Marcos 5

Gerasa runa ukumanta Jesus supaykunata llukshichiskamanta

(Mt. 8.28-34; Lc. 8.26-39)

1Galilea kuchata chimpasa Jesus pay yachachiskata katikamakunaynti Gerasa niska pampama paktanakurka. 2Paktasa Jesus botimanta llukshiskapi supay amuyaska runa Jesuspama shamurka. Chay runa wañuskakunata churay tukuska urku hutkukunamanta llukshisa Jesuspama mayayarka. 3Pay kawsa kaska wañuskakunata churay tukuska rumi hutkukunapi. Waklichisa puriraskapi mana pi usharkachu payta harkanata. Hapisa kadenakunawa watasapas mana charipa karka. 4Achka kuti payta kadenakunawa watanakuska karka. Hirumanta raku anillukuna makipi chakipi churasa hapinakuska karka. Chasna kallapita kadenakunata piti piti rasa llukshirka. Hirumanta raku anillukunatapas paki paki rasa kishpirka. Mana pi payta hapisa charinata usharkachu. 5Tutaynti punchaynti runa wañuskakunata churay tukuska rumi hutkukunapi chay mayapi kaska urkukunapipas manchaypa layata uyachisa puri karka. Rumikunawa amullata waktarisa kuchu kuchu rasa purirarka. 6Karumanta Jesusta rikusa kallpamusa paypapi kunkurirka. 7Manchaypata kaparisa rimarka:

—Tukuymanta yali Diospa Churi Jesus, ay manapacha imata ñukawa ruranayanki. Dios Yaya llakichi kaskarayku kanta mañani: —Ama ñukata ñakachiwaychu.—

8Jesus chay supayta ña rimaraska karka:

—Hirus supay, kay runamanta llukshi— nisa.

9Kuna payta tapurka:

—Ima shutita kanki.—

Tapupi kutiparka:

—Ñuka shutika Hatun Bulami, yapa achka kaskamanta.—

10Chaypi kuti kuti Jesusta mañaranakurka:

—Kay ñukanchi kawsaraska allpamanta ama ñukanchita hichunkichu— nisa.

11Chay uras mana karunayashtupi shu achka kuchi bula shuk urku waykupi mikuranakurka. 12Chay kuchikunata rikusa chay supaykuna Jesusta mañanakurka:

—Ñukanchita mantay kuchikunapi yaykunkapa.—

13Jesus alimi nipi supaykuna chay runa ukumanta llukshisa kuchikunapi yaykukrinakurka. Chasnapi chay ishkay waranka tupu kuchikunaka urkumanta kallpasa yakuma shitarisa chukallisa wañunakurka.

14Chayta rikusa kuchita kuyrakuna kallpasa llaktama rinakurka. Kallpa riraskapi tukuy partipi, ichilla llaktakunapi, hatun llakta ukupipas, tukuy ima pasaskata kwintanakurka. Uya runakunaka kallpa rikukrinakurka shutipachu kuchikuna chinkarinakuska manachu nisa. 15Jesuspama paktasa chay supaykunamanta kishpichi tukuska runata Jesuswa parihu tupakrinakurka. Chay Jesus aliyachiska runa kunkaylla tiyaraskata riku shamunakurka, ali churariska kaskata. Ali yuyayuta tupa shamunakurka. Chayta rikusa yapa manchanakurka. 16Chay supaykuna yaykunakuska runawa, kuchikunawapas pasaskata rikusa runakuna chay paktaska runakunata tukuyta kwintanakurka. 17Chayta uyasa chay runakuna Jesusta mañankapa kallarinakurka:

—Kaymanta llukshipay— nisa.

18Mañanakupi uyasa Jesus kuti botima rirka. Botipi Jesus yaykurapi chay supaykunamanta kishpichi tukuska runaka payta mañarka:

—Pushaway— nisa.

19Mana munasa Jesus chay aliyaska runata nirka:

—Kanpa wasima ri. Kanpa ayllukunata kwintakri Dios kanta yapa llakisa kanpa alipa ruraskata.—

20Chasna nipi chay runa wasima rirka. Chaywasha chay allpapi tiya Chunka Llaktakunama#5.20 Griego shimipi Decapolis nin. Decapolis runa shimima pasachipi ninayan chunka llaktakuna. risa kwintarka Jesus payta aliyachiskamanta. Chasna chay aliyaska runa kwintapi tukuy uyakuna mancharinakurka.

Jairopa ushushita Jesus kawsachiskamanta, unkuska warmitapas hampiskamanta

(Mt. 9.18-26; Lc. 8.40-56)

21Jesus Galilea kucha chimpa partima kuti paktamupi achka runakuna kucha mayapi muyukta paywa munturinakurka. 22Chasnapi Jairo shutiyu runa paypama shamurka. Jairo chay llaktapa Diospa shimita yachana wasita rikukamakunamanta shu rikukama karka. Jairo rikuraska Diospa shimita yachana wasi Galilea kuchamanta mana yapa karupi karka. Jairo kucha mayama risa Jesusta rikurka. Hatun aputashina yuyarisa paypa ñupapi kunkurirka. Allpakama kumurisa mañarka:

23—Ñuka ushushi wañurapami. Utkalla shamupay. Kanpa makiwa payta llankapika aliyasa kawsankami.—

24Chasna mañapi Jesus paywa rirka. Achka runakuna tankasa tankasami katiranakurka.

25Jesuswa parihu puri runa bula ukupi shu unkuska warmi rirarka. Chunka ishkay watata yawar talirisa kawsa karka. 26Hampikamakunama purisa kawsarka. Hampikamakuna —kanta hampisha— nisa chay warmi tukuy laya ruraskakunawa ñakariska. Chasna puriskapi achkata pagasa tukuy chariskata tukuchirka. Ranti mana aliyarkachu. Astawa astawa tukusa wañunayarkami. 27Chay warmi manara runa bula ukupi kasa Jesusmanta kwintanakuskata uyarka. Chasna kasa Jesuswa tuparikrinkapa rirka. Paktasa achka runa chupipi Jesusta katirka. Washamanta Jesusma mayayarisa paypa churanata llankapi Jesus yawar taliri warmirayku hatun ushaywa raskata rarka.#5.27 Lev. 15.19 Yawar taliri warmi mana usharkachu Diosta mañana wasipi yaykunkapa. Chay laya warmiwa tupari runapas chay puncha mana usharkachu Diosta mañana wasipi yaykunkapa. 28—Jesuspa churanata llankasallata aliyashami— nisa chay warmi yuyarirka. 29Llankapi paypa yawar talirinata sakirirka. Tukuy aycha aliyaskata yacharka. 30Chasnallapi Jesus paypa ushaymanta ushay llukshiskata yachasa washama rikusa tapurka:

—Pita ñukapa churanata llankarka.—

31Pay yachachiskata chunka ishkay katikama runakuna kutipanakurka:

—Runakuna tanlla riraskapi puriranchi. Imasna tapunki —pita llankawarka— nisa.—

32Ranti Jesus muyukta rikurasa katirka —pimi llankawarka— nisa. 33Chasna Jesus rikurapi Jesusta llankaska warmi hampiriskata yachasa manchaywa chukchurirka. Jesuspa ñupapi kunkurikrirka. Chasnapi Jesusta tukuy imasna kaskata pay raskatapas kwintarka. 34Chay warmi kwintapi Jesus payta nirka:

—Llakiska panishtulla, ama manchaychu. Kan ñukawa sinchikuskarayku hampirirkanki. Kushilla ri. Tukuy kan ñakariskamanta kishpichi tukuska kanki.—

35Jesus chayra rimarapi chay rikukama Jairopa wasimanta mantaska runakuna shamuranakurka. Paktamusa Jairota rimanakurka:

—Kanpa ushushi ña wañuskami. Yachachikamata ama astawa killachinkichu.—

36Jesus paykuna rimanakuskata uyasa Jairota rimarka:

—Ama manchaychu, ñukawa sinchikuylla.—

37Chasnapi paywa rira runa bulata —kaykamalla ñukawa rinkichi— nisa Jesus pay yachachiskata kinsa katikamakunallawa Jairowa rirka. Pedrota, Santiagota paypa wawki Juantapas Jesus pushasa rirka. 38Ña chay rikukama Jairopa wasima paktanakuskapi Jesus rikurka achka runakuna karanma puriranakuskata. Sinchi kaparisa wakaranakuskata uyarka. 39Wasima yaykusa Jesus paykunata rimarka:

—Imarayku chasna karanma purirasa wakarankichi. Kay wawa mana wañuskachu, puñuranmi.—

40Chasna rimapi chay runakuna Jesusta asinakurka. Ranti Jesus paykunata llukshichisa paywa shamuskakunallawa wañuska wawa siriraskama yaykurka. Wawapa yayata mamatapas ukuma pusharka. 41Wawata makimanta hapisa payta rimarka:

—Talita kumi.— Chay ninayan: Ushushi hatari.

42Jesus rimaskallawa wawa hatarisa purinkapa kallarirka. Chunka ishkay watayu karka. Tukuy rikukuna kushiyasapas yapa mancharinakurka. 43Jesus paykunata sinchi shimiwa rimarka:

—Ama pitapas kay pasaskata kwintaychichu. Kunaka wawata karaychi.—

Currently Selected:

Marcos 5: BKN

Highlight

Copy