Luka 1
1
1Kuno yantu ainji yaandika amaswi ya ifintu fino fyaombike pano tuli. 2Ndi fino yatulandile yashuta yano yawine, naomvi yiswi liyo, ukufuma intangulo. 3Nalola chili ningo nene kuno nafipilila ningo ifintu fiyo fyooshi ukufuma intangulo, uku kwandikila ningo, Teofilo nsipe. 4Ukuti umanye ningo uku ifintu fino wasambilishiwa.
Kufyalwa kwi Yoane Kabatisha kwalandwa
5Apa manda yi Helodi umwene wa aYudea, kwali kapela umwi, ishina lyaakwe i Zakalia, uwa luti lwi Abiya, nunchi wali wa ku yana yi Aloni, ishina lyaakwe i Luzabeti. 6Na yoshi yaili yali aya chumi apa maaso yi Leesa, yali ni filangaso fyooshi ifya Mwene ni ntambi yaakwe, nanti kulowa 7Nayo yatakwite umwana, kuno Luzabeti wali umumba, nayo yoshi yaili yalile yakota.
8Nga walangi pano aluomba milimo yi kapela unnduti lwakwe pali Leesa, 9ukuyana ni ntambi shi kapela, wasolwilwe ukwingila nu kuombela un-ng'anda-nkulu-iya-Mwene, ukuti asukilishe ubani. 10Na maumba yoshi aya antu yanosalikanga apansi, pano chafika ukusukilisha ubani. 11Malaika wa Mwene waloleka kunali, angi awimilile isansa lya kwilunji ilya altale ya kusukilizya ubani. 12Zakalia wasima, pano wanndola, ingofi shanndema. 13Leelo malaika wiyo wannena, waati: “Utachopa Zakalia, kuno ipepo lyako ilipulikikwa, nu wapako Luzabeti alukufyalila umwana umonsi, nishina lyaakwe uluntema i Yoane. 14Newe uluseka nu kuchimba, na antu tupu yaluchimbila ukufyalwa kwakwe. 15Kuno aluwa unkulu apa maso ya Mwene, atalunwa amasi ya mizabibu nanti ivya kukoleka; alushula uMweso Nswefu ukufuma unda yi nyina. 16Na ainji umu Islaeli aluyawesha uku Mwene, Leesa wao. 17Nawe alukolela inkolelo yaakwe uku mweso wi Elia na maka yaakwe, ukuti asenule imyenso yi yaisi iwelelu ku yana, kutelela akanyi amano ya chumi nu kuwikila uMwene antu yano yachitwa ningo.”
18Nga Zakalia wanena malaika, waati: “Nammanya uli iswi li? Kuno ne nkombe nu wapane unkolechi wa manda tupu.” 19Malaika wannena, waati: “Nene Gablieli nkulwimilila apa maaso yi Leesa, nene ntumilwe ukufwanga newe nu kukumanyisha ifintu fisipe fi. 20Lola, wambwa ichinunu, usufwangaa nu kufika lino ifintu fi filuloleka, kuno utasumile amaswi yane, nayo yaluloleka apa makati yaakwe.”
21Na antu yano yalolelanga Zakalia, yazunguka kuno washimba un-ng'anda-nkulu-iyi-Leesa. 22Pano wafuma champota ukufwanga nayo, yamanya fino watalola malele un-ng'anda-nkulu-iyi-Leesa. Nawe wayasinisha, washala ichinunu fifi kwene.
23Nga chali pano amanda ya kuwomba kwakwe yashila, wapita uku ng'anda ukwakwe.
24Nga apa chisila cha manda yao, Luzabeti unchi wasenda inda, nga wafisama imyeshi yisano, ati: 25“Alafi ifino uMwene wanchitile um-manda yano wandolanga, kuti antisishe insoni shane apa antu.”
Kufyalwa kwi Yesu kwalandwa
26Um-mwezi wa sita malaika Gablieli watumilwe na Leesa, ukuti aye ukuunsi wa Galilea, ishina lyaakwe Nasaleti. 27Uku nsungu wino walile wimalwa na untu ishina lyaakwe i Yosefu, uwa luko lwi Daudi; ishina lya nsungu wiyo i Malia. 28Wingila un-ng'anda umwakwe, waati: “Ndukulaula, we wino wapiwa ifizipe, uMwene ali ponga newe.” 29Nawe washima nkani apa maswi yaakwe, welengula um-mweso waati: “Unndau u, wawa uli?” 30Malaika wannena, waati: “Utachopa, Malia; kuno ukupiwa ifizipe kuli Leesa. 31Nga lola, wansenda inda, nu ukuleta ukupapa umwana monsi, nishina lyaakwe ulauntema i Yesu. 32Wene aluwa unkulu, alwitwa umwana waakwe Wa-Mwiyulu, nu Mwene Leesa alumpa ichisumbi-cha-wene ichi Daudi, isi wakwe. 33Alulâsa ing'anda yi Yakobo manda ti, nu wene waakwe utalusila.”
34Nga Malia wanena malaika, waati: “Lyambwa uli iswi li, fino nene ntamanyile umoshi?” 35Nga malaika wannena, waati: “uMweso Nswefu ulukwikila panuli, na maka yaakwe wino ali Wa-Mwiyulu yalukukuwa wa chisau; ichino fiyo chino chiluvyalwa chilwiitwa ichiswefu, Mwana wi Leesa. 36Nga kaili lola, uwa luko lwako, Luzabeti nawe wasenda inda ya mwana monsi um-ukolechi wakwe; nu mwezi u uwa sita kuli wenewe wino yatangi umumba. 37Kuno kusi chino chitangi chiombeke kuli Leesa.” 38Nga Malia afwanga ukuti: “Lolini, nemwi ne umuofi wa Mwene; chiwe ndi fino ufwangile.” Nga malaika watina wapita.
Malia wapita kulaula Luzabeti
39Nga Malia wakatuka um'manda yalye kwene, wapita suwa uku nsi ya myamba afika nu ku nsi umwi uwi Yuda. 40Awingila un-ng'anda mwi Zakalia, alaula Luzabeti. 41Nga pano Luzabeti wapulika ukulaula kwi Malia, umwana walunduka un-nda yaakwe; Luzabeti awikilwa nu Mweso Nswefu. 42Afwanga ukwiswi ikulu, ati: “Wapepelelwa wewe apa yanachi yooshi, na wino alufyalwa unda yako, wapepelelwa. 43Lyangisila uli iswi li, lino nyina wa Mwene wane awise kunondi? 44Kuno iswi lya kulaula kwako pano lingila um-makutwi yane, umwana wachinda uku kuchimba un-nda yane. 45Ali ni nkata wino waumila, kuno ifintu fino wanenilwe nu Mwene filuombeka.”
Mwimbo wi Malia
46Nga Malia avwanga ukuti:
“Upuma wane ulutensha uMwene.
47Nu mweso wane uluchimba kuli Leesa, Kafyusha wane.
48Kuno wataulola upina wa mombofi wakwe.
Kuno lola, ukufuma kasalaka, inko shoshi zilungita ne wa nkata.
49Kuno Wa-Maka watanchitila ifintu ifikulu,
Nishina lyaakwe iswepe.
50Nu kukumbukila kwakwe kulipo uku mipanda ni mipanda,
kuli yano yanchindika.
51Watachita amaka ukwikasa lyaakwe;
waponya aya chilumba um-melenguzi ya myenso yao.
52Waponya ayikolo apa fisumbi fyao ifya wene;
wateka apina.
53Aya nsala wataikusha ifisipe,
na asavi wayawinga minwe.
54Waswilisha Islaeli, umbofi wakwe,
kuti alushe kukumbukila kwakwe.
55Ndi fino wanenile yatatayitu—
Ablahamu ni imipanda waakwe amanda ti.”
56Malia watensi nawe ndikuti imyesi yitatu, ngawela ukwakwe.
Yoane Kubatisha wafyalwa
57Nga amanda ya kuti Luzabeti apape yafika, afyala umwana umoshi. 58Nga aya mwipamba na aluko lwakwe yapulika fino Mwene wamwingilisisha ifintu fisipe, nga yachimba ponga nawe.
59Nga chali apa wanda wa nnane, yiza ukuchita umwana ichibalu, yakana ukumpa ishina lyi isi Zakalia. 60Leelo nyina waati: “Linyo awe, leelo tumteme ilyi Yoane.” 61Nayo yannena, yaati: “Pasi umwi unduko lwako uwishina li.” 62Nga yashinisha isi, kuti yamanye fino akasime ukumtemela. 63Nga washita ichibao, awandika ukuti: “Ishina lyaakwe i Yoane.” Nayo yasunguka yoshi. 64Liyo kwene unndomo waakwe usapuka ponga nu lulumi lwakwe kwene, atampa ukufwanga, ukutesha Leesa.
65Ingofi shayalema yoshi, yano yatensi apipi nayo, ni ifintu fi fyoshi vilumbuka un-nsi yoshi iya myamba ya Yudea. 66Nga yoshi yano yafipulika, yafiwika ummyenso yao, yaati: “Umwana wi aluwa uwa uli?” Kuno ikasa lya Mwene lyali ponga nawe.
Mwimbo wi Zakalia
67Na Zakalia isi washula uMweso Nswefu, walausha, ati:
68“Utensho uku Mwene, Leesa wa Islaeli;
kuno waatikisa antu yaakwe
nu kuyakulula.
69Watwimikila ulupembe lwa ufyusi,
apa nndyango wi Daudi, umuofi wakwe.
70Ndi fino wafwangile kufuma kali
uku milomo ya malau yaakwe aswepe.
71Tufyuke na yasiluwembu yitu,
num-makasa yi yoshi yano yatutuwa.
72Ukuti akumbukile yatata yitu
nu kwielengasha Upangano waakwe uswepe.
73Ichilapo chino walapile
tata witu Ablahamu.
74Ukuti alutupa sweswe ukutukulula um-masasa yi yasiluwembu yitu,
kumbombela nanti ngofi,
75um-uswepe ni chumi,
apa maaso yaakwe,
amanda yitu yoshi,
76Newe mwana, ulwitwa
wewi lau lyi Wa-Mwiyulu.
Kuno ulukolela inkolelo apa maaso ya Mwene,
ukuteyanya insila shaakwe.
77Ukuyapa antu yaakwe umanyisho wa ufyusi,
uku kwelelwa amaifyo yao.
78Uku nsila ya kukumbukilwa na Leesa witu,
kuno ukuswepa kuno kufumile umwiyulu,
ukutwisila.
79Ukuyaswefesha yano yatensi
un-chanda nu un-chisau cha nfwa.
Nu kukolelela amulu yitu
un-nsila ya kuwelela.”
80Ngu mwana wiyo wakusile, aungilisika amaka um-Mweso; awikala unnusanga fika na lino walolike uku yaIslaeli.
Currently Selected:
Luka 1: FNT1988
Highlight
Share
Copy
Want to have your highlights saved across all your devices? Sign up or sign in
New Testament in Fipa © United Bible Societies, 1988. Bible Society of Tanzania.
