Marku 9

1Anga ua ambela, uixi: Ngi mi ambela kidi, bhenhabha sai-bhu athu emana-bhu, ka ka lola kalunga kate kia ka mona o Utuminu ua Nzambi iu uiza ni kusina.

Jezú u kituluka ku Mulundu

(Matesu 17.1-13; Luka 9.28-36)

2Kia bhiti izuua isamanu, Jezú u katula Phatele ni Tiiaku ni Nzuá, anga uia-nâ ku mulundu ua di leka, ubheka ua. Muene anga u kituluka bhu pholo ia. 3O izuatu iê i benha ni kuzela kuavulu, kana musukudi mu ngongo u tena kuzelesa kiokio. 4Maxibulu kitatuʼ iki a mono kua a tukulukila ni Elija ni Mozé, he a kala mu zuela ni Jezú. 5Phetele anga u kumbulula, u ambela Jezú, uixi: Mesene kia uabha muene etu kukala kunu! Tu tunge-bhu fundu jitatu: Imoxi o iê, imoxi ia Mozé, imoxi ia Elija. 6Kuma Phetele kʼejiia dingi kia zuela, mbata maxibulu ene oso a bhuuama ni uoma.

7Anga kuiza dituta, dia a vungina ene oso; mu dituta anga mu tunda dízui, dʼixi: Muenhu Monʼami nga mu zola! Muene mu mu ívua. 8Muʼanzanzʼomo, kia talesa, kana-bhu dingi muthu, Jezú ngo axala-nê.

9O kia kala mu tuluka ku mulundu, muene ua a tendelela kuma ima ioso ia mono, ka i tangele muthu, kate muene kia ka fukunuka ku ʼalunga.

10Ene, kizuelu kienhiki anga a ki lunda, ni kudibhudisa mudia mba kufukunuka ku ʼalunga kua lombolola kiebhi? 11Anga a mu ibhula, exi: O asoneki, ala kuila kiebhi kuma ki bhinga Elija u dianga kuiza?

12Kuala muene: Kidi kiene, Elija u dianga kuiza, he u bheka ima ioso mu uiukilu ue. Maji a ki soneka-phe kiebhi mu Mikanda ia Nzambi kuma Monʼa Muthu u tokala u bhita mu jiphaxi javulu, ni ku mu tobhesa? 13Nga mi ambela-phe kuma Elija uejile kia; maji ene a mu bhange ioso ia mesena, kala kia mu soneka mu Mikanda ia Nzambi.

Monʼ a diiala ua kate kikonha

(Matesu 17.14-21; Luka 9.37-43a)

14O kieza bhua xedi o jixibulu, a sange kifuẋi kia dikota kia a bhongolokela, ni jimesene ja kulonga o Kitumu, a kuata-nâ jiphata. 15Kithanganʼ okio kifuẋi kioso, kia mono Jezú, a sasumuka, anga a lenga ku mu menekena. 16Muene ua ebhula, uixi: Mua kuata-nâ jiphata jahi?

17Kuala muthu mu kifuẋi, uixi: Mesene, nga ku bhekela monʼami, u mu tale. Uala ni nzumbi ia dibubu, ka tena kuzuela. 18Bhuoso-phe bhu i mu kuatela i mu vunda bhoxi, u thuthuma kifulu, u kokota ku mazu; muthu iu bhele ngohʼú! Jixibulu je nga zuela-nâ kuila a i tundise, ene-phe ka tena.

19Muene u a kumbulula, uixi: Enu tata! Muiji ua kambe o kuxikana, tu kalaʼdi kate bhebhi? Kate bhebhi, ki ngi mi lendukila? Ngi bhekele-nê kunu. 20Anga eza-nê. O nzumbi iaiibha ki ia zubha kumona Jezú, kithanganʼokio i mu sakesa kiaiibha, u di vunda bhoxi, he u mbolomoka ni kuthuthuma kifulu. 21Anga u ibhula tata, uixi: Hanji monʼe ki kia mu mu bhita kiki, thembu ia vulu kia? Uixi: Tunde undenge. 22Sai luavulu i mu vubula mu tubhia, mba mu menha, phala ku mu jibha. Eie-phe, Ngana, se u tena kubhanga kima, tu kuatele henda, u tu kudile. 23Kuala Jezú: Eie se u tena kuxikana! Kuma ima ioso i xikina kua io ua xikana.

24Kithanganʼokio, o tata uavu monʼe u di kola, uixi: Nga xikana, Ngana! Ngi kuatekese mu kukamba kuxikana kuami!

25Jezú kia mono bhuala ku di bhongolola mundu, u kidika o nzumbi iabolo, uixi: Eie u nzumbi ia dibubu, ni uxilu, nga ku tumu: Tunda mu mukutu ua mona iu, nuka dingi u mu bokona!

26O ki ia zubha ku di kola, ni ku mu sanhesa kiavulu, ia tundu. O monʼa diiala anga uila kala uafu; kate athu avulu ambele, exi: Uafu. 27Jezú-phe u mu kuata mu lukuaku, u mu balumuna; o mona anga uimana.

28O kia zubha kubokona mʼonzo, jixibulu ji mu ibhula bhu mbandu, exi: Etu-phe tua lembuela-hi ku i tundisa?

29Kuala muene: Mbutu iíi ia nzumbi, kana dingi ki i tundisa, kikale ngo mu kusamba ni kujila.

Jezú u tanga dingi o kufua ni kufukunuka kue

(Matesu 17.22-23; Luka 9.43b-45)

30Kutunda bhenhobho Jezú ni maxibulu mê a bhita mu Ngalileia. Muene ka mesenene bhu kala muthu u kʼijiia kuila muene ueza. 31Kuma u kala mu longa jixibulu je, uixi: Monʼa Muthu a-nda ku mu bhakula bhu maku ma athu, o ene a-nda ku mu jibha; o kia zubha ku mu jibha, kizuua kia katatu u fukunuka.

32Ene-phe, hundu iíi ia a jinganena, o ku mu ibhula-iu ala ni uoma.

Uoso kola mu Utuminu ua diulu

(Matesu 18.1-5; Luka 9.46-48)

33Jezú ni maxibulu mê anga a bhixila ku Kafanau. O kia zubha kubokona mʼonzo, muene uebhula o kuinhi dia xibulu ni kiiadi, uixi: Phata iahi i mua kuatele mu njila? 34Ene-phe a dixibha. Kuma ene mu njila a kuatele phata ia uoso u kala o dikota. 35Jezú anga u xikama, u ixana o kuinhi ni kiiadi, uixi: Se muthu uandala u kala ku pholo, ki bhinga u sukidila ku dima, u kala ngamba ia akua. 36Anga u katula kamona, u ka bheka bhu ʼaxaxe ka, anga u mu kuata mu maku, uixi: 37Uoso u tambulula kamona mukua ni kaka mu dijina diami, eme-muene ua ngi tambulula. O uoso-phe u ngi tambulula eme, ki eme ngo a ngi tambulula, maji ni Io ua ngi tumu.

Uoso ka tu zembe, ua tu bande

(Luka 9.49-50)

38Nzuá anga u mu ambela, uixi: Mesene, etu tua sangele muthu uala mu tundisa madimonho mu dijina die, etu anga tu mu kidika, mukonda ka tokala mu dianda dietu. 39Kuala Jezú-phe: Kana ku mu kidika! Mukonda kana muthu u tena kubhanga kisuma mu dijina diami, kindala nʼa ngi lungulukila. 40Kuma uoso ka tu zembe, ua tu bande. 41Kuma uoso u mi bhana kunua kopho ia menha mukonda mua tokala Kristu, ngi mi ambela kidi, muenho ka kamba kisakidilu kiê.

O ku di bhalesa mukuenu

(Matesu 18.6-9; Luka 17.1-2)

42Uoso ue ku tuana tutu tua ngi xikana, u bhangesa kamona kamoxi ku di bhala, ni ku ngi xisa eme, muthu io kia mu tokala o ku mu nhenga kiditadi kia kuhuhila mu xingu, ni ku mu bobesa mu ʼalunga. 43Ni lukuaku lue, se lu ku bhangesa ku di bhala, batula-lu! Mbata kota o kubokona ku muenhu ki uábua u kinema, kana o kukala ni maku maiadi anga uia-nâ mu ifernu, mu tubhia ki tuene dingi kujima. [ 44Mua bhingi dibhuka#9.44 O kibamba kiê ki ki fu. die ki di fu, o tubhia tuê ki tu xikina kujima.] 45Ni kinama kiê se kia ku bhangesa ku di bhala, batula-kiu! Kuma ujitu ue kota o kubokona ku muenhu ki uábhua u kinema, kana o kukala ni inama iiadi anga uia-na-iu mu ifernu; [ 46Mua bhingi o dibhuka die ki di fu, o tubhia tuê ki tu xikina kujima.] 47Ni diesu die se di ku bhangesa ku di bhala, lokola-diu! Mukonda ujitu ue kota o kubokona mu Utminu ua Nzambi u mukua diesu dimoxi, kana o kukala ni mesu maiadi, kuia-nâ mu ifernu. 48Mua bhingi dibhuka die ki di fu, o tubhia tuê ki tu xikina kujima.

49Mukonda muthu uoso a ka mu tôua ni tubhia.

50Môngua ua di uabhela kiua! Môngua-phe se uabhu o kutouala kue, uene a u toua-hi? Kalenu ni môngua moxi dienu, mu kale ku paze ni ku di tuma mudienu.

Currently Selected:

Marku 9: KMB80

Highlight

Copy