Malko 6

Yesu wakanwa uku Nasaleti

(Mt 13:53-58; Lk 4:16-30)

1Nga atina-ko, aya umunzi wa kumwao. Alondeshi yaakwe yannondela. 2Nga uwanda wa Sabato atampa kusa mbilizya un-ng'anda yi Leesa. Pano ainji yapulika yazunguka, yaati: “Alawi wafumya kwi ifintu vi? Amalango chi yano wapiwa wi? Ni chani ivipezya-mano fi ivikulu fino aluchita uku makasa yaakwe? 3Asali wi kawaza wilye, umwana wi Malia, nanina asi Yakobo na Yose na Yuda na Simoni? Na siche yaakwe yatali kuli sweswe?” Nga yafwitoka panali. 4Nawe Yesu ayanena, ati: “Ilau ataula unchinsi, siku kumwao nkola nu ku yaluko lwakwe nu ng'anda umwakwe.” 5Chaleka waula ukuchita ichipesya-mano chimwi kweneko; leelo wawikile alwale yache amakasa, ayapozya. 6Chaleka wasunguka uku kuntasumila kwao.

Yesu watuma alondesi

(Mt 10:5-15; Lk 9:1-6)

Nga alila-lila um-misi yio asambilisya. 7Nga ayita yalye ikumi na yaili atampu kuyatuma yaili yaili, ayapa maka uku viwa viipe. 8Ayalesya ukusenda ichintu cha nzila, leelo intuwa sile; nanti unkate, nanti kwende, nanti mpia um-myenda. 9Leelo yazwale infwato. Walanda waati: “Mutachizwala inkanjo siili.” 10Ayanena, ati: “Ponsi pano mwingila un-ng'anda, wikalini fika na lino mwatina apantu pao. 11Na ponsi pano yatamupokelile mwemwe, nanti ukumupulika, apa kutina kwino, mukume ni nkungu ili uku mulu yino, iluwa usyuta ku yakola.” 12Yafuma yasunda kuti antu yavipele. 13Yafumya iviwa tupu, yapaka mafuta antu alwale ainji, yayapozya.

Infwa yi Yoane Kabatisha

(Mt 14:1-12; Lk 9:7-9)

14Nu mwene Yelodi apulika maswi yao, kuni sina lyaakwe lyalumbwike; yalanda yaati: “Yoane Kabatisha atatutuluka uku yafwi, chaleka maka yao yaluomba unnimo um-nkola.” 15Yamwi yaati: “I Elia,” Yamwi yaati: “Alawi ilau, nantu nnina wi yakalauzya.” 16Leelo pano Yelodi wapulika, waati: “Yoane wino naputwile untwe, watatutuluka.” 17Kuno Yelodi unkola walila atatuma antu, walema Yoane, wannyepa uku nyololo, pa nnandu wi Yelodia nka Filipo, unnina, kuno wamtola. 18Kuno Yoane wanenile Yelodi, waati: “Chitakuile wewe ukuwa na nka nnyonko.” 19Na wilye Yelodia wasyala alunsita, kuti amumole, leelo atannola, 20kuno Yelodi wopanga Yoane, wammanyile fino untu wa chumi nu wa uswepe; amchinga, nga pano wampulikisya asima nkani, nawe wampulikisyanga uku kuchimba. 21Na pano wanda uno uzifile wafika, uwanda ukulu uwa kuvyalwa kwakwe Yelodi, wachitile ayikolo yaakwe ichulya, naikolo ya asalifi na ayikolo ya m-Galilea. 22Ali pano umwana kachi wi Yelodia wiyo wingile nu kuchina; chazipa kuli Yelodi na yalye atensi ponga nawe apa chulya. Mwene wanena wilye unsungu, waati: “Ndomba chonsi chino ukasime nankupa.” 23Wannapila, waati: “Chonsi chino wandomba, nankupa, nanti uwene wane apakasi.” 24Nga afuma atondosya nyina, ati: “Ndombe chani?” Nawe ati: “Untwe wi Yoane Kabatizya.” 25Liyo kwene wingile zuwa uku mwene, walomba, waati: “Ndusita umpe li kwene untwe wi Yoane un-chiyo.” 26Umwene akutamilwa nkani, leelo kuno walila atalapa na kuli yano yatenzi apa chulya, atakasime ukumkanya. 27Liyo kwene umwene watuma unsalifi, waati: “Kalete untwe wi Yoane.” Nawe wanja, wamputula untwe umunyololo. 28Waleta untwe waakwe un-chiyo, wapa wiwi unsungu, nawe unsungu wapa nyina. 29Pano alondeshi yaakwe yapulika amaswi ya, yaile yatola ichala chakwe, yazyika umwilindi.

Alondeshi yawela. Yesu wayapa antu ielfu zisano vyakulya

(Mt 14:13-21; Lk 9:10-17; Yn 6:1-14)

30Ni mitume yakongana pa Mwene Yesu. Nga yannandila vyonsi fino yachisile na fino yasambilizye. 31Wayanenile, waati: “Nguni mwemwe mwenga kunondi, apantu pasi antu, mupuze uche.” Kuno kwali antu tupu, yalwiza nu kupita. Chaleka yaula nu wasa wa kulya. 32Yapita yonga akumfiso um-wato, apantu pano pasi antu. 33Antu yayalola yalupita, na yinji yamanya, yaya kweneko ulwilo lutupu ku mulu kufuma imizi yoshi, yakolela kufika.

34Nawe pano wika um-wato, alola iumba ikulu lya antu, ayalolela inkumbu, kuno yali wa nfwele izisi nu nchemi; atampa kuyasambilizya ifintu tupu. 35Nga pano lîla alondeshi yaakwe yaile yannena, yaati: “Apantu pa inyika ntupu, nilanzi lîla. 36Ulambalike antu ya, kuti yapite um-vyalo num-mizi, yakakale ivyulya.” 37Leelo wayanena, waati: “Yapini mwemwe ichakulya.” Yannena, yaati: “Chene! Tuye tukakale imikate ya mpia myanda yiili, kuti yalye?” 38Wayanena, waati: “Muli ni mikate inga? Yangini mukalole.” Pano yalola, yaati: “Yisano, ninswi ziili.” 39Wayanena, yikale yoshi um-matulo matulo apa nnemvwe. 40Yikali mitantali mitantali; epu mwanda na pa makumi yasano. 41Atola mikate ilye isano ninswi zilye ziili, alolekesya umwiyulu asamalizya, akunyola imikate iyo, ayapa alondeshi yaakwe, kuti yayape, ninswi ziili zizi ayankanya yoshi. 42Yalya yoshi yikuta. 43Yasola ivikunyolwa vya kuzyula iviyo ikumi na viili, ni vilepu vya nswi kwene. 44Na yano yalile imikate iyo yali elfu zisano ayonsi.

Yesu wapita pa manzi

(Mt 14:22-23; Yn 6:15-21)

45Liyo kwene wafyengelesha alondeshi yaakwe, yaakwele um-wato, yakolele ukuya umbalama, yafike uku Betsaida, pano unkola alulambalika iumba. 46Pano walambalikana nayo, waya uku mwamba ukuyupepa. 47Na pano yawa manguzi, uwato wali apakasi yi yemba, nawe wali wenga ukunzi. 48Alola yaluchula ukukasa amakasia, kuno unza wali unkomu; na pano yawa manzacha ya usiku, waya kuno yali, angalupita piyulu pa manzi yi yemba, wasita kuyasya. 49Nayo pano yannola alupita pa manzi, yaati: “Kunde imikosi.” Yopa nu kwangula, owe! 50Kuno yoshi yamwine yopa; nga wavwanga nayo, waati: “Tekini myenso, inene, mutachopa!” 51Nga wankwela um-wato muno yali, unza wansila, yazunguka leka um-myenso yao. 52Kuno yatamanyile izya mikate ilye, leelo imyenso yao yali mikomu.

Yesu waposya aluale uku Genesaleti

(Mt 14:34-36)

53Na pano yalamba, yafika insi ya Genesaleti, yanyepelelu wato apilambwa. 54Nayo pano yafuma um-wato, liyo kwene antu yammanya zuwa. 55Yituka ulwilo, yalîla insi yoshi, yatampa ukusenda alwale apa vitala ukuyatwala ponsi pano yapulika ali. 56Na konsi kuno wayile, wingila un-tuzi, nanti imizi nanti ivyalo yaleta alwale uku sokoni, yampapata yamwemye nanti sempele lya mwenda wakwe. Na yoshi yano yamwemizye, yapola.

Currently Selected:

Malko 6: FNT1988

Highlight

Copy