Marku 1

Nzuá dia Batizu

(Matesu 3.1-12; Luka 3.1-18; Nzuá 1.19-28)

1O njimbu iambote ia Jezú Kristu, monʼa Nzambi, ia mateka. 2Kala kia ki soneka mua polofeta Izaia, exi: Nzambi uambe:

Talesa, ngi tuma mukunji uami ku pholo ié,

u ku iudikila o njila;

3u kala dízui di di kola mu ditutu, kuila:

Iudikenu njila ia Ngana,

iukisenu o ikoka ié ia ku bhitila.

4Kienhiki Nzuá dia Batizu kia tukuluka mu ditutu, hé u kala mu batizala o mundu ni kukola o batizu ia kudiela kubhekela o muloloko ua ituxi, uixi: Ambulenu o ituxi ienu, nda a mi batizale, o Nzambi ni a mi loloke. 5O athu a tungu mu ixi ioso ia Judeia anga a tunda ku mu sanga, ni akua Jeluzaleme, muéne anga u a batizala mu ngiji ia Njolodá, kioso ene ki aia ni kufisala o ituxi iá.

6O Nzuá muéne ua zuata ndemba ja kamelu, ua di kutu phonda ia kibha mu mbunda, u dia mahoho ni uiki ua ditutu. 7Anga u kala mu tangela o mundu, uixi: Ku dima diami, ku kuiza muthu ua ngi tundu. Eme ku mu bhetamena ngó ni ngi mu jituina o mbaia ia haii jé ki kia ngi fuama. 8Eme nga mi batizala ni menha, muéne-phe ua ká mi batizala ni Nzumbi Ikóla.

Jezú kia mu batizala, ni kia mu thendala

(Matesu 3.13—4.11; Luka 3.21-22; 4.1-13)

9Anga ki bhita mu izuʼomo kuma Jezú u tunda ku Nazalé, ku Ngalileia, anga a mu batizala kuala Nzuá mu ngiji ia Njoloda. 10Kithangana kia kala mu zauka ku menha, Jezú ua mono ku diulu kua jikuka, ni Nzumbi iedi kala diembe, iala mu tuluka ku thandu die. 11Anga dízui di tunda ku diulu, dixi: Eie-muene u Monʼami nga ku zola, ua ngi uabhela kiambote.

O tendasá ia Jezú

(Matesu 4.1-11; Luka 4.1-13)

12Kithangana o Nzumbi i mu takula ku ditutu. 13Anga u kala kuenhoko, ku ditutu, makuinhi auana a izuua, ni ku mu thendala kuala Satana. He u kala kumoxi mi iama, maji o ji-anju ji kala mu ku mu langidila.

Jipoxolo ja dianga ku jixana

(Matesu 4.12-22; Luka 4.14-15; 5.1-11)

14Kia zubha Nzuá ku mu ta mu ʼaleia, Jezú uiza ku Ngalileia ni kutanga o maka ma Njimbu Iambote ia tundu kua Nzambi, uixi: 15O thembu ia tenena kia, Utuminu ua Nzambi ua zukama. Dielenu o ituxi ienu, mu xikane o Njimbu Iambote i mi bhana o kubhuluka.

16O kia kexi kubhita bhu mbandu ia kizanga kia Ngalileia, u mona Ximá, ni Mandele, phange ia Ximá, ala mu ta uanda mu menha, kuma atona a jimbiji. 17Jezú ua ambela, uixi: Ngi kaiedienu eme, ngi mi bhange mu kala mu atona a athu. 18Ene kithanganʼokio a xa o manda, anga a mu kaiela.

19Kuenda-ku dingi kadikanga, u mona Tiiaku monʼa Zebedeu, ni phangʼiê Nzuá, ala ue mu bote mu banda o manda. 20Kithanganʼokio Jezú kiiadi kia u a exana. Ene anga a xa tatʼâ Zebedeu mu bote, ni jingunza ja sedivisu, anga a mu kaiela.

Dilaji dia Kafanau a mu saka

(Luka 4.31-37)

21Anga aia ku Kafanau. Kithanganʼokio, kuma kia sabhalu, Jezú u bokona mʼonzo ia dibhezelu dia Nzambi, anga u kala mu longa. 22Athu anga a diuana ulongelu ue. Kuma ua a longo ni ungana, o ulongelu ua asoneki uengi.

23Kithanganʼokio mu dilombe dia mu kala diiala uala ni nzumbi iaxidi. Muene iu ua di kola, uixi: 24Etu tua kuata-hi ni eie Ngana, u Jezú dia Nzalae? Kífua eie ueza ku tu muanga? Eme nga ku ijiia muene kiambote! Eie u Muthu Ukola a ku tumikisa kuala Nzambi.

25Jezú anga u mu bazela, uixi: Dixibhe, u tunde mu mukutu ue!

26O nzumbi iaxidi anga i mu vunda bhoxi, i mu sanhesa, anga i di kola ni dízui dia suina, he i tunda mu mukutu ue. 27Ene oso anga a diuana, a kuata ku dibhudisa mudia, exi: Kueza-hi? Ulongelu uengi, kuambe! Muene u tumina ni ungana, kate ni jinzumbi jaxidi ji mu tumaka.

28O fuma ia Jezú kithanganʼokio anga i sambuka mikau ioso mʼoxi ioio ia Ngalileia.

Ukôuʼ a Phetele a mu saka

(Matesu 8.4-17; Luka 4.38-39)

29Kithanganʼokio, Jezú ni maxibulu mê kia zubha kutunda mu dilombe dia ku sambela Nzambi, a bokona mʼonzo ia Ximá ni Mandele, kumoxi ni Tiiaku ni Nzuá. 30Ukouʼa Ximá ua muhatu ua kexi kukata febele. O kia bhixila Jezú, kithanganʼokio, a mu tangela-kiu. 31Muene anga uiza, u mu kuata lukuaku, u mu bhetula; o febele anga i mu xa, he u kala mu ku a sedivila.

Jezú u saka dingi haxi javulu, he uia ku Ngalileia

(Matesu 8.16-17; Luka 4.40-41)

32Mu ngoloxi, kia tula o dikumbi, a mu bhekela jihaxi joso jala kukata, ni ia a saluka ni madimonho. 33O mbonge ioso anga i bhongoloka bhu kanga dia ʼnzo mua kexi Jezú. 34Muene anga u saka avulu a kate mahaxi moso-moso, u tundisa madimonho mavulu. O madimonho-phe Jezú ka ehela kuzuela, mukonda a mu ijiia.

Jezú ni njimbu iambote

(Marku 1.35-39)

35Mu kimene-phe, kuila kuma hanji kua vundu, ua di meneka mu iangu mu kusamba. 36Ni Ximá ni akua anga a kala ku mu sota ku mbandu joso. 37O kia mu sange, exi: Ene oso Ngana, iá a ku sota. 38Muene-phe ua ambela, uixi: Tuienu kuengi, ku jisanzala jamukuá, nga ká tange-ku maka; kuma kiene kia ngi bheka.

39Anga uia ku Ngalileia ioso ni kutanga maka ma Njimbu Iambote mu malombe má, ni kutundisa o madimonho.

Jezú u saka mukua dibhute

(Matesu 8.1-4; Luka 5.12-16)

40Anga kuiza mukua dibhute ni kudionda, ni ku mu fukamena, uixi: Se eie Ngana, uambe ku ki bhanga, ua ki soko, o ku ngi bhana kudisanza.

41Jezú-phe, kuma henda ia mu kuata, ua sunununa lúkuaku lué, hé u mu babata, uixi: Nga mesena! Ngi ki bhanga muene; disanze! 42Kithanganʼokio o dibhute di mu xa, anga u disanza. 43Muéne anga u mu kusa, kithanganʼokio, u mu tundisa, uixi: 44Aiuka, ku ki zuele ni muthu uoso-uoso; ndeie-phe kua nganga, ua ká dʼidikize, o muéne a ku kengelele mukutu ué. Kienhókio ka ká bhakule mu kudisanza kué o sata ioso ia tumine Mozé, phala ene a ki tambule umbangi, kuila eie uadisanze.

45Maji muéne-phe kia zubha kutunda-bhu, u kuata ku ki fumanesa, ni ku ki bhela jingolokela kuene kuoso; kia bhangesa kuila Jezú ka tenene kubokona dingi mu mbonge ioso-ioso, maji u kala mu tula ku kanga ku mikáu. Athu anga aia ni kutunda ku mbandu joso, a mu sanga koko.

Currently Selected:

Marku 1: KMB80

Highlight

Copy