Malko 2

Yesu waposha ntu witenda

(Mt 9:1-8; Lk 5:17-26)

1Walangi amanda yamwi yasila awela un-Kapenaumu; nga chimanyika fino alu un-ng'anda. 2Nga yakongana antu tupu, nu mweko wuwula na pa nnyango kwene, nga asunda amaswi yaakwe. 3Nga yiza antu yannetela untu wino wikala itenda, asenzilwe na antu yani. 4Nga lino yapotwa uku mpalamila uku winji wa antu, yalimbulwile idali, yatulula pano ali, nga pano yatulula, isya ichitala chino walalile untu witenda. 5Nga Yesu lino walola utailo wao, wanena unwale witenda, waati: “Mwanane, welelwa amaifyo yako.” 6Leelo yakaandika yamwi atenzi-po, nga yelengula um-myenzo yao, yaati: 7“Uku chani untu wi aluvwanga imisuli mitupu fi kuli Leesa; alusula. Uwini angelela amaifyo asi Leesa wenga?” 8Liyo kwene Yesu amanya um-mweso waakwe fino yalwelengula fi um-myenzo yao, wayanena, waati: “Ifino mulwelengula fi um-myenzo yino? 9Chene! ichangupazu chilikwi, kunena uwitenda: Maifyo yako yalelwa; nanti ukuti: Katuka, wutwike ichitala chako, upite? 10Leelo mumanye fino Mwana-ntu ali na maka kuno ukunzi ayaakwelela amaifyo, pao alunena uwitenda: 11Ndukunena, katuka, usende ichitala chako, upite uku ng'anda ukwako.” 12Liyo kwene wankatuka, wambutwika ichitala chakwe, wampita apa maaso yao yoshi; yazunguka yoshi, yatensya Leesa, yaati: “Alavi tutachili tulole nanti uche!”

Kwitwa kwi Levi

(Mt 9:9-13; Lk 5:27-32)

13Kaili afuma apita umbali yi yemba, ngiumba lyonsi likongana kunali, ayasambilizya. 14Nga pano wapita, alola Levi umwana wi Alifeo, atensi apa folozani, wannena, waati: “Ndondela.” Nawe wankatuka nu kunnondela. 15Nga pano watensi apa chulya un-ng'anda mwakwe, yakalifya yikodi na yamaifyo yatensi apali ponga na Yesu na alondeshi yaakwe. Kuno yala yinji angi yannondile. 16Lino yakaandika na aFaliseo yannola alulya ponga na yakalifya yikodi na yamaifyo, yanenile alondeshi yaakwe, yaati: “Nga fino alulya ponga na yakalifya yikodi na yamaifyo?” 17Nawe Yesu wapulika, ayanena, ati: “Apuma yatangi yasite sing'anga, nkambi alwale. Ntizilu ita ayachumi, leelo ayamaifyo.”

Kuizilisha fyakulya

(Mt 9:14-17; Lk 5:33-39)

18Nayo alondeshi yi Yoane na aFaliseo yaushilisha fyakulya, nga yisile yannena, yaati: “Uku chani alondeshi yi Yoane na alondeshi ya aFaliseo yauzilisha fyakulya, leelo alondeshi yako pole?” 19Nawe Yesu wayanenile, waati: “Chene! Asindikile yangauzilisha na siwinga ali ponga nayo? Pano siwinga ali ponga nayo, yatangi yauzilizye. 20Leelo amanda yalwiza yano siwinga wacha wawa asipo, apano yalusilisha wanda uo. 21Kusi untu akutela ichilaka cha mwenda umpya uku mwenda wa kali, ngalusuma; chichi chipya chino chatelwa chikulonona umwenda wa kali na pano palepuka pakulukula. 22Na kushi untu akutela amasi ya nsabibu un-nyingu ya kali; ndi watela amasi mapya, singalepuka inyingu siyo, amasi itike, nyingu syononeke. Leelo angateka amasi mapya ku nyingu impya.”

Yesu, Mwene wa Sabato

(Mt 12:1-8; Lk 6:1-5)

23Nga pano wapitanga um-fyalo uwanda wa Sabato, alondeshi yaakwe pano yalupita un-nzila, yakuntola imitwe ya ngano. 24aFaliseo yannena, yaati: “Lola fino yachita lino litaile kuchita uwanda-wi-Leesa?” 25Nawe wayanena, waati: “Mutachili musome ponsi fino Daudi wachisile, pano wachuzile nu kulola inzala, unkola na achakwe? 26Vino wingile un-ng'anda yi Leesa, um-manda ya kali yi Kapela-nkulu Abyatali, wailya imikate ya Ulangizyo, yino chisi ningo unkola ukuilya, leelo kuli yakapela sile, wapa na achakwe?” 27Nawe wayanena, waati: “Wanda wa Sabato wachisilwe ku untu, asi untu wachisilwe uku wanda wa Sabato. 28Ichino Mwana-ntu ali Mwene kwene wa wanda wa Sabato.”

Currently Selected:

Malko 2: FNT1988

Highlight

Copy