Matesu 4

Jezú a mu thendala

(Marku 1.12-13; Luka 4.1-13)

1Kutunda bhobho, Jezú a mu bheka kuala Nzumbi ia Nzambi ku mikáu iakukuta, phala Diabhu ku mu funhisa. 2O kia zubha kujila mu makuinhi auana a izuua ni makuinhi auana a usuku, u kala kiua ni nzala. 3Diabhu, anga uiza, u mu ambela, uixi: Eie se u Monʼ a Nzambi, tuma matadiʼ ama ma kituke jimbolo.

4Muène-phe u vutula, uixi: Kiosoneke kuma: O muthu ki ku mbolo ngó kua muena o muenhu, maji ku maka moso ma tunda ku dikanu dia Nzambi.

5Diabhu anga u mu bheka ku mbanza iangene ia Jeluzaleme, hé u mu imanesa ku ditala-èlele dia Tembulu 6Anga u mu ambela, uixi: Se u Monʼ a Nzambi, laúka bhabha; mbata kiosoneke kuma:

Nzambi muene u tuma o ji-anju jê ku ku inga,

a kà ku zenza bhu maku,

phala ku di bhukane kinama kié ku ditadi.

7Kuala Jezú: Kiosoneke dingi kuma: Kana kubhumina#4.7 Kana kuthendala Ngana dia Nzambi ié. Ngana, muene Nzambi ié.

8Luamukuá dingi, Diabhu u mu bheka ku thala ia mulundu ua di leka kinéne, anga u mu idikiza maungana moso mu ngongo ni kufumana kuâ.

9Anga u mu ambela, uixi: Ima ioso iii, ngi ku bhane-iu, se u ngi fukamena eme, ni ku ngi bheza.

10Jezú u mu vutuila, uixi: Tunda bhabha Satana! Mukonda kiosoneke kuma: Mu kubheza kikale u bheza Jihova, Nzambi ié, mune ngó u mu tumaka.

11Bhenhobho Diabhu ua mu ambudisa; o ji-anju anga jiza, ji kala ku mu xibhidila.

Jezú uia ku Ngalileia

(Marku 1.14-15; Luka 4.14-15)

12Kiki Jezú kia kʼivu kuila Nzuá a mu te mu ʼaleia, u katuka, anga uia ku Ngalileia. 13Anga uxa mu Nazalé, uiza u tunga mu Kafanau, bhu mbandu ia kizanga, bhu mbambe ia Nzebulone ni Nafitali; 14Mbé ki bhite kia zuela Izaia polofeta, uixi:

15Oxi ia Nzebulone, oxi ia Nafitali,

bhu mbandu ia kizanga, ku sámbua dia Njolodá,

o Ngalileia ia matumbu.

16Athu a xikamene mu kitombe

a mono mukengeji uonéne!

A xikamene kididi kia kizenji kia kalunga,

kuaki mukengeji uâ!

17Tunde mu thembuʼ omo, Jezú u kuata kiá kulonga mundu, ni kuta maka uixi: Dielenu! Kuma utuminu ua diulu, ua zukama!

Jezú uixana Jixibulu, hé u saka jihaxi

(Marku 1.16-20; Luka 5.1-11)

18O kia kala mu kuenda bhu mbandu ia kizanga kia Ngalileia, u mona jiphange jiiadi, Ximá, a mu ixana Phetele, ni ndenge iê Mandele, ala mu takula uanda mu menha, kuma atona a jimbiji. 19Muène anga u ambela, uixi: Ngi kaiedienu, ngi mi bhange kukala mu atona a athu. 20Anga a xa mandamâ bhenhobho, hé a mu kaiela.

21Ki ende-ku dingi ka dikanga, u sanga jiphange jiiadi jamukuá, Tiiaku dia Zebedeu, ni ndenge iê Nzuá, ala mu bote ni tatʼ â Zebedeu, ala mu banda o manda mâ; muène anga u a exana. 22Ene kithanganʼ okio a xa bote ni tatʼâ, hé a mu kaiela.

O mambu ma kulundu

23Jezu anga u nhunga Ngalileia ioso ni kulonga mu malombe mâ, ni kuta Maka ma utuminu ua Nzambi, ni ku saka jihaxi ni inema muʼ axaxi ka mundu. 24Fuma iê anga i sambuka mu Sídia ioso. Hé a kala ku mu bhekela jihaxi joso, a vulu makukata, ni iá a saluka ni madimonho, ni iá a kate kikonha, ni iá a kate kila; ene oso anga u a saka. 25Ifuẋi ia makota anga i mu nhenganana, a tundu mu Ngalileia, ni mu Dekapolo, ni mu Jeluzaleme, ni ku sámbua dia Njolodá.

Currently Selected:

Matesu 4: KMB80

Highlight

Copy