Tice 15

Cokere kobedo Yerusalem

1 # Jolebi 12.3 Do jo mogo bin oko wok ki Yudea kiko donyo pwonyo jo koyei Kirisito di kiwaco be, “Likame itwerunu udo alako kwanyo di kokepo wu bala kite kame itok ka Musa mito kede.” 2Paulo kede Baranaba oko piem kede jo nogo kitek, omio apokapoka oko bedo i diere gi, di do oko yero Paulo kede Baranaba, kede jo ace apat, di oko cwano gi Yerusalem but joor kede joadongo pi niang kop noni.

3Di do ekodet me jokirisito oko cwano gi kioto, kiko beno ki Poenike kede Samaria, di kitatamo epone kame jo kalikame Iyudayan olokere kede but Rwot. Kop nono oko yomo cuny jo koyei Kirisito dedede. 4Kakame kituno kede Yerusalem, ekodet me jokirisito dedede, karacel kede joor kede joadongo, oko gamo gi. Gin kiko waco ne jo nogo gi dedede kame Rubanga otio kede gin pi timo. 5Do jo mogo koyei, kame oudo bin tie i ekodet me Iparisayon oko yai malo di kiko waco be, “Miero kep gi di oko ciko gi pi lubo Iswilia ka Musa.”

6Joor karacel kede joadongo oko cokere karacel pi nyamo kop noni. 7#Tice 10.1-43Ingei nyamo kop pi esawa alac, Petero oko yai malo di eko waco ne gi be, “Imiegu kede amiegu na, wun ingeunu be i kare asek Rubanga oudo oyera ki diere wu tetekeny jo kalikame Iyudayan da winy kop me ejiri ki doga, di kiko yei. 8#Tice 2.4; 10.44Rubanga ngat kame ngeo cuny jo bin oko mino ijura mere i kom gi, di emio gi Tipo Kacil bala kite kame bin emio kede wada. 9Doko likame en eko keto apokapoka moro i diere gi kede wan, do en elonyo cuny gi pi yei. 10Pi mano, pinyo komio wun nan itienu tamo Rubanga di iketunu iswilia atek ne jo kame lubo Yesu, kame joakwari wa akadi wada likame otwerunu lubo? 11Do wan oyei be, wan obinunu udo alako pi kisa ka Rwot Yesu bala gida.”

12Ekodet lung oko ling titi, kiko donyo winyo Paulo kede Baranaba di tie tatamo epone kame Rubanga otimo kede gianena kede gi me isuur but jo kalikame Iyudayan di etio kede gin. 13Ingei gin tieko yamo, Yakobo oko dwoko be, “Imiegu na, winyunu. 14Esimioni otieko tatamo ne wa epone kame Rubanga bin ocako paro kede pi jo kalikame Iyudayan, di en eko yero kikom gi jo kame kolwongo kede nyinge. 15Doko da kope nogi upere kede kope me inabin, bala kite kame bin kowandiko kede be,

16 # Amosi 9.11-12 “‘Ingei man ango abino dwogo,

di ako bino bobo gero ot ka Daudi kame otieko poto;

ango abino bobo gero ameje mere,

di ako bino mine ecungo,

17tetekeny jo icegun dedede moi Rwot,

akadi kiton jo dedede kalikame obedo Iyudayan, jo kame kolwongo kede nyinga.

18Mane en gikame Rwot owaco, en ngat kame emio gi nogi ongere cako sek.’

19Pi mano, ango aneno be, wan likame opoore lolo jo kalikame Iyudayan, kame lokere but Rubanga. 20#Yai 34.15-17; Jolebi 17.10-16; 18.6-23Do poore owandiko ne gi kop kame gengo gi camo gikame koyalo kede cal jwogi, kede da kiwek timo caro, doko kiwek camo gikame kodeo adea, kede kiwek camo remo. 21Piento cako kibut jo ariki sek, Musa obedo tie kede jo kame tatamo kop mere i bomba acelacel, pien oudo kosomo kop mere Ceng Sabato acelacel i sinagogan.”

Baluwa kame Kocwao but Jo Koyei kalikame obedo Iyudayan

22Di do joor kede joadongo karacel kede ekodet lung me jokirisito oko yei yero jo mogo kikom gi, di kiko cwano gi Antiokia karacel kede Paulo kede Baranaba. Gin kiko oro Yuda kame bin kolwongo be Barasaba kede Sila, kame oudo obedo jotel i dier jo koyei Kirisito, 23kede baluwa kame waco kaman:

“But jo kalikame Iyudayan koyei Kirisito, kame bedo Antiokia, Siria kede Kilikia. Wan imiegu wu joor karacel kede joadongo omoto wu. 24Wan otieko winyo be jo mogo oyai kibut wan kan di kiko bino lolo wu kede kope mogo kame oko dubo tam wu, bed bala wan likame owaco ne gi. 25Omio nan eneeno gikaber ne wan, ingei moko tam acel, pi yero cuo mogo di oko oro gi butu karacel kede imiegu wa me amara, Paulo kede Baranaba, 26cuo kame ojalo kuo gi pi Rwot wa Yesu Kirisito. 27Pi mano, wan nan ocwao Yuda kede Sila butu, gin kibino tatamo ne wu kop acel nono kede dog gi. 28Pien wan karacel kede Tipo kacil, otamo be miero kur bobo omed keto yec moro apek i wi wu, do kwanyo gikame mitere ige: 29miero iwekunu camo gikame koyalo kede cal jwogi, doko iwekunu camo remo kede gikame kodeo adea, kede timo caro. Ka iwekunu timo gigi, udo itimunu gikaber. Asounu do.”

30Kakame kiyai kede, kiko ot kilor Antiokia. Di do bin kitieko coko ekodet me jo koyei Kirisito karacel, gin kiko mino gi baluwa nono. 31Kakame jo osomo kede baluwa nono, kiko bedo kede kilel pi supo cuny gi. 32Yuda kede Sila, kame oudo obedo inabin, oko bedo kwano cuny jo koyei Kirisito kede kope atot, di kiko mino gi tekcuny. 33Ingei tieko kare moro kuno, jo koyei Kirisito oko twaro gi pi dok but jo kocwao gi, di kikwao ne gi mulem. 34(Do Sila oko neno be oudo ber ne en pi dong kuno.)

35Paulo kede Baranaba oko dong Antiokia pi pwonyo kede tuco kop ka Rwot ne jo, gin karacel kede jo atot apat da.

Paulo Opokere kede Baranaba

36Ingei ceng mogo, Paulo oko waco ne Baranaba be, “Bia odok owelao imiegu kame tie i bomba acelacel kame bin opwonyo kop ka Rwot iye, di oko neno epone kame kitie kede.” 37Baranaba oudo mito be koto kitero Yokana kame oudo kolwongo be Marako upere kede gi. 38#Tice 13.13Do Paulo oko tamo be likame oudo poore ne gin tero dano kame bin opokere oweko gi i Pampulia di likame eko upere kede gi ot i tic. 39Kop no oko kelo piem atek i diere gi, kame oko mino gi kipokere; Baranaba otero Yokana Marako oupere kede, kiko kwang kioto Sipuro, 40do Paulo oko yero Sila, di gida kiko yai ingei jo koyei Kirisito kwano ne gi kisa ka Rwot. 41Paulo oko ot ebeo i Siria kede i Kilikia di emio ikodeta me jokirisito tekcuny.

Currently Selected:

Tice 15: BILKDC13

Highlight

Copy