Mateo 9

Witeenda wapiozwa

(Mk 2:1-12; Lk 5:17-26)

1Awingila um-waato nga alaamba, aya ukutilea wa kumwao. 2Nga lolini, yanndetela untu wikali teenda, awiishi apa chitala. Yesu pano walola usumilo wao, aneena wino wikala itenda, ati: “Teka umweso, mwanane, welelwa amaifyo yaako.” 3Nga lolini, yakaandika yamwi yafwaanga um-myeeso yao, yati: “Alawi, alusula Leesa.” 4Nga Yesu fino wamanyile ameleengushi ya myeeso yao, ati: “Uku chaani mulwelengula ifiyiifu um-myeeso yiino? 5Kuno ichangupasu ichilikwi, ukuti: ‘Weleelwa amayiifyo yaako,’ naanti ukuti: ‘Katuka, upite?’ 6Leelo kuti mumanye fino uMwaana-ntu ali na maaka kuno ukuushi aya kweleela amaifyo, aneena uwi tenda, ati: Katuka uutwiike ichitala chaako, upite uku ng'anda ukwaako.” 7Akatuka, apita uku ng'anda ukwaakwe. 8Nga amaumba pano yalola ifiintu fiyo, ingofi shayalema, yateesha Leesa wino wapiile aantu amaka ndi yao.

Mateo wiitwa

(Mk 2:13-17; Lk 5:27-32)

9Nga lino Yesu alupita ukufuma kweneko, alola untu ishiina lyakwe i Mateo, ateesi apa folosani, wannena, wati: “Ndondela.” Nga wakatuka, wanndondela. 10Nga pano wikala un-ng'anda, kuti alye ichakulya, lolini, yakalifya yikodi tupu na yamaifya yisile ikala poonga na Yesu na alondeshi yaakwe. 11Afaliseo pano yalola fiyo, yanena alondeshi yaakwe, yati: “Kuno ichaani Kasambilisha wino alulya poonga na yakalifya yikodi na yamaifyo?” 12Nawe pano wapulika, ayaneena, ati: “Apuma yatangi yashite sing'anga, nkambi alwale. 13Leelo pitaangi mukasambilile ichaani amaswi ya: ‘Ndushita ukukumbukila; ntalushita ifipelo.’ Kuno ntisilu wita ayakapanga, leelo ayamaifyo.”

Kuushilisha ifyakulya

(Mk 2:18-22; Lk 5:33-39)

14Apano alondeshi yi Yoane yayiile kuno alii, yati: “Uku chaani kuno sweemwi na aFaliseo tuluwushilisha iyakulya, leelo aloondeshi yaako poole?” 15Yesu ayaneena, ati: “Yano yalalikwe uku wiinga, yangaloosha uli lino siwinga ali poonga nayo? Leelo amaanda yalwisa yano yalutisiwa siwiinga, apano yaluwushilisha. 16Kuusi untu wino akuteela ichilaka cha mweenda umpya uku mweenda wa kali, kuno chino wateela, chilulepula pooshi pano wasuma, na pano palepuka apasha apakwa. 17Naanti aantu yasutela amaasi ya misabibu un-nyiingu sha kali, na ndi yateela, inyiingu shiyo ishilepuka, na maasi ya misabibu yitika ni nyiingu shononeka; leelo yakulutela maasi mapya ya misabibu un-nyiingu mpya, shoonsi ishikôsheka niingo.”

Mwana-kachi wi Yaifo na mama wino washwaanga uwaashi

(Mk 5:21-43; Lk 8:40-56)

18Pano achili aluyalandila ifiintu fiyo, lolini, yumbe umwi awisa, anfukamila ati: “Umwaanane kachi wafwa li kweene li, leelo tuye ukambwikile ikasa lyaako, nawe akupola.”

19Nga Yesu akatuka, alondekana nawe, poonga na alondeshi yaakwe. 20Nga lolini, umwanachi umwi waali nu lwaale wa kuswa uwaashi, imyaka ikumi na yiili, awisa lwa ku chisila, awemya isempele lya mweenda waakwe, 21Kuno um-mweeso waakwe watile: “Ngi nemya isempele lya mwenda wakwe sile, nampola.” 22Nga Yesu aseleuka anndola, anneena, ati: “Teka umweeso, kachi waane, ukusumila kwaako kwakuposha.” Umwanachi wiyo apola ukufuma liyo kweene.

23Yesu lino wafika uku ng'anda kwi yumbe wiyo, alola yano yaluma mwiilwa, na maumba ya antu yaluloosha. 24Wayaneena, waati: “Fumini, kuno unsuungu atafwile, awiisi sile.” Yansekela nkaani. 25Leelo pano wawinga iumba, awingila, anndema ikasa lyaakwe, unsuungu wiyo akatuka. 26Nga amaswi ya chintu chi yalumbuka iisi yiilye yooshi.

Yesu waposha apofu na chinuunu

27Nga pano Yesu wapitaanga ukufuma kweneko, apofu yaili yanndondela, angi yalwaangula yaluuti: “Utukumbukile, mwaana wi Daudi!” 28Nga pano wingila un-ng'anda, apofu yao yaya kunaali, nga Yesu wayaneena, waati: “Musumile fino ngaomba ichintu chi?” Yaati: “Endita, Mweene.” 29Apano wayeemya amaaso yao, afwaanga, ati: “Ndi fino musumile ifino chiwe.” 30Amaaso yao yayulika. Nga Yesu ayaneena uku maka, ati: “Mulole niingo untu umwi atamanya!” 31Leelo yafuma yaliifya amaswii yaakwe un-nsi yiilye yooshi. 32Nga pano yao yalufuma, lolini, yanndetela untu chinuunu ali ni ichiwa. 33Pano ichiwa chiyo chawingwa, chinuunu wiyo afwaanga. Amaumba yasunguka, yaati: “Um-Islaeli tutachili tulole naanti limwi!” 34Leelo aFaliseo yaati: “Uku maka ya wikolo wa fiwa aluwiinga ifiwa.”

Inkuumbo shyi Yesu uku yaantu

35Yesu nawe walilaanga um-misi yooshi nutusi, angi alusambilisha un-ng'anda shao ishi Leesa, nu kusuunda iswi-isiifu lya weene, nu kuposha indwaala shooshi ni mboombo shooshi. 36Nga pano walola amaumba, ayalolela inkuumbu, kuno yalile iyatoonta nu kusambaala wa fweele shino shitakwiite unchemi. 37Apano wayaneena alondeshi yaakwe, waati; “Imboto ilipo, leelo aomfi yachepa. 38Ichino pepini uMweene wa mboto, atwaale aomfi uku mboto yaakwe.”

Currently Selected:

Mateo 9: FNT1988

Highlight

Copy