Marcos 9

1Jesus rimasa katirka:

—Alita uyawaychi. Maykankuna kankunamanta chayra mana wañusa Dios kay allpapi hatun ushaywa mantanata kallariskata rikunkichi.—

Jesus chiwlla rikuri tukuskamanta

(Mt. 17.1-13; Lc. 9.28-36)

2Sukta punchawasha Jesus Pedrota, Santiagota, Juantapas pushasa paykunallawa shu hawa urkuma sikarka. Paykuna rikuranakupi Jesus shu laya rikuri tukurka. 3Paypa churana chiwlla rikurirka, yuraklla tukurka. Mana pi kay pachapi chasna yurayachinata ushanakun. 4Chayllapita kinsa Jesuswa riskakuna kunkaymanta rikunakurka Dios rimaskata kwinta ñupa uras kawsa runakuna Moises Eliaspas Jesuswa kwintariranakuskata. 5Pedro chayta rikusa nirka:

—Yachachikama, alimi kaypi sakirinkapa. Kinsa tamputa rurashu, kanpa shukta, Moisespa shukta, Eliaspa shukta.—

6Chay kinsa Jesuswa riska pay yachachiskata katikamakuna yapa manchariska kanakurka. Chayrayku Pedro ima rimaraskata mana yacharkachu.

7Kunkaymanta shu puyu rikurisa paykunata llantuyachirka. Puyumanta shu shimi uyarirka kasna:

—Kaymi ñuka llakiska churi, payta uyana kankichi— nisa.

8Chasnapi Jesus yachachiskata katikamakuna muyukta rikunakusa Jesus sapalla shayaraskata rikunakurka. Moises Eliaspas illanakurka. 9Urkumanta uraykuranakupi Jesus paykunata nirka:

—Dios mantamuska runa wañuskamanta kawsarinakama, ama pitapas kuna rikuskata kwintaychichu.—

10Jesus chasna rimaskata kasusa mana pita kwintanakurkachu. —Dios mantamuska runa wañuskamanta kawsarinakama— nisa Jesus rimaskamanta paykunapura tapurinakurka:

—Imatachari chaywa rimanayan— nisa.

Dios rimaskata kwinta ñupa uras kawsa Eliasshina runa ña shamuskamanta

(Mt. 17.10-13)

Pedro, Santiago, Juan ñupa uras kawsa Elias rikuriskata rikunakurka, urkupi Jesuswa kwintaskata. Dios rimaskata kwinta runa Elias rikuriskawasha mana allpapi sakiriskata rikunakurka. Dios mantamuska kishpichi runa Jesusrayku alichinkapa Elias mana sakirirkachu. 11Chasna kapi Jesusta tapunakurka:

—Imaraykuta Dios ñupa uras killkachiska killkata kutillata killkakamakuna rimanakun: —Dios mantamuna kishpichi runa manara shamupi ñupa uras kawsa Eliasshina runa shamuna kan, Dios rimaskata kwinta— nisa.—

12Jesus kutipasa nirka:

—Shuti, Eliasshina runa Dios mantamuna kishpichi runa ñupakta shamuna kan runakunata yachachisa yanapankapa paykunata kishpichi runa paktamunarayku paykunapa kawsayta alichinkapa. Ranti chay Eliasshina runa tukuyta alichinkapa yanapapika imarayku Dios ñupa uras killkachiskapi killkariska kan:

Dios mantamuna runa yapa ñakarina kanka, runakunamanta mana balichi tukuna kanka nisa.

13Eliasshina runamanta ñukaka kankunata rimani: Pay ña shamuskami. Runakuna paywa piñarisa mana ali munaskata paywa ruranakurka. Chasnami Dios ñupa uras killkachiskapi Eliasshina runamanta killkaska kan.—

Shu wampramanta Jesus supayta hichuskamanta

(Mt. 17.14-21; Lc. 9.37-43)

14Jesus pay yachachiskata kinsa katikamakunawa kuti sakiriskakunapama rinakurka. Paykunama paktaraskapi achka runa paykuna muyukta kanakuskata rikunakurka. Dios ñupa uras killkachiska killkata kutillata killkakamakunamanta maykankuna chaypi kanakurka. Sakiriska Jesus yachachiskata katikamakunawa piñarisa rimariranakuskata rikunakurka. 15Jesus kunkaymanta paktamurata rikusa runakuna kushiyasa paypama kallpanakurka —ña paktamurkankichu— nisa. 16Jesus paykunata tapurka:

—Imamantata rimarirarkankichi.—

17Chay runa bulamanta shu nirka:

—Yachachikama, ñuka churita pushamurkani. Supay amuyaska kasa mana kwintanata ushan. 18Chay supay payta allpapi urmachin. Shimimanta putskuta llukshichin. Kiruta kanirichin. Wañuskashina sakichin. Chasna kapi kan yachachiskata katikamakunapama pushasa mañarkani supayta llukshichinkapa. Mana ushanakurkachu.—

19Chasna rimapi Jesus nirka:

—Ñukawa mana sinchiku runakuna, ima uraskamata ñuka kankunamanta ñakarisa kankunawa kawsana kani. Supay amuyaska kari wamprata kayma pushamuychi.—

20Chay wamprata pushamunakurka. Jesusta rikuskallapi supay chay wamprata sinchita kuchpachisa allpapi urmachirka. Chay wampraka allpapi kuchparipi shimimanta putsku llukshirka. 21Jesus chay wamprapa yayata tapurka:

—Ima urasmanta chasna tukurka.—

Yaya kutiparka:

—Wawa urasmanta. 22Supay maykan kuti ninapi yakupipas payta wañuchinayasa urmachin. Chasna kapi kan ushasaka ñukanchita yanapay. Ñukanchimanta llakiripay.—

23Jesus nirka:

—Imarayku —kan ushasaka— nisata niwanki. Dioswa sinchiku runarayku ñuka tukuyta ushani ruranata.—

24Chayta uyasa, chay runa kaparisa nirka:

—Dioswa sinchikuranimi, ñukata yanapaway astawa sinchikunkapa.—

25Jesus runakuna ña munturiraskata rikusa supayta nirka:

—Supay, kay wamprata mana uya mana kwintata rura, kanta rimani: Kay wampramanta llukshi. Paypapi ama kuti yaykunkichu.—

26Supayka chay wamprata sinchita kuchpachisa, kaparisa llukshirka. Wampra wañuskashina sakirirka. Chasna rikuripi maykankuna —wañuskami— rimanakurka. 27Ranti Jesus wamprata paypa makimanta hapisa hatachipi shayarirka.

28Jesus wasima yaykuskawasha pay yachachiskata katikamakunawa sapalla sakirinakuskapi paykuna Jesusta tapunakurka:

—Imaraykuta ñukanchi supayta hichunata mana usharkanchichu.—

29Jesus kutipasa nirka:

—Chay laya supaykuna Diosta mañaskallawa hichurinmi.—

Jesus pay wañuna kaskata kwintaskamanta

(Mt. 17.22-23; Lc. 9.43-45)

30Wampramanta supayta hichuskawasha Jesus pay yachachiskata katikamakunawa chaymanta llukshinakurka. Galilea allpapi tiya llaktakuna mayata purisa pasanakurka. Jesus mana munarkachu runakuna pay pasaraskata yachankapa. 31Pay yachachiskata katikamakunata yachachinata munarka. Chasnapi paykunata rimarka:

—Dios mantamuska runa kapi ñukata hapichiwanakunkami. Piñari runakunama kuy tukusha. Ñukata wañuchiwanakunka. Kinsa punchapika kawsarishami.—

32Paykuna mana yachanakurkachu Jesus imata rimanayaskata. Chasna kasapas tapunata manchanakurka.

33Capernaum llaktama paktanakurka. Wasipi kasa Jesus pay yachachiskata katikamakunata tapurka:

—Imata ñampipi kwintarirarkankichi.—

34Paykuna chunlla tukunakurka. Ñampipi kwintariranakuska karka —mayka paykunapuramanta shukunamanta yali pasa kanka— nisa. 35Chasna kapi Jesus tiyarisa chay chunka ishkayta rimarka:

—Tukuymanta yali pasa tukunata muna runa tukuykunamanta yali mana balishina tukuchu. Tukuykunata yanapa kachu— nisa.

36Jesus shu wawata kayasa pay yachachiskata katikamakunapa ñupapi shayachirka. Chay wawata ukllarisa paykunata rimarka:

37—Ñukaparantimanta kasna wawata chaski runa ñukata chaskinmi. Ñukata chaski runaka ñukata mantamuska Yaya Diosta chaskin.—

Supayta hichukama runamanta kwintarinakuskamanta

(Mt. 10.42; Lc. 9.49-50)

38Juan Jesusta nirka:

—Yachachikama, shu runata tuparkanchi, kanparantimanta supaykunata hichurarka. Chay runata nirkanchi —ama chasna raychu— nisa mana ñukanchi bulamanta kaskarayku.—

39Jesus kutiparka:

—Ama chasna rura runata rimaychichu —supayta runakunamanta ama hichunkichu— nisa. Ñukaparanti hatun ushaywa raskata ra runaka ñukawa mana piñarinkachu. 40Ñukanchiwa mana piñarika ñukanchi partimanta kan. 41Maykan runapas kankunata ñukaparanti shu basu yakullatapas upyachipi ñuka Dios mantamuska kishpichi runa kankunapa amu kaskamanta, chay runata Dios manami kunkarinka. Alita uyawaychi. Chasna yanapa runata Dios kushiyachinkami pay ruraskamanta.—

Huchata rurankapa munachi runamanta

(Mt. 18.6-9; Lc. 17.1-2)

42Jesus pay ukllariska wawata rikuchisa nirka:

—Maykan runapas kay wawashina ñukawa sinchiku runakunamanta shu runata huchama aysan, yapa ñakachisa kastigay tukunkami. Chay laya runapa kastigu paypa kunkapi hatu rumita warkuchisa hatun kuchama shitay tukunamanta yali sinchi kanka. 43-44Kanpa maki kanta huchata rurachinayapi, chay makita piti. Pullu maki hawapachama yaykuna Dioswa chikapa kawsankapa yali ali kanka, ishkay makiyu ukupachapi mana wañu nina kaskama rinarantimanta. 45-46Kanpa chaki kanta huchata rurachinayapi chay chakita piti. Pullu chaki hawapachama yaykuna Dioswa chikapa kawsankapa yali ali kanka ishkay chakiwa ukupachapi mana wañu nina kaskama rinarantimanta. 47Kanpa ñawi kanta huchata rurankapa rikuchipi chay ñawita surkusa hichuy. Hawapachama, Dios tukuypa apu kaskama shuklla ñawiyu rina yali ali kanka ishkay ñawiyu ukupachama rinarantimanta. 48Ukupachapi runapa aychata miku kuru mana wañunchu. Manchaypa ninapas mana wañusa tukurinchu.

49Runakuna Diosma kuska aychakunata kachiwa mishkiyachiskashina tukuy kankuna ñakarinakuna pasaripi ninawashina alichi tukunkichimi. 50Kachi alimi kan. Kachi upayapi ni pi mana ushankachu kutillata mishkiyachinkapa. Kankuna ali kachita charikshina ali yuyayta rikuchisa runakuna chupipi kawsaychi. Kankunapura ganaslla kawsaychi.

Currently Selected:

Marcos 9: BKN

Highlight

Copy