Milimo 15

Ikongani lyakongana uku Yelusalemu

1Nga isa antu ukufuma uku Yudea yasambilisha achao, fino ngi mutachisilwe ichibalu ukuyana ni ntambi yi Mose, mutangi mufyusiwe. 2Nga pano Paulo na Balanaba yapashanya na antu yao nu kutondoshana nayo nkani, yalanda fino Paulo na Balanaba na yamwi pali yeneyo, yapite uku Yelusalemu uku mitume nakombe, uku maswi ya chintu chiyo.

3Ngi kanisa liyasindikila, yapita apakasi ya nsi ya Foiniki ni Samalia, yachimvya nkani anina yoshi, pano yayalandila fino akulukuwa yafyusiwa. 4Pano yafika uku Yelusalemu, yapokelelwa ni kanisa ni mitume nakombe, nayo yayalandila ifintu vyonsi fino Leesa waomba ponga nayo.

5Leelo yamwi amwiumba lya aFaliseo yano yazumila, yakatuka nukuti: “Chilingine yachitwe ichibalu nu kuyanena yaleme intambi yi Mose.”

6Imitume nakombe yakongana, ukuti yalole iswi liyo. 7Nga pano yapazyana, Petlo akatuka, ayanena, ati: “Yachane, umwemwe mumanyile fino fuma amanda ya ntangulo, Leesa wansolwile pali mwemwe, ukuti akulukuwa yapulike iswi-zipe uku nnomo wane nu kulizumila. 8Na Leesa wino amanyile imyenzo ya antu, aimikila, ukuyapa uMweso Nswefu, ndi fino neswe kwene watupile. 9Nga atali nu solozi pali sweswe nayo, ayaswefya imyenzo yao uku usumilo. 10Ali nga fino mulwezya Leesa ku kuwika inkonkoli uku ngalo zya alondeshi, ino yatata itu nanti usweswe tutachili tuisende. 11Leelo tuzumile fino tulufyusiwa uku nkumbu zya Mwene Yesu vivi kwene wi yao.”

12Ngiumba lyonsi likala chele, lyapulikisya Balanaba na Paulo, yayalandila amaswi ya vilangizyo ni vipezya-mano fino Leesa wachita uku utume wao uku akulukuwa. 13Nga pano yao yatuzya, Yakobo avwanga, ati: “Yachane, mpulikisyini! 14Simeoni watatulandila fino apa ntangulo Leesa walolekisye akulukuwa, kuti asolole antu pali yeneyo uku nnandu wizina lyaakwe. 15Na maswi ya malau yazumilizinye, ndi fino chaandikwe:

16‘Ichisila cha ifintu fiyo nduwela,

nene ndukula kaili nsaka yi Daudi

yino yaponile,

ndukula kaili pano papona.

Nene nduimika kaili.

17Ukuti antu yano yasyala

yasite uMwene,

na akulukuwa yoshi

yano izina lyane lyalandwa kuno yali.

18Avwanzile uMwene

wino aluchita ifintu fiyo

fino wavimanyisya fuma kali.’

19“Ichino fiyo nemwi nati, tutachichuzya akulukuwa, yano yasenukila kuli Leesa. 20Leelo tuyaandikile, fino yaleuke uku vilui, ni vya upundu, ni nyama i icha uwila, nu wazi. 21Kuno fuma kali Mose ali na antu yano yalusunda ifintu vyaakwe, um-mizi yoshi akulusomwa, manda yoshi ayi Leesa um-mang'anda yao iyi Leesa.”

Imbaluwa uku azumila asi aYudea

22Nga chazipa apa mitume nakombe ni kanisa lyonsi, ukusolola antu yamwi pali yeneyo, nu kuyatuma uku Antiokia ponga na Paulo na Balanaba; yasolola Yuda wino yatangi Balasaba, na Silasi, yano yali antu yamanyika apa yanina. 23Yaandika vi nu kutwala uku makasa yao: “Imitume nakombe uku achitu ya ku akulukuwa, yano yali uku Antiokia nu ku Silia nu ku Kilikia: tulumulaula wa achitu. 24Kuno twapulika, fino antu, yano yafumile kuno tuli yalulukumususya uku maswi yao, nu kumusimya uku myenzo ino, yano neswe tutayatumile. 25Swemwi twalola ningo, twapulikana ukumweeso onga, ukusolola antu nu kuyatuma kuno muli, ponga nakunde yitu Balanaba na Paulo; 26antu yano yaufimile ukwizina lya Mwene witu, Yesu Klisto. 27Ichino twatuma Yuda na Silasi, yano yalumunena akola amaswi yao kwene uku milomo yao. 28Kuno chazipile uMweeso Nswefu ponga neswe, tutamutwika ichisendo, siku chino chiile. 29Alikuti: Muleuke uku ifintu vyafimwa uwila uku vilui, nu wazi, ni nyama i icha uwila, ni vya upundu. Ngi mwaukôla ni ifintu fiyo, mukuwa mwachita ningo. Kati lumi!”

30Nga pano yao yayalambalika, yapita ukuya uku Antiokia, na pano yakonganya ikongani lyonsi, yayapa imbaluwa iyo. 31Nayo pano yaisoma, yachimba uku utekezyo uo. 32Nga fino wene Yuda na Silasi yali ayakalauzya, yayanena achitu ku maswi tupu, yayakomya. 33Nga pano ikala kweneko manda yamwi, yasindikilwa nachitu ukupita lumi kuli yano yayatumile. [34Leelo wene Silasi alola ningo ukusyala kweneko.]

Paulo na Balanaba yatana

35Paulo na Balanaba yikala uku Antiokia, angi yalusambilizya nu kusunda iswi lya Mwene, ponga na antu yanji tupu.

36Ichisila cha manda yamwi Paulo anena Balanaba, ati: “Wewe! tuwele tukalole achitu yao chila nzi, muno twasunzile iswi lya Mwene, ngi yali uli.” 37Balanaba asita, kuti Yoane wino yatangi Malko, apite ponga nayo. 38Leelo wene Paulo atakasime kupita ponga na wiyo, wino wayasile uku Pamfilia, atapita ponga nayo um-milimo. 39Nga yampazyanya, apalinji yatana. Balanaba wapita ponga na Malko, yaakwela um-wato ukuya uku Kiplo. 40Paulo nawe wasolola Silasi, apita, angi alupepelwa nachitu yalye, apiwe inkumbu zya Mwene. 41Apita un-Silia ni Kilikia angi alukomya makongani.

Currently Selected:

Milimo 15: FNT1988

Highlight

Copy