Tice 10

Petero kede Kolonerio

1Oudo icuo moro tie Sisiria kame nyinge Kolonerio, en oudo ebedo ngadwong me ekodet me isirikalen me Itali. 2En oudo ebedo icuo kame keto cunye woro Rubanga kede jo me i ode dedede. Doko en oudo emio jo kony kede cunye lung di elego Rubanga nakanaka. 3Ceng moro acel iesawa kanyangon me otieno, en eko neno i gianyuta di malaika ka Rubanga bino bute di oko lwonge be, “Kolonerio.”

4En eko ngino malaika nono kede lworo, di eko waco be, “Benyo bo Rwot?”

Malaika nono oko waco ne be, “Ilega kede mic nin me konyo jocan otieko tuno but Rubanga, omio en eyutuno in. 5Nan do cwai jo mogo Jopa pi ot omo Simoni, kame kolwongo be Petero. 6En etie bedo paco ka Simoni nganyong launi, kame paco mere tie i dog nam.” 7Kakame malaika kame bin yamo kede nono oyai kede kibute, Kolonerio oko lwongo jotic mege are, kede sirikale mere acel kame genere kikom isirikalen mege kame dare. 8En eko tatamo ne gi gikame malaika nono owaco ne dedede, di eko cwano gi Jopa.

9Oru mere di pwodi kitie i yongayo, di do kinoko bomba me Jopa, Petero oko yai tetu esawa kanyape, di eko yito malo i wi ot pi lego. 10Kec bin oko neke di eko mito gimoro me acama; do di pwodi oudo kotie iiko ne cam, en eko neno gianyuta, 11eneno malo di oyabere, di gimoro tie bino piny kame cal bala esuka alac kame komako lake ongwon di kotie yololo en piny. 12Egere me leini dedede, kede jame kame liao alia, kede winy kame por oudo tie i esuka nono. 13Dwan oko winyere di waco be, “Petero, yai, neki di iko camo.”

14Do Petero oko dwoko be, “Rwot, likame kamano; pien cako ango gira pwodi likame acamo gimoro me kwer arabo gikame omunaun.”

15Petero bobo oko winyo dwan nono tien me are di ewaco ne be, “Gikame Rubanga otieko lonyo, kur bobo in ilwongo be gi me kwer.” 16Man otimere tien adek, cucuto nono di oko tingo esuka nono kotero malo.

17Di pwodi Petero oudo wie ocungo pi dwong kop me gianyuta koneeno ne, cuo kame bin Kolonerio ocwao nogo oudo tie cungo i dog erute, pien oudo kitieko pepenyo tuai kame ot ka Simoni tie iye. 18Gin kiko lwongere di kipenyo ka Simoni kame kolwongo be Petero oudo bedo kanono.

19Di pwodi Petero oudo tie mito ngeno dwong me gianyuta nono, Tipo ka Rubanga oko waco ne be, “Neningo, cuo adek tie moni. 20Yai iwok piny di iko upere kede gi, kur idagi, pien ango en kame aoro gi.” 21Petero oko wok piny but jo nogo, di en eko waco ne gi be, “Ango inononi kame wun itienu mono. Kop nyo kokelo wu kan?”

22Gin kiko dwoko ne be, “Kolonerio en kame ooro wa; malaika kacil oudo owaco ne be ecwai jo buti pi lwongi ioti i ode, me wek ewiny kop kame iyaro waco ne. En ebedo ngadwong me isirikalen, dano me ateni kame lworo Rubanga, kame ateker me Iyudayan yamo kope abeco i kome.” 23Di Petero oko lwongo gi i ode pi gin bedo wele mege.

Oru mere en eko yai di eko ot kede gi. Imiegu mogo i Kirisito, kame oudo tie Jopa oko upere kede gi. 24Ceng kame lubo mere kiko tuno Sisiria. Kolonerio oudo tie kuro gi, doko en oudo elwongo joawade kede awotino mege karacel. 25Kakame Petero oudo tie donyo kede i ot, Kolonerio oko yai pi game, di eko riebere piny i tien Petero, di eko mine wor. 26Do Petero oko kiarao en di waco ne be, “Yai malo, ango da abedo dano bala in.” 27Petero oko meede yamo kede Kolonerio di kitie donyo i ot. Kakame kidonyo kede i ot, kiko udo jo kame oudo ocokere kuno tot. 28Petero oko waco ne gi be, “Wun kikomu ingeunu be Iswil likame yei ne Ngayudaya moro welao arabo nywako kede dano me ateker apat. Do Rubanga otieko nyuto nango be kur alwong ngatamoro be dano komunaun arabo kalikame cil. 29Pi mano, i kare kame in icwao kede jo pi lwonga, ango ako bino abongo iyalongong. Nan do atie penyi gikame omio ilwonga.”

30Kolonerio oko waco be, “Okato nan ceng ongwon, bala iesawa noni, ango oudo atie i oda ilega me esawa kanyangon me otieno. Kikano di icuo moro oko cungo i nyima di engapo igoen kame meny, 31di eko waco be, ‘Kolonerio, Rubanga otieko winyo ilega ni, doko etieko yutuno in pi kony kame in ibedo mino but jocan. 32Pi mano, cwai jo mogo Jopa, kioti kilwong Simoni kame kolwongo be Petero. En etie ebedo i ot me icuo moro kame nyinge Simoni nganyong launi, kame ture tie i dog nam.’ 33Cucuto nono di do ango ako cwano jo pi lwongi. Aso ida iko timo ber iko nan bino. Nataman wan dedede otienu kan i nyim Rubanga, pi winyo gi dedede kame Rwot owaco ni.”

Yamo ka Petero i Ot ka Kolonerio

34 # Iswilia 10.17 Petero oko cako yamo di ewaco be, “Atieko do nan niang kiber ateteni be Rubanga li kede apokapoka but jo. 35Do i atekerin dedede, en egamo jo dedede kame wore kede kame timo gi kopoore. 36Wun ingeunu kop kame riki en ecwao ne jo me Isirael, en Kop Aber me mulem, kame bin Yesu Kirisito, ngat kame obedo Rwot kame lo jo dedede en kokelo. 37Kop nono en kame bin kopwonyo i piny me Yudea lung, cako ki Galilaya, ingei batisimu kame Yokana oudo owaco kop mere: 38epone kame Rubanga bin oyero kede Yesu me Nasaret, di eko mine Tipo Kacil kede twer, kede da epone kame en eko ririmo kede piny di etimo bero ne jo, doko da di ecango jo dedede kame bin Sitani otweo, pien Rubanga oudo tie kede en. 39Doko wan dedede otienu ijurak me gi dedede kame bin en etimo i piny me Iyudayan kede i Yerusalem. Gin bin kiko gure i kom yat di eko to. 40Do Rubanga oko yaruno en ingei ceng adek di oko mine eneeno; 41likame but jo dedede, do but wan jo kame Rubanga oudo otieko yero pi bedo ijurak, wan jo kame bin ocamo di okounu mato kede en ingei en yaruno kikom jo oto. 42Doko Yesu bin oko ciko wan pi ot tuco ejiri but jo, kede mino ijura i kome be, en nono kame riki Rubanga oyere pi bedo ngangolkop me jo akuo kede jo oto. 43Inabin dedede bin omio ijura i kome be ngat acelacel kame yei en, kobino sasiro en ki dub mege pi nyinge.”

Jo Kalikame Iyudayan Ogamo Tipo Kacil

44Di pwodi Petero oudo tie yamo, Tipo Kacil oko bino i kom jo dedede kame oudo tie winyo kop mere. 45Jo kame kokepo, kame oudo oyei Yesu, kame oudo oupere kede Petero yai ki Jopa oko uro twatwal, pien oudo komio jo kalikame Iyudayan da giamia me Tipo Kacil. 46Pien oudo kiwinyo di jo nogo tie yamo i leb anyen, di kimio dwongo but Rubanga. 47Di do Petero oko waco be, “Ngai kame twero gengo jogi udo batisimu me pii, do di gida kitieko udo Tipo Kacil bala wan?” 48Petero oko ciko be poore batiso gi i nying Yesu Kirisito. Di do kiko kwane be ber ebed kede gi pi kare moro acecek.

Currently Selected:

Tice 10: BILKDC13

Highlight

Copy