Tice 13

Koyero Baranaba kede Saulo oko Ooro gi

1Kikom ekodet me jokirisito kame tie Antiokia, oudo tie iye inabin kede jopwony. Gin en Baranaba, Esimioni kame bin kolwongo be Naiga,#13.1Naiga man dwong mere be delkom acol. Lukio me Sirene, Manea kame bin obedo ngat acel kikom jo me paco ka Abaka Erode, kede do Saulo. 2Di bin gin kitie timo tic me woro Rwot kede kanyo kec, Tipo Kacil oko waco ne gi be, “Pokunu na Baranaba kede Saulo tenge pi tic kame ango alwongo gi iye.”

3Di do ingei kanyo kec kede ilega, gin kiko keto cing gi i wi Baranaba kede Saulo, di kiko cwano gi.

Baranaba kede Saulo i Sipuro

4Kakame Tipo Kacil ooro gi kede, Baranaba kede Saulo oko ot kiko lor Selukia; ki kuno di kiko kwang kioto Sipuro. 5Kakame kituno kede Salamis, kiko donyo pwonyo kop ka Rubanga i sinagogan. Yokana kame kolwongo be Marako oko donyo konyo gi.

6Kakame kitieko ririmo kede cula lung tuno Papo, kiko ngoole i kom ngatamoro kame timo tangu me jwok. En oudo ebedo enabi me angalo, Ngayudaya kame nyinge Bar-Yesu. 7En oudo ebedo kede ngapug me cula nono kame nyinge Serugio Paulu, kame oudo obedo icuo ariek kame oko lwongo Baranaba kede Saulo pi mito winyo kop ka Rubanga kibut gi. 8Do Elimasi ngatim tangu me jwok (dwong me nyinge inonono i leb Gurik) oko donyo piem kede gi di emito lengo ngapug nono tenge ki yei. 9Do Saulo kame nyinge da Paulo, oko pong kede Tipo Kacil, di eko ciko wange i kome, 10di eko waco ne be, “In nywal me Sitani, in ngakwor me gi kopoore dedede, ipong kede angalo kede tim areco, mam in likame ibino weko gogomo yongayo koriere ka Rwot? 11Neningo, twer ka Rwot nan opoto i komi, wangi bino to di likame iko twero neno wang ceng pi kare moro.”

Cucuto nono di ekuna kede colo oko umo wange, di do ecako ot di emo jo kame romo pene kede cinge. 12Kakame ngapug nono oneno kede gikame otimere, en eko bedo kede ur i kom gikame kopwonyo i kom Rwot, di eko do yei.

Baranaba kede Paulo i Antiokia me Pisidia

13Di do Paulo kede jowote oko kwang yai ki Papo tuno i bomba me Perega, kame tie Pampulia. Yokana kame kolwongo be Marako oko weko gin kuno, di en eko dok Yerusalem. 14Do Paulo gini oko meede kede ot, yai ki Perega tuno Antiokia me Pisidia. Ceng Sabato gida kiko ot i sinagoga, di kiko bedo piny. 15Ingei somo itabu me Iswil kede me inabin, jotel me sinagoga oko cwano ne gi kop di kiwaco be, “Imiegu, ka itienu kede kop moro me supo cuny jo, yamenu.” 16Di do Paulo oko yai malo, eko poro kop kede cinge be jo lingi, di eko cako yamo kaman:

“Jo me Isirael, kede wun jo kame woro Rubanga, winyunu. 17#Yai 1.7; 12.51Rubanga me jo Isirael nogi, riki oyero joakwari wa, di en eko mino gi kibedo ateker adwong i kare kame kitie kede i piny me Misiri. En eko woto gi tenge ki Misiri pi twer mere, 18#Wel 14.34; Iswilia 1.31di eko ngirkino gwoko gi i tim pi mwakini kame romo bala ot ongwon. 19#Iswilia 7.1; Yosua 14.1Kakame Rubanga bin oneko kede atekerin kanyaare i lobo me Kanan, en eko mino lobo gi but ateker me Isirael pi sikao en pi mwakini aromo tol ongwon kede ot kany.

20 # Jongolkop 2.16; 1 Samuel 3.20 “Ingei mano, en eko mino gi jongolkop pi bedo jotel tuno kede i kare ka enabi Samuel. 21#1 Samuel 8.5; 10.21Di do gin kiko kwano be mi gi abaka, Rubanga oko mino gi Saulo wot ka Kisi, dano me ateker ka Benjamin, pi bedo abaka gi pi mwakini ot ongwon. 22#1 Samuel 13.14; 16.12; Sabuli 89.20Kakame Rubanga okwanyo kede Saulo, en eko yero Daudi pi bedo abaka gi. En eko yamo kop i kome be, ‘Ango audo be, Daudi wot ka Yese en kame obedo dano kame yomo cunya, kame bino timo gikame ango amito dedede.’ 23Kikom ikwae ka Daudi noni, Rubanga oko yero ne jo me Isirael Ngalak, en Yesu, bala kite kame oudo ecikere kede. 24#Marako 1.4; Luka 3.3Di pwodi likame Yesu obino, Yokana oudo otieko pwonyo jo dedede me Isirael be miero kilokere kiwek dub gi di oko batiso gi. 25#Matayo 3.11; Marako 1.7; Luka 3.16; Yokana 1.20, 27Kakame Yokana oudo tie tieko kede tic mere, en eko waco be, ‘Wun iparunu be ango en ngai? Ango likame ngat kame wun itienu daro, do i cen ngea, tie ngat kame tie bino, kame ango likame apoore pi gonyo amuka mere.’

26“Imiegu na wun ikwae ka Aburaam, kede jo ace kikom wu kame woro Rubanga, kop me alako noni kotieko cwano but wa. 27Kite kame jo kame oudo bedo Yerusalem kede jotel gi likame ongee kede, arabo oniang kope me inabin kame oudo kosomo Ceng Sabato dedede, omio kiko mino kope nogi ocobere kakare di kingolo ne Yesu kop. 28#Matayo 27.22-23; Marako 15.13-14; Luka 23.21-23; Yokana 19.15Bed bala gin oudo likame kiudo kop moro kame romo mino kongolo ne kop me to, do gin kiko kwano Pilato be emi neke. 29#Matayo 27.57-61; Marako 15.42-47; Luka 23.50-56; Yokana 19.38-42Kakame gin kitieko kede timo gi dedede kame cobo kop kame kowandiko i kome, gin kiko do kwanye tenge kikom yat, di kiko ot yike i ates. 30Do Rubanga oko yaruno en kikom jo oto. 31#Tice 1.3Di en eko neeno tien atot but jo kame bin en ewok kede gi ki Galilaya bino Yerusalem. En jo nogo kame nan tie ijurak mege but jo. 32Wan nan okelo ne wu Kop Aber be, gikame Rubanga bin ocikere pi timo ne joakwari wa, 33en nan etieko mino ocobere but wan ikwae gin, di eyaruno Yesu; bala kite kame kowandiko kede i Sabuli me are be,

“‘In en Woda,

tin ango adoko Papa ni.’

34 # Isaya 55.3 “I kom kop kame mako Rubanga yaruno en kikom jo oto, di likame bobo eko top, Rubanga oko yamo kaman,

“‘Ango abino mino wu cikere kacil

kame bin ango acikere pi mino Daudi.’

35 # Sabuli 16.10 “Pi mano, en eyamo bobo i Sabuli ace be,

“‘In likame ibino weko Dano nin Kacil top.’

36“Pien Daudi riki ingei mino iik ka Rubanga ocobere i kare mere, en eko to di oko yike i nget joakwari mege di kome oko top. 37Do ngat kame bin Rubanga oyaruno likame obilo top. 38Pi mano, imiegu na, mito wun ingeunu kiber be, kotie pwonyo wu kop i kom isasir me dub pi icuo noni, 39doko da pi en nono, ngat acelacel kame yei, kogonye ki dub dedede kame Iswil ka Musa oudo likame twero gonye kiye. 40Pi mano, gwokerenu tetekeny gikame riki inabin owaco kur timere i komu, kame waco be,

41 # Abakuk 1.5 “‘Nenunu ber, wun jo kame cao kop ka Rubanga! Urunu ikounu to!

Pien gikame ango atie timo i kare wu,

obedo gi kalikame ibinunu yei,

akadi di ngatamoro oniango wu iye.’ ”

42Kakame Paulo kede Baranaba oudo tie donyo kede ooko, jo oko kwano gi be koto kimedo tatamo kope nogi i Ceng Sabato kame lubo. 43Kakame cokere kame oudo tie i sinagoga oko jik kede, Iyudayan atot karacel kede jo kame bin olokere i edini gi di kiko keto cuny gi iye, oko lubo Paulo kede Baranaba. Gin kiko donyo yamo kede gi di kikwao cuny gi pi gin dong di kigeno bero ka Rubanga.

44Ceng Sabato kame lubo, jo oko buco bino dedede ki bomba di kiko cokere karacel pi winyo kop ka Rubanga. 45Do kakame Iyudayan oneno kede twon ekodet me jo, nyeko oko mako gi kitek, omio kiko donyo piem kede Paulo di kiyeyeto en. 46Di do Paulo kede Baranaba oko donyo yamo abongo lworo di kiwaco be, “Oudo etie gikame mitere, be oudo miero ber gei tuco kop ka Rubanga butu. Do pien wun idagunu kope nogi, di ingolunu kop i komu kenu be likame ipoorenu donyo i kuo kame bedo nakanaka, omio wan nan oyaro lokere but jo kalikame Iyudayan. 47#Isaya 42.6; 49.6Kop noni en komio Rwot ociko wan di ewaco be,

“‘Ango atieko yero wu pi bedo lero but jo kalikame Iyudayan,

tetekeny imiunu alako tuni i ajikini me lobo.’ ”

48Kakame jo kalikame Iyudayan owinyo kede kop noni, cuny gi oko doko yom di kiko mino kop ka Rubanga deyo. Di jo dedede kame Rubanga oudo otieko yero pi donyo i kuo kame bedo nakanaka oko yei Yesu Kirisito.

49Kop ka Rwot oko nyai oromo piny nono dedede. 50Do Iyudayan oko supo cuny mon kame ngere, kame oudo keto cuny gi woro Rubanga, karacel kede cuo kame jo oudo woro i bomba. Gin kiko mino jo ogeo tidilo Paulo kede Baranaba, di kiko riamo gi ki piny gi. 51#Matayo 10.14; Marako 6.11; Luka 9.5; 10.11Do Paulo kede Baranaba oko tengo adae me tien gi#13.51 tengo adae me tien gi tengo ne dano adae me tien kibut Iyudayan oudo obedo gianyuta me dage. ne jo me bomba nono, di kiko yai kioto Ikoniam. 52Josiao oko bedo kede kilel adwong, doko kiko pong kede Tipo Kacil.

Currently Selected:

Tice 13: BILKDC13

Highlight

Copy