Tice 23

1Paulo oko ngino jo kame oudo tie i kansulo, di eko waco ne gi be, “Imiegu na, ango cunya ngeo kakaler be, ango abedo kede kuo aber i nyim Rubanga tuno tin.” 2Di Anania Ngatel Josaseredoti oko waco ne jo kame oudo tie cungo i nget Paulo be bap doge. 3#Matayo 23.27-28Di Paulo oko waco ne be, “Ida Rubanga bino bapi, in apama kame kopuo kede erangi atar. Mam in itie bedo pi ngolo nango kop di ilubo Iswil? Do bobo di in ngat acel nono imio jo bapo doga, gikame Iswil dagi.”

4Jo kame oudo tie cungo kuno oko waco be, “Mam in itie nywaro Ngatel Josaseredoti ka Rubanga?” 5#Yai 22.28Di Paulo oko dwoko be, “Imiegu, ango oudo likame angeo be en ebedo Ngatel Josaseredoti; pien bin kowandiko be, ‘Likame ipoore yamo kop arac i kom ngat kame telo jo ni.’ ”

6 # Tice 26.5; Jopilipi 3.5 Do kakame Paulo oniang kede be jo oudo tie i ikodeta are, ekodet me Isadukayon kede me Iparisayon, en eko yamo kede dwan amalo i kansulo be, “Imiegu na, ango abedo Ngaparisayo, anywali me Iparisayon; kotie pida pi bedo kede gen i iyarun me jo oto.”

7Kakame eyamo kede kamano, piem oko yabere i dier Iparisayon kede Isadukayon, di do kansulo oko pokere ire. 8#Matayo 22.23; Marako 12.18; Luka 20.27Pien Isadukayon yamo be iyarun likame tie, doko akadi imalaikan arabo tipere da likame tie; do Iparisayon yei be gigo dedede tie. 9Di do icelakin atek oko cakere; di jopwony me Iswil mogo me ekodet me Iparisayon oko cungo malo di kimoko be, “Wan likame oudo kop moro arac i kom icuo ni. Kara ber ka malaika amotoko tipo en koyamo kede, udo raco mere nyo?”

10Kakame gero odonyo kede i piem nono, ngadwong kame lo isirikalen dedede oko bedo kede lworo di eparo be cengemogo oudo kitwero nyinyilo Paulo. Omio en eko ciko isirikalen mege be poore kiwok piny di kiko kwanyo Paulo kibut gi tetek, di kiko tere i paco me isirikalen.

11Iwor kame lubo mere Rwot oko cungo i nget Paulo di oko waco ne be, “Bed kede nwangcuny, pien bala kite kame itieko mino kede ijura i koma i Yerusalem, miero itim kamanono da i Roma.”

Koiko Kop me Neko Paulo

12Kakame piny oru kede, Iyudayan oko iiko tam di kikwongere be likame kiyaro camo arabo mato gimoro tuno di kineko Paulo. 13Jo kame bin oiko tam noni, oudo kalamo ot ongwon. 14Gin kiko ot but jodongo me josaseredoti kede joadongo me piny di kiko waco ne gi be, “Wan otieko kwongere kitek be likame oyaro bilo gimoro tuno di oneko Paulo. 15Pi mano, wun karacel kede kansulo, cwaunu kop but ngadwong kame lo isirikalen dedede me wek kel Paulo piny butu, di ineno bala wun iyarunu ngingico tien kop mere kiber. Wan otieko iikere pi neke di pwodi likame enoko wu.”

16Wot amin me Paulo oko winyo kop gi me ot daro Paulo ki yongayo; en eko ot di eko donyo paco me isirikalen di eko waco ne Paulo kop nono. 17Paulo oko lwongo ngadwong me isirikalen acel, di eko waco ne be, “Ter atin awobi ni but ngadwong kame lo isirikalen dedede, pien etie kede kop kame emito waco ne.” 18Kikano en eko kwanyo atin awobi nono etero but ngadwong kame lo isirikalen dedede, di eko waco ne be, “Mabus kame nyinge Paulo nono olwonga, di eko kwana be akel atin awobi noni buti, pien etie kede kop kame emito waco ni.”

19Ngadwong kame lo isirikalen nono oko mako cing awobi nono eko nyiko kede tenge, di eko penye i mung be, “Kop nyo inonono kame in imito waco na?”

20Atin awobi nono oko waco ne be, “Iyudayan otieko yei kwani pi kelo Paulo i nyim kansulo diki di ineno bala gin kimito pepenyo kop i kome odocon. 21Do in kur iyei kop gi; pien cuo kame kalamo ot ongwon kikom gi bino kine i yongayo. Gin kitieko kwongere be likame kiyaro camo akadi mato gimoro, tuno kede di kineko Paulo. Nan gin kitieko iikere kitie do kuro kop kame yai kibuti.”

22Ngadwong kame lo isirikalen dedede nono oko ciko awobi nono be, “Kur iwac ne ngatamoro be in itieko kwenyaro ango i kom kop noni.” Di do en eko weke eoto.

Kocwao Paulo but Pelik Ngapug

23Di do ngadwong kame lo isirikalen dedede oko lwongo jodongo are me isirikalen, di eko waco ne gi be, “Nat esawa adek me iwor, iikunu isirikalen tol are, kede ace kame ringo kede asigiran da ot kanyaare, karacel kede wegi tongini tol are, di ikounu mino gi kioti tuno Sisiria. 24Iikunu ne Paulo da asigira me ot, di ikounu tere tuno but Pelik ngapug abongo peko moro.” 25Di en eko wandiko baluwa kame mako kop noni be:

26“But Adwong me awora Pelik ngapug, ango Kulaudio Lusia, amoti. 27Iyudayan oudo omako icuo ni, doko oudo kiyapuno neke da. Ango kede isirikalen oko ngoole i kom gi, di oko mane ki cing gi, pien oudo atieko niang be en ebedo anywali me Roma. 28Ango ako mino kokele i nyim kansulo gi, pien oudo amito ngeno tien kop kame gin kitie pide iye. 29Ango ako udo be gin oudo kitie pide i tien kop moro kame mako iswil gin, do likame tie gimoro kame romo mino kongolo ne kop me to arabo twene. 30Aso, kakame kowaco nango kede be oudo kotie iiko tam me neke, cucuto ango ako cwane buti, di aciko jo kame tie pide pi tatamo nin gikame kitie pide iye.”

31Kikano isirikalen oko kwanyo Paulo iwor bala kite kame oudo kociko gi kede, di kiko tere tuno Antipaturi. 32Oru mere gin kiko dok paco me isirikalen kiweko wegi asigiran pi meede ot kede Paulo. 33Kakame kituno kede Sisiria di kiko mino ngapug baluwa nono, kiko nyuto Paulo da bute. 34Ingei somo baluwa nono, en eko penyo Paulo nying adul me tur gi. Kakame eniang kede be Paulo obedo dano me Kilikia, 35en eko waco ne be, “Ango abino winyo kop nin kame jo kame tie pidi otuno.” Di en eko ciko be isirikalen dar Paulo i ot ka Abaka Erode.

Currently Selected:

Tice 23: BILKDC13

Highlight

Copy