlights saved across all your devices? Sign up or sign in
Baibuli I Leb Kumam © Bible Society of Uganda, 2013.
