2 Makabi 14
14
Alikimu Oyamo Kirac i kom Yuda
(1 Makabi 7.1-21)
1Di mwakini adek okato, kop oko tuno but Yuda kede isirikalen mege be Demeterio wot ka Seleukus oudo okwango eoto i edoket me Turipoli kede isirikalen atek kede imerin. 2Kowaco negi oudo be Demeterio otieko neko Abaka Antiokus, kede be Layasia ngat kame bin gwoke, doko oudo kitieko mano piny nono.
3Bin tie icuo moro kame nyinge Alikimu, en oudo kong sek ebedo Ngatel me Josaseredoti, do en eko gamo kuo me jo Gurik kede yomcuny i kare kame bin jo ojemo kede. En bin eniang be oudo en bobo likame etwero meede bedo Ngatel me Josaseredoti, doko oudo etie kede lworo i kom gikame Iyudayan romo timo ne, 4omio en eko ot neno Abaka Demeterio in mwaka tol acel kede ot kany kiwie acel (151).#14.4 Manoni riamo kede mwaka me tol acel kede ot kanyape kiwie acel (161) di pwodi likame konywalo Kirisito. Ceng nono en eko mino abaka ocoro kame kotimo kede saabu kede jang otit, karacel kede ajange mogo me olibeti, kame oudo konare tero i tempulo, do likame eko yamo kop moro. 5Do icen mere en eko udo winyo me timo iik me mingo mere nono kakame Demeterio olwonge kede i cokere me jo amie tam, di Demeterio oko penye gikame Iyudayan tie iiko pi timo. En eko gamo be, 6“Jo kame lubo Yuda Makabi tie mino yi meede, doko kitie supo jo pi jemo, gin likame kibino weko ateker bedo kede mulem. 7Raco gi en komio ango aweko tic me deyo me bedo Ngatel me Josaseredoti, ruom kame konywala pi bedo iye. Aso, ango nataman abino kan, 8me agege, pi kite kame ango aparo kede pirin bala abaka, kede da pi kite kame ango aparo kede pi jo na, pien iik areco ka Yuda kede jo kame lube otieko kelo peko i piny wan lung. 9Bala kame in abaka ingeo kede kope nogi kodocon, ango akwai ibed kede cuny aber bala lem sek, di iko konyo jo wa ki peko kame kotie mino gi. 10Tek di Yuda kuo, ateker wan likame bino bedo kede mulem.”
Demeterio Ocwao Nikanori pi ot Suro Yuda
11Kakame Alikimu otieko kede yamo, jo apat da kame mio tam oko udo winyo me medo mino cuny abaka wang i kom Yuda, pien gin oudo kidage. 12Oyotoyot di abaka Demeterio oko yero Nikanori, ngat koudo telo liece, di eko kete ebedo ngapug me Yuda, di eko cwane 13di emie cik me neko Yuda, sasaro jo alube, di eko mino Alikimu doko Ngatel me Josaseredoti me tempulo adwong. 14Jokumbor dedede koudo tie Yuda, jo koudo oko ringo ki asura ka Yuda, oko do ringo di kiko ribere kede Nikanori, pien gin oudo kitamo be ka oko bwono Iyudayan arabo peko moro opoto negi, manono bino kelo ne gin bero.
15 #
1 Makabi 7.27-28
Kakame Iyudayan owinyo kede be Nikanori oudo tie bino negi, kede be oudo etie coko jokumbor pi ribere kede en, gin kiko juko wi gi kede apua di kiko lego but Rubanga gi, ngat koudo oyero ateker gi bala mere atwal, doko cako sek en likame ejalo gi i peko moro. 16Di do Yuda, ngatel gi, oko mino cik, di gin kiko yai ot pi yi kede jokwor i nget calo me Adasa. 17Simoni, omin me Yuda oudo tie yi kede Nikanori, do oudo kotie bwone momot momot, pien jokwor oudo ongeso gi. 18Akadi kamanono da, Nikanori oko winyo kite kame Yuda kede isirikalen mege oudo yi kede nwangcuny pi piny gi, di en eko weko kop me tieko kop i yore me yi. 19Pi mano, en eko cwano Posidonius, Teodotus, kede Matatia pi ot timo cikere me mulem kede Iyudayan.
20Kakame gin kitieko poro kede kop me cikere nono yore i yore, Nikanori oko waco ne isirikalen mege, di gin dedede kiko yei kede kop me isikan nono. 21Di do bin oko iiko ceng kame jotel gi bino riamo iye gin ken gi. Cabala oko bino ki ekodet acelacel, di oko cibo komini me wor. 22Yuda oudo ocicibo isirikalen mege kabedere kame poore pi bedo di ikapakina pi yi, ka jokwor oudo oko bedo kede tim me angalo. Do jotel are nogo oko winyere kiber. 23I ngei manoni Nikanori oko dong bedo Yerusalem. En likame eko tero Iyudayan kirac i yore moro ni kenekene, doko da en eko waco ne jo koudo obino pi gange pi ot tenge. 24Cuo are nogi oko doko adiereson atek, doko Yuda oudo oko doko ngaupa atek ka Nikanori. 25Nikanori oko cuko cuny Yuda be enyom dako di eko nywalo idwe. Aso, Yuda oko nyomo dako di do eko bedo mot.
Nikanori Olokere ne Yuda
26Do kakame Alikimu oneno kede bedo aber koudo tie i dierediere ka Nikanori kede Yuda, en eko kwanyo elagano me isikan kame gin oudo kitimo di eko ot kede but Abaka Demeterio. En eko waco ne abaka be Nikanori oudo likame lubo kop me apugan, pien oudo etieko keto ngaidupor Yuda pi lunyo wange. 27Pido me abe noni oko wango cuny abaka, di pi wangcuny en eko wandiko baluwa but Nikanori, di ewaco ne be en cunye oudo likame yom kede isikan kame en etimo, di eko mine cik be emak Yuda di eko cwane Antiokia bala mabus awakawaka.
28Kakame kop noni oko tuno kede but Nikanori, kop noni oko cobo cunye di likame eko ngeno gi me atima, pien oudo cunye likame yom pi turo cikere mere but ngat kalikame otimo gimoro arac. 29Aso di en likame eromo dagi timo gikame abaka owaco. Manono oko mino en eko cako mono yongayo me mako Yuda. 30Do Yuda oko neno be Nikanori oudo tie doko ger ne, di en eko niang be manoni oudo obedo anen kalikame ber. Aso, en eko coko jo atot kikom jo mege kame bin lube di eko ot pwono.
31 #
1 Makabi 7.29-30
Kakame Nikanori oniang kede be Yuda oudo otieko timo ne rieko, en eko ot i tempulo adwong kacil i kare kame josaseredoti oudo tie mino kede giayala, di en eko mino gin cik be miero gin kimie Yuda. 32Do josaseredoti nogo oko waco ne di kikwongere be gin likame kingeo kakame Yuda tie pwono iye. 33Nikanori oko rieno bade tetu cam tetu tempulo di eko kwongere be, “Ka wun likame imianu Yuda bala mabus, ango ayaro reto tempulo ka Rubanga noni piny, di ako tuturo alutari noni, di ango ako gero tempulo ka rubanga Dionisus kanoni.” 34Di do en eko yai eoto, di cucuto josaseredoti oko tango cing gi malo di kiko lego but Rubanga, Ngagwok me ateker gi be, 35“Rwot, bed bala likame tie gimoro kame imito, do in cunyi obedo yom pi cibo tempulo ni kabedo noni tetekeny in ibed i diere wa. 36Aso, nataman Okwe Ngat Kacil, Rwot kacil kalamo, gwok ot noni kame pwodi kolonyo alonya kur kopwoke i kar kede i kar.”
Rasi Oto pi Piny mere
37Ngat acel kikom jotel koudo tie Yerusalem, icuo anyinge Rasi, oko cano kuo mere i kare me yi pi lako piny gi. En oudo icuo kame cunye ber twatwal, omio oudo jo atot ngee bala “papa me Iyudayan.” 38I kare kame bin tim me jemo cakere kede, en eko cano kuo mere pi edini gi me Iyudayan, di oko pide pi kop me lubo edini me Iyudayan. 39Nikanori, pi mito nyuto ading mere kede Iyudayan, oko cwano isirikalen kame kalamo tol kany (500) pi mako Rasi, 40pien oudo etamo be make bino tieko teko me Iyudayan. 41Isirikalen oudo oyapuno mako gedo abor malo kakame Rasi oudo tie iye; oudo kitie mito turo erute kame donyo i diakal, doko oudo kitieko woto dwan be wang ekeko. Rasi oko niang be epone me bwot oudo li, omio eko tamo cobere kene kede epima, 42pi tikatika etoi kede wor akaka neno can i cing jo akwia Rubanga.
43Do pien kare oudo titidi ne, Rasi likame oko cobere kiber, manono omio epima likame oko neke. Aso, kakame isirikalen oudo bwote kede i agola nono, en eko bedo kede nwangcuny di eko ringo i wi apama di eko somo piny i kom jo. 44Jo oko nyiko cen, di en eko poto kakame gin kinyiko kiye nono. 45Di pwodi ekuo, en eko yai ki piny kede wangcuny, di remo kire ki aporeso mege, eko ringo ebeo i dier jo di eko yito i wi lela kame ngete osipere bor malo. 46Remo do oudo otiek atwal atwala ki kome, en eko nyilo amontena mere kede cinge are dedede di eko lwomo i kom jo. Di oudo en etie timo kamanono, en ekwao Rwot amio kuo kede wei, pi dwoko ne jamini me yie nogo. Epone no en kame en eko to kede.
Currently Selected:
2 Makabi 14: BILKDC13
Highlight
Share
Copy
Want to have your highlights saved across all your devices? Sign up or sign in
Baibuli I Leb Kumam © Bible Society of Uganda, 2013.