2 Makabi 12
12
Koneko Iyudayan me Jopa
1Kakame bin kotieko timo kede isikan me mulem, Layasia oko dok but abaka, di Iyudayan oko dok i tic gi me pur. 2Do jopug ace me kabedere apapat, bala Temeseo kede Apoloniasi wot ka Genayu, kede Yeronimu kede Demopon, likame bin oko yei weko gi bedo kede mulem; akadi Nikanori da ngapug me Sipuro bin obedo tero gi i epone nono.
3Jo me Jopa bin oko timo gikarac twatwal ne Iyudayan. Gin kilwongo Iyudayan kame bin bedo kede gi, karacel kede mon gi kede idwe gi pi ot kwango nam kede gin i yede kame gin oudo kikelo, di ineno bala oudo likame kitie kede cuny moro arac i kom Iyudayan. 4Manoni bin jo dedede me bomba oudo oyei be timi, omio Iyudayan oudo likame oko bedo kede gung moro iye. Aso, gin kiko gamo lwongo nono kede cuny aber. Do kakame gin bin kituno kede i dier nam, jo me Jopa oko lwinyo gi i nam, gin dedede jo aromo tol are. 5Kakame Yuda owinyo kede kop me tim arac noni, kame oudo otimo i kom Iyudayan wad gi, en eko mino isirikalen mege cik. 6Gin kiko lego but Rubanga, ngat kame ngolo kop kede ateni, di gin kiko ot suro jonek nogo. Gin kioto iwor di piny col di kiko wango edoket; kiwango imerin dedede, di kiko neneko jo dedede kame bin oringo ot gwokere kunono. 7Di do en eko dok cen pien oudo kotieko cego irutei. Do en oudo etieko moko tam mere pi dok kunono di eko neko jo me Jopa dedede.
8Yuda oko winyo be jo me Jamania da oudo tie kede iik me neko Iyudayan dedede koudo tie i bomba gi. 9En eko ot suro jo me Jamania iwor di eko wango edoket kede imerin koudo tie kunono. Liel me mac kame en ewango kede bomba noni oudo neeno ki Yerusalem, kabedo koudo tie mairo ot adek tenge.
Yi kame Yuda Obwono ki Adul me Gilead
(1 Makabi 5.9-54)
10Kakame Yuda kede Isirikalen mege oudo otieko ot kede kakame romo bala mairo acel, pi koto ot yi kede Temeseo, imwarabun kame romo bala tutumia kany (5,000) koudo tie da kede asigiran tol kany (500) me yi, oko suro gi. 11Yi noni oudo tek twatwal, do Rubanga oko konyo gi di gin kiko bwono Imwarabun. Imwarabun nogi oko ngangao Yuda pi yei timo awotin kede Iyudayan, di kicikere pi mino gi doke, kede pi konyo gi i yote ace apapat da. 12Yuda oko tamo be cengemogo ateteni awotin gi twero konyo gi i yote atot, omio en eko yei winyere kede gi pi bedo me mulem; i ngei en sikano kede gi, imwarabun oko dok i miere gi.
13Yuda oko bobo da suro bomba me Kasipin kame bin kocelo kede apama atek. Jo koudo bedo i bomba nono oudo obedo jo konyanyalun me atekerin apapat. 14Gin oudo kigeno teko me apama me bomba gi pi gwoko gi, kede da oudo kitamo be kitieko coko cam kame romo tieko negi kare kalac ka jokwor oko luko bomba gi. Manono bin oko mino gin kiko bedo kede tim me anywar but Yuda kede isirikalen mege; oudo kiyeyeto gi di kicao Rubanga gi. 15Do Yuda kede isirikalen mege oko lego but Rwot Won Twer me piny lung, ngat kame bin i kare ka Yosua oko reto apama me Jeriko piny abongo tic kede anyul arabo jamini me yi kame koturo kede bomba. Di gin kiko onyaro i apama kede gero atek. 16Pien manono oudo obedo mit ka Rubanga, gin kiko mano bomba di kiko neko jo kame wel gi likame marere, omio nam kame bin iyapiyapi kede kanono, koudo laco mere tie dul moro atitidi me mairo, oko bokere ineno do bala remo oponge di eko lamar.
Yuda Obwono Isirikalen ka Temeseo
(1 Makabi 5.37-44)
17Yuda kede isirikalen mege bin oko yai ki bomba me Kasipin, di kiko ot mairo kame romo ot kanyangon kiwie kany, di kiko tuno kabedo kame kolwongo be Karas, kakame Iyudayan oudo bedo iye, i nget bomba me Tob. 18Do gin likame kiko udo Temeseo kunono, pien oudo etieko yai ki adul nono. Temeseo oudo oyai ki kunono abongo cobo timo gimoro, kwanyo kenekene en oudo eweko kunono ekodet acel atek adwong me isirikalen. 19Jotel are me isirikalen ka Yuda, Dositeu kede Sosipata, oko ot suro ekodet me isirikalen kame Temeseo oudo oweko nono, di gin kiko neko gin dedede isirikalen akalamo tutumia tomon (10,000). 20Yuda oko popoko isirikalen mege i ikodeta apapat di eko yero jo kame telo ikodeta nogo. Gin kiko onyaro wapo Temeseo, ngat koudo tie kede isirikalen me tien tutumia tol acel kede ot are (120,000), kede isirikalen koudo ringo kede asigiran tutumia are kede tol kany (2,500). 21Kakame Temeseo oniang kede be Yuda oudo tie wape, en eko cwano mon kede idwe ooto anyim kede yec i bomba me Karanaim; pien luko kabedo nono oudo tek, doko tuno iye da oudo tek pien yote aoto iye oudo diding. 22Do kakame gin kiko neno kede ekodet ka Yuda me agege, lworo atek oko mako gi pien oudo kineno gianyuta kame Rubanga ngat kame neno gi dedede ocwao. Pi lworo atek, gin kiko dipo ringo kisarakin atatai, di manono oko mino kiwawanun ken gi kede ipimai me jowot gi. 23Yuda kede isirikalen mege oko wapo gi kede teko, di kiko neko jo kame romo tutumia ot adek (30,000). 24Isirikalen ka Dositeu kede Sosipata oko mako Temeseo da kikome. Do eko ngolo rieko di eko kwano gi be kur kitim ne gimoro, be pien joawade gi atot oudo tie mabus mege, aso ka gin kineke, kobino neko joawade gida. 25Aso, i ngei en cikere be ebino gonyo joawade gi abongo timo negi gimoro arac, gin kiko weke eoto.
Yuda Obwono Yi ace
(1 Makabi 5.45-54)
26Di do Yuda oko ot suro Karanaim kede tempulo me rubanga Ateregati, di eko neko jo tutumia ot are kiwie kany (25,000) 27kede eko tuturo bomba karacel kede tempulo. Di bobo eko ot suro bomba me Epuron, bomba kame oudo kocelo kitek, kakame Layasia oudo bedo iye karacel kede jo me atekerin dedede. Awobe atek oudo cungo i nyim apama pi dare kede teko dedede, doko jamini apapat me yi oudo tie i yi bomba kunono. 28Do Iyudayan oko lego but Rwot pi konyo gi, en ngat kame emuducaro teko me jokwor. Di gin kiko mano bomba di kiko neko jo aromo tutumia ot are kiwie kany (25,000). 29Gin kiko yai ki kuno di kiko onyaro i bomba me Bet San, kame bin tie mairo ot kanyaare kiwie kany yai ki Yerusalem. 30Iyudayan me kunono oko waco ne Yuda kite kame jo me bomba nono oko tero gin kede tim me mwolo i kare me peko. 31Aso, Yuda kede isirikalen mege oko pwono jo me bomba nono di kikwao gi pi nyuto tim acel me bero nono but Iyudayan i kare me anyim da. Di gin kiko yai kioto Yerusalem, di kiko tuno kunono di Ebaga me Kac oudo onoko.
Yuda Obwono Gorogia
32 #
Yai 23.16
I ngei Pentekoti,#12.32 Manono en Ebaga me Kac. Yuda kede isirikalen mege oko ot awakawaka pi yi kede Gorogia, ngapug me Idumea, 33ngat kame bin oko bino pi yi kede gi kede isirikalen me tien tutumia adek (3,000), kede isirikalen tol ongwon (400) kame ringo kede asigiran. 34Kakame gin kiko yi kede, Iyudayan mogo anonok oko to i yi nono. 35Di do Eyudayat moro kame bin yai ki bomba me Tob, icuo kame nyinge oudo Dositeu, koudo tek i yi me isirikalen kame ringo kede asigiran, oko mako ekanso ka Gorogia di eko cako pere kede tetek, di oudo etie kede tam me tero icuo arac nono di ekuo. Do sirikale moro kame bin yai kikom isirikalen me Turakon koudo ringo kede asigiran, oko ngole di eko ringo i kom Dositeu di eko tongo bade tel. Di Gorogia oko bwot eringo i bomba me Marisa.
36Isirikalen me Iyudayan kame bin Esidiris telo oudo obedo yi pi kare kalac omio oudo kiol. Aso, Yuda oko kwano Rwot pi nyuto be, en Rwot oudo etie kede gi, doko oudo etie telo isirikalen gi. 37Di Yuda oko cako wero were me yi i leb joakwari mege, di Iyudayan oko ngeso suro Gorogia kede isirikalen mege di kiko mino gi kiringo.
Ilega pi Jo kame Koneko i Yi
38Di Yuda oko coko isirikalen mege karacel di en eko ot kede gi i bomba me Adulam. Bala kame oudo ceng Sabato tie tuno kede, gin kiko lonyere bala kame itok me Iyudayan mito, di kiko gwoko Sabato ki kunono. 39I ceng kame lubo mere, Yuda kede isirikalen mege oko ot raro kom isirikalen gin kame oudo koneko i yi tetekeny kiyik gi i atesin me diakale gi. 40#Iswilia 7.25Do i esati me ngato acelacel, gin kiko udo kokano iye caljwogi kame bin tie i tempulo koudo tie Jamania. Akodi ginogi Iswil oudo likame yei ne Iyudayan ngapo. Manono oko mino jo dedede oniang gi komio jo nogo oko to i yi. 41Aso, gin kiko pako Rubanga pi yote mege, en ngangolkop me ateni, ngat kame nyuto kakaler gikame opwono, 42di gin kiko ngangao en be koto ewearo dub kame oudo kotimo nono dedede tenge. Di Yuda, dano me awora nono oko kwano jo pi gwokere ki dub, pien gin oudo kitieko neno kede wang gi, gi koudo oko timere pi dub me jo oto nogo. 43Yuda oko raro da kibut isirikalen mege sente me siliba aromo kilo are, di eko cwano Yerusalem pi bedo bala cul me giayala me kwanyo dub. En oudo etimo gikame pire tek noni piento en eyei be Rubanga yaruno jo oto. 44Ka en oudo likame eyei be jo oto nogo bino yaruno bobo, koto oudo lego pirgi tie gi me mingo doko koto kony mere li. 45Do en oudo etie kede yei atek be jo agenere but Rubanga bino udo giamia me pwoc. Manono en komio en eko timo iik me giamia me kwanyo dub, tetekeny kokwany dub me jo koudo oto nogo.
Currently Selected:
2 Makabi 12: BILKDC13
Highlight
Share
Copy
Want to have your highlights saved across all your devices? Sign up or sign in
Baibuli I Leb Kumam © Bible Society of Uganda, 2013.