Malko 7

Intambi zyi yatata-kulu

(Mt 15:1-9)

1Nga aFaliseo na yakaandika yamwi yano yafumile ku Yelusalemu, yakongana panali. 2Yalola yamwi apa alondeshi yaakwe yalulya ichulya na makasa yafita, alikuti: nanti kufulala. 3Kuno aFaliseo na aYudea yoshi ndi yatafulile makasa kufika um-makufi, yatangi yalye. Yalemile ntambi zya yikolo yao. 4Kaili ndi yafuma ku sokoni, ndi yatafulile, yatangi yalye; na kuli ifintu vinina tupu fino yapokelile uku vilema. Ndi fino kufula ingako ni chaluzi na masufulia. 5Nga yalye aFaliseo na yakaandika yamtondosya, yaati: “Nga fino alondeshi yako yatalondile intambi zya ikolo, leelo yalulya na makasa nanti kufulala?” 6Ayanena, ati: “Isaya walawizya ningo kuli mwemwe mwe yaufi, ndi fino chaandikwe:

‘Antu ya yanchindika uku milomo,

leelo imyenzo yao ilu kutali nene.

7Nayo yanfukamile sile,

yalulangilila masambilizyo amatume na antu.’

8“Mwemwi mulusya isunde li Leesa nu kulema intambi zya antu”. 9Ayanena, ati: “Ee, mwalikana isunde li Leesa, kuti muleme intambi zino zya antu. 10Kuno Mose watasile, ati: ‘Uchindike so na nyoko; na wino waatipa isi nanti nyina, aumolwe.’ 11Leelo mwemwi muluti: untu ndi wanena isi nanti nyina: ‘I Kolbani,’ alikuti: ‘Chapiwa kuli Leesa,’ chintu chane chonsi chino chingakuombela, chiwe fiyo kwene. 12Ichisila cha ifintu fiyo mutangi muleke aombele isi nanti nyina ni chintu chimwi. 13Na ku mulonona iswi li Leesa uku ntambi shino, shino mulupokesyana; kaili muluchita ivyavula fino vikoline na fiyo.”

14Wita iumba kaili, wayanena, waati: “Mupulikisye mwensi nu kumanya. 15Kusi chintu chino chilu kunzi chino ndi walya, chingannyikizya, nkambi vilufuma munali ifino vingannyikizya untu wiyo. [16Untu ngali na makutwi ya kupulikila, apulike.”]

17Na pano wingile un-ng'anda, wasya iumba, alondeshi yaakwe yantondosya amaswi ya nnumbe uo. 18Wayanena, waati: “Chene! Nemwe kwene musi na mano? Mutamanyile fino chonsi ichilu kunzi ya yantu, ndi chaya munali, chitangi chinnyikizye? 19Kuno chitaluya ku mweso, leelo chiluya unda sile na kaili chifuma ukuyu umunsalani.” Ukukulanda vi, wazilula ivyakulya vyonsi. 20Walanda, waati: “Ichikulufuma umuntu, ichino chingannyikizya. 21Kuno um-myenzo ya antu mukufuma melenguzi maipe, upundu, 22kwiya, uumozi nu kuchita ivya upundu nu kukumbuka iviipe, ni mpati, kuzosya nu kuchita iviipe, uzuwa, intusi, chilumba nu kuzowa. 23Iviipe vyonsi fi ifino vikufuma unkasi, navyo vilulyikizya untu.”

Usumilo wa umwanachi mSilo-Foiniki

(Mt 15:21-28)

24Atina kweneko aya ku wilaya ya Tilo. Awingila un-ng'anda, asita kuti untu umwi atamanya fino munali. Leelo atachili afisame. 25Nga liyo kwene umwanachi umwi, wali nu mwana kachi, wino wali ni chiwa ichiipe, apulika maswi yaakwe; awiza pona pa mulu yaakwe. 26Nu mwanachi wiyo umGliki, luko lwakwe mSilo-foiniki. Wannomba awinge chiwa uku mwanakwe kachi. 27Nawe wannena waati: “Leka ana yatane yikute, kuno chitazifile ukutola ichulya cha yana nu kusumbila imbwa.” 28Nawe wannena, waati: “Ee, Mwene, leelo nanti imbwa kwene, zino zili pansi ya meza, zikulya fino vivipona ivya yana.” 29Nga wannena, waati: “Ukwiswi liyo, pitanga, ichiwa ichifuma um-mwanako.” 30Wampita uku ng'anda ukwakwe, wazana unsungu wiyo iyannalika pa chitala, ni chiwa ichifuma.

Yesu wapozya chinunu na kaili chipuli

31Atina kaili ku wilaya ya Tilo, apita pakasi ya Sidoni waya kuli yemba wa Galilea, un-nsi ya Dekapoli.

32Nga yannetela chipuli nawe ali na kalimba, yampapata, kuti amwikila makasa. 33Nga antisya umwiumba lya antu ukumbali, amwikila iminwe um-makutwi yaakwe, aswila amati, nga amwemya ululumi, alolekesya mwiyulu, 34aisyumweeso, ati: “Efatha,” alikuti: “Yulika!” 35Liyo kwene amakutwi yaakwe yayuka, akalimba kaputuka anvwanga ningo. 36Wayasunda yatanena umwi; leelo lino wayalesya, wene yalumbusya. 37Yazunguka nkani na nkani, yaati; “Wachita ningo ifintu vyonsi, yachipuli yalupulika na ya chinunu yavwanga.”

Currently Selected:

Malko 7: FNT1988

Highlight

Copy