Marcos 10
10
Shu kari paypa warmita hichuna killkamanta
(Mt. 19.1-12; Lc. 16.18)
1Capernaum llaktamanta llukshisa Jesus Judea partima paktarka, Jordan yaku chimpa partima. Achka runa kutillata ñampipi munturinakupi Jesus tukuy uras ruraskashina chay runakunata yachachirka. 2Jesus chaypi paktaskata yachasa Fariseo bulamanta runakuna mayayasa payta kamasa tapunakurka:
—Shu runa paypa warmita hichunkapa ushankachu.—
3Jesus kutipasa nirka:
—Moises imata kankunata rimarka.—
4Paykuna kutipanakurka:
—Moises nirka: Shu kari paypa warmita hichunayasa warmita apukuna ñupapi hichuna killkata kusa hichuna usharin nisa.—
5Jesus paykunata nirka:
—Moises kawsaska uras kankunashina mana uyanaya runakunarayku chayta rimarka. 6Chasna kapipas Dios kay pachata ruraska urasmanta kan imana Dios killkachiska killkapi#Génesis 1.27 rimaskashina kasna:
Dios runata rurarka kari warmi kankapa nisa.
Kasnapas riman#Génesis 2.24:
7Dios warmita karipa aychamanta ruraskarayku
shu kari warmiyu tukusa
paypa yayata mamata sakisa
paypa warmiwa llutarinmi.
8Chasna ishkayntimanta shukllashina tukunakunka nisa.
Ña mana ishkaychu kanakun, ranti shukllashina kanakun. 9Chasna kapi Dios llutachiskata runa ama llushpichichu— Jesus rimarka.
10Ña wasima ripi pay yachachiskata katikamakuna Jesusta rimaskamanta kutillata tapunakurka. 11Jesus paykunata nirka:
—Maykan karikunapas kikin warmita hichusa shu warmiwa llutarisa kikin warmita mana alita ran mana payllawa sakiriskarayku. 12Chasnallata warmikunapas kikin karita hichusa shu kariwa llutarisaka kikin karita mana alita ran mana payllawa sakiriskarayku.—
—Dios kankunata alita kuyrachu— Jesus wawakunata niskamanta
(Mt. 19.13-15; Lc. 18.15-17)
13Maykan runakuna paykunapa wawakunata Jesuspama pushanakurka —kanpa makita paykunapa hawapi churapay— nisa. Ranti Jesus yachachiskata katikamakuna chay wawayu runakunata piñanakurka. 14Chayta rikusa Jesus piñarisa rimarka:
—Wawakuna ñukapama shamunata ama harkaychichu. Wawakunashina yuyayu runakunallami Dios amuyaska runa tukunata ushanakun. 15Alita uyawaychi. Maykan runa mana wawashina Dioswa mana sinchikunchu chay runaka mana nima uras Dios amuyaska runa tukunata ushankachu.—
16Chasna rimaskawasha Jesus wawakunata kayarka. Paykunata markasa makita hawapi churasa —Dios kankunata alita kuyrachu— nisa rimarka.
Achka kullkita chari runamanta
(Mt. 19.16-30; Lc. 18.18-30)
17Jesus wasimanta llukshisa Jerusalen llaktama ñampita purisa rinkapa rahuskapi shu runa kallpasa shamurka. Jesus ñupapi kunkurisa payta tapurka:
—Ali yachachikama, imata ruranata kani chikapa Dioswa kawsankapa.—
18Jesus kutipasa nirka:
—Yuyanki —ali yachachikama— nisa kan rimaskawa imata ñukata niwanki. Shukllami ali kan, chaymi kan Dios. 19Kanka runa paktachinkapa Dios rimaska kamachina shimikunata yachanki:
Runata ama wañuchinkichu.
Ama shuk runapa warmiwa satirinkichu.
Ama shuwankichu.
Ama shumanta llullasa rimankichu.
Ama shukunata llullachinkichu.
Kanpa yayata mamatapas balichisa kawsay.—
20Chayta uyasa chay runa kutipasa nirka:
—Yachachikama, tukuy chayta ñuka wampra urasmanta paktachimuni.—
21Chayta uyasa Jesus llakiskawa paypama rikusa nirka:
—Chayra kan rurankapa pishin: Tukuy kan chariskakunata rantichikri mana imayu runakunama kuyankapa. Chasna rasa hawapachapi achka imayushina tukunki. Chaywasha ñukawa shamunki ñuka yachachiskata katikama tukunkapa.—
22Chay runa yapa kullkiyu kasa chay shimita uyasa llakirisami rirka. 23Pay rirapi Jesus muyukta rikusa pay yachachiskata katikamakunata rimarka:
—Yapa kullkiyu runarayku Dios amuyaska runa tukunkapa mana yapa ushaypachu.—
24Chay shimikunata uyasa Jesus yachachiskata katikamakuna yapa mancharinakurka. Jesus kutillata nirka:
—Churikuna, Dios amuyaska runa tukunkapa mana chasnalla ushaypachu. 25Achka kullkita chari runa Dios amuyaska runa tukunata mana ushaypa. Hatun wiwa kamellu niska aguha hutkuta pasana yali ushaypa kan.—
26Paykuna chayta uyasa astawa mancharisa rimanakurka:
—Chasna kapi ni pi kishpichi tukunata ushanakunkami.—
27Jesus kutipasa nirka:
—Runakunapa mana ushaypa kan. Ranti Dios tukuyta ushan.—
28Pedro chayta uyasa nirka:
—Ñukanchi tukuy chariskata sakirkanchi kan yachachiskata katikama tukunkapa.—
29-30Chasna rimapi Jesus payta nirka:
—Alita uyawaychi. Maykan runapas kikin wasita, wawkikunata, panikunata, turikunata, ñañakunata, mamata, yayata, churikunata, allpakunatapas sakin ñuka yachachiskata katikama tukunkapa, ñukamanta kushi shimita yachachisa purinkapapas, chay runa sakiskamanta yalikta kuy tukunkami. Kay pachallapita chayra kawsaraskapi chay laya runa imakunata ayllukunata sakiskamanta yalikta kuy tukunka: wasikunata, wawkikunata, panikunata, turikunata, ñañakunata, yayakunata, mamakunata, churikunata, ushushikunata, allpakunatapas.
Ranti runakuna kankunawa piñarinakunka. Washa kankuna chaparaska mushu pachapi ña Dios Yayawa chikapa kawsakrinkichi. 31Ranti kuna punchakuna achka runakuna tukuy runakunamanta yapa balichiskakuna chay puncha tukuykunamanta mana balichiska tukunakunka. Kuna punchakuna tukuy runakunamanta mana balichiskakuna chay puncha tukuy runakunamanta yali balichiska tukunakunka.—
Pay wañuna kaskata Jesus kutillata kwintaskamanta
(Mt. 20.17-19; Lc. 18.31-34)
32Jerusalen llaktama sikasa puriranakuskapi Jesus pay yachachiskata katikamakunata ñupasa rirarka. Paykuna imata yuyarinkapa mana yachasa Jesusta katinakurka. Paykunawa rira runakuna manchaywa kanakurka. Jesus chunka ishkayta chikanma kayasa pay pasana kaskata kwintarka:
33—Uyawaychi. Kankuna rikunkichi Jerusalenma riranchi. Chaypi Dios mantamuska runa hapi tukuska kashami. Pakrikunapa apukunama, Dios ñupa uras killkachiska killkata kutillata killkakamakunamapas kuy tukushami. —Kan wañuchi tukuna kanki— nisami ñukata rimawanakunka. Ñukata mana Israel runakunama kuwanakunka. 34Ñukata asisa pukllachiwanakunka. Ñawipampapi tyukawanakunka. Liwachiwanakunka. Wañuchiwanakunka. Chasna kapipas kinsa punchawasha kawsarishami.—
Zebedeopa churikuna Jesus paykunata hawapachapi paypa mayapi tiyarichinkapa mañanakuskamanta
(Mt. 20.20-28)
35Zebedeopa ishkay churikuna, Santiago Juanpas, Jesusta mayayasa rimanakurka:
—Yachachikama, ñukanchi mañankapa raskata ruranki.—
36Jesus tapurka:
—Ñukamanta imatata munankichi.—
37Paykuna kutipanakurka:
—Kan hatun ushaywa tukuy runakunata manta apu kankapa yaykusa ñukanchita shukta yacha maki partima, shukta lluki maki partima tiyarichisa kanwa parihu apukuna kankapa yaykuchipanki.—
38Chasna mañanakupi Jesus paykunata rimarka:
—Kankuna mañawaskata mana yachankichichu. Ñuka apana laya llakikunata kankunapas apanata ushankichimachu. Ñuka pasana wañuywa kankunapas wañunata munankichimachu.—
39Kutipasa rimanakurka:
—Ushanchimi, munanchimi.—
Chasna rimapi Jesus nirka:
—Shutipacha, ñuka apana laya llakikunata kankunapas apankichi. Ñuka pasana wañuyllawa kankunapas wañunkichimi. 40Ranti, ñuka yacha maki partima tiyarikunata, ñuka lluki maki partima tiyarikunata ñuka mana maskanachu kani. Ñuka Yayalla paykunata maskanka.—
41Jesus yachachiskata shu katikamakuna uyasa Santiago Juanpas Jesusta mañaskata paykunawa piñarinkapa kallarinakurka.
42Jesus tukuy paykunata kayasa nirka:
—Kay pachapi kawsa apukuna runakunata sinchita mantasa kawsanakun. Apukunata yanapa apukunapas runakunata imatapas mantasa ñakachinakun. 43Kankunapura mana chasna kawsana kankichi. Ranti maykanpas kankunamanta manta apu sakirinayan, tukuykunata yanapa kachu. 44Maykan shu runakunamanta yali kanata muna kan, chay runa tukuykunata uyasa mantay tukusa kawsachu. 45Ñuka Dios mantamuska runa kasapas mana shamurkanichu runakuna ñukata uyasa yanapasa kawsankapa. Ranti runakunata yanapankapami shamurkani. Huchata rasa kawsanakuskamanta achka runakunata kishpichisa amuyankapa wañushami. Ñuka kawsay chay runakunapa dibita paganarayku kanka.—
Jesus Bartimeo shutiyu ñawsa runawa tupariskamanta
(Mt. 20.29-34; Lc. 18.35-43)
46Jesus pay yachachiskata katikamakunawa puriraskapi Jerico llaktama paktanakurka. Chay llaktamanta llukshiranakuskapi achka runakuna paykunawa rinakurka. Ñampita riranakuskapi ñawsa runata rikunakurka. Bartimeo shutiyu karka. Timeopa churi karka. Ñampi mayapi kullkita mañasa tiyararka. 47Runakuna kwintariraskata uyasa ñawsa runa yacharka Jesus Nazaret runa shamuraskata. Chayta yachasa kaparirka:
—Davidpa miray Jesus, ñukanchi chapaska kishpichi runa, ñukamanta llakiripay.—
48Maykankuna payta piñanakurka:
—¡Amipa kaparinki! Upallay— nisa.
Ranti payka yali sinchita kaparirka:
—Davidpa miray ñukanchi chapaska kishpichi runa, ñukamanta llakiripay.—
49Jesus chay kapariskata uyasa puriraskamanta chayllapi shayarirka. Paypa mayapi kaskakunata nirka:
—Ñawsa runata kayaychi.—
Uyasa payta kayakrinakurka:
—Sinchikuy. Shayari. Jesus kanta kayaran.—
50Chay ñawsa runa chayta uyasa hawa churariskata allpama shitarka. Pawarisa hatarisa Jesuspama shamurka. 51Paktapi Jesus payta tapurka:
—Imatata ñuka kanrayku rurankapa munanki.—
Ñawsa runa kutiparka:
—Yachachikama, ñuka ñawita aliyachipay. Ñuka mushumanta riku tukunayani.—
52Jesus payta nirka:
—Rilla, kan ñukawa sinchikuskamanta aliyaska kanki.—
Chay urallapi riku tukurka. Chasna tukusa Jesusta katisa rirka.
Currently Selected:
Marcos 10: BKN
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.
