Mateo 23

Yesu wasumbikila yakaandika na aFaliseo

(Mk 12:38-39; Lk 20:45-46)

1Nga Yesu aneena amaumba na alondeshi yaakwe, aati: 2“Yakaandika na aFaliseo yikaliila ichisuumbi chi Mose. 3Ichino ifiintu fyoonsi fino yamuneena, muleme nu kufioomba; leelo mutachichita ukukolanya na fino yaluchita, kuno weene yakululaanda, leelo yataomba. 4Weene yakulunyepa ifiseendo ifinwaamu nu kutwiika aantu apa luto, leelo weene akola yataangi yemye naanti uku nwe wao. 5Na kayili fino yaluchita, yaluchita ukuti yaloleke na aantu; kuno yalusalasha imikowa ya nsala nu kufusha matamfua. 6Yakuunda ifisuumbi fya ku nkoleelo apa chakulya, nu kwikala uku nkoleelo un-ng'anda shi Leesa. 7Nu kulaulwa um-masokoni, nu kwiitwa na aantu: Labi. 8Leelo mweemwi yatachimwiita Laabi, kuno Kasambilisha wino ali weenga, neemwe mweensi mwe yali yoonga. 9Leelo mutachiita untu wa kuushi, Taata, kuno So wino ali weenga, uwa mwiyulu. 10Naanti mutiatwa yakakoleela, kuno Kakoleela wino ali weenga, nawe i Klisto.

11Na wino uwikolo kuli mweemwe awe umuofi wino. 12Na weeso wino waukusha, aluchefiwa, na weeshi wino wacha waucheefya, alukushiiwa.

13“Akalaanda kino yakaandika na aFaliseo, mwe yaufi, kuno muluyalila aantu uweene-wa-mwiyulu; neemwe mwe yakola mutalwiingila, na yano yalushitu kwingila, mutaluleka yingile.

[14“Akalaanda kino yakaandika na aFaliseo, mwe yaufi, kuno mululya ing'anda sha ashiimbe, nu ku ufi wino mululundulula insaala; ichaleka muluputwiilwa uputushii ukuluta.]

15“Akalaanda kino yakaandika na aFaliseo, mwe yaufi, kuno mululila muli yeemba nu mbali ukushita untu wa kufyusiiwa, na pano wafyusiiwa, mulunchita awa umwaana wa Jenama amaila yayili nkaani ukuluta mweemwe, mwe yakola. 16Akalaanda kino yankoleela apofu, yano mukuluuti: untu ndi walapila uku ng'anda-nkulu-iyi-Leesa, chisi chimwi; leelo untu wino walapa uku sahabu iya ng'anda-nkulu-iyi-Leesa, wataunyepa. 17Mwe mwasowa nga mwapofula, kuno ichikulu ichilikwi, iyiyi isahabu nanti iyiyi ng'anda-nkulu-iyi-Leesa, yino iluswefya isahabu? 18Kayili untu ndi walapila uku altale chisi chimwi, leelo untu wino walapila uku wiila uno uli penepo, wataunyepa. 19Yapofu mwe, kuno ichikulu ichilikwi, uwiila wuuwu naanti altale, yino iluswefya uwiila? 20Ichino wino walapa uku altale, watalapa kuli yeneyo nu ku ifiintu fyooshi fino fili penepo. 21Na wino walapa uku ng'anda-nkulu-iyi-Leesa, watalapa kuli yeneyo na kuli wino ateesi-mo. 22Na wino walapila ukwiyulu, watalapa uku chisuumbi-cha-ukulu chi Leesa, nakuli wino awikalile.

23“Akalaanda kino yakaandika na aFaliseo, mwe yaufi, kuno mulufiima isempu li kumi lyi nachituumbi ni binzaali ni nkwila; leelo mwasha ifiintu fikulu ifya Ntaambi, ndi fino ichuumi, inkuumbu nu sumilo. Chimuyiile ukuchita fiyo na maniina yaaya mutachiyata. 24Yakakoleela yapofu, yano muluyunga kumpe nu kumila ntwanga-mwendo.

25“Akalaanda kino yakaandika na aFaliseo, mwe yaufi, kuno mulufula ulwaako ni mbale ukuushi, nu nkasi mwashula nu kupoka-ifya-antu nu kwinanguka. 26We mFaliseo mpofu, tangula fula ulwako unkasi, kuti nukuushi na ko kweene kusweepe.

27“Akalaanda kino yakaandika na aFaliseo, mwe yaufi, kuno mukoline na maliindi yano yapaka iswakala, yano ukuushi yaluloleka yasiipa, fwaandi, unkashi yashula amafupa ya yafwi ni fiole fyooshi. 28Ifino neemwe, ukuushi mululoleka na antu fino muli niingo, fwaandi unkasi mwashuula ufi nu kusuuli Ntaambi.

29“Akalaanda kino yakaandika na aFaliseo, mwe yaufi, kuno mulukuula amaliindi ya malau, nu kuyeefya maliindi ya achumi. 30Nukuti “Sweeswe ndi twaliko um-maanda iya taata yitu, tutali tuminkane nayo uku waashi wa malau.’

31“Alafi muluumanyisha mwe yakola, fino mweemwe yana yi yano yumoshila malau. 32Yanyini leelo ichilingilo chi ya so yino! 33Mwe soka, yana ya fisoka, mulwituka uli uputushi wa Jenama? 34Ichino fiyo, lolini, namutumila malau na ya maano na yakaandika; yamwi pali yeneyo mweemwe muluyumola nu kuyakonkomela apa nsalaba, na yamwi muluyuma un-ng'anda sino ishi Leesa nu kuyawiinga chila nsi. 35Ichino fiyo wise kuli mweemwe uwasi wooshi uno witika paasi uwa antu ya chuumi, ukufuma uwashi wi Abeli wiilye uwaali wa chuumi, fika nu waashi wi Sakalia umwaana wi Balakya, wino mumoshiile apakashi u ng'anda-nkulu-iyi-Leesa ni altale. 36Mweneemo ndumuneena: ifiintu fi fyooshi filwisa pa mpanda uo.

Yesu walilila iYelusalemu

(Lk 13:34-35)

37“We Yelusalemu, Yelusalemu, ukulumola malau nu kuyatama na mafiinga, yano yatumile kuli weewe, amaila yaanga nasita ukuyakonganika poonga ana yaako, ndi fino inkoko ikulufukatila poonga ana yaakwe um-mapa yaakwe. Leelo mutakashime. 38Lolini, ing'anda yino yashaala ichipoompa. 39Kuno ndumuneena: mutalundola naanti uche ukufuma kasalaka, fika na li mululanda, muti: ‘Wapepelelwa wino alwiisa ukwishiina lya Mweene!”’

Currently Selected:

Mateo 23: FNT1988

Highlight

Copy