Amarku 3

Andeobgo alomakyeŋ

1Eyesu a bla a gre anwyeakulu nga, a ka andeobgo alomakyeŋ ma. 2Moarekyeŋ la a klo o kla odlo ta la Eyesu a wo ma. Moa a kʼpu a klo o ka o dzu mbo Eyesu á shaŋ alom hi onda Asabat okyku eshi moa a klo o vu ŋa. 3Eyesu a nyuŋ andeobgo a lu mi le, O ba egi ayi. 4Nga Eyesu a zhĩ moare a lu mi le, Odaŋ o lu mi ma agi e kpo eshi onda Asabat? Ma agi e kpo e ghwo le, e kpo obi? Ma agi e shla esõ arehwĩ le, e bga lo? Akyeŋ a mbo eshki mo a tno ma a gbu mbo. 5Esõ e tpi Eyesu ayi pa la mo nzenze omba he lo, ambo ekakahelo a mbo Eyesu a ka mo ayiekŋe, okyku moa a shpi esõ e gre eshri. Eyesu nga a nyuŋ alom lo a lu mi le, O ndba obgo boŋ. A ndba lo nga a shaŋ. 6Ambla he nga moaEfarisi a zgi anwyeakulu a gre okyku o fu eshri pa la moa la a lu Ehirudu ma okyku o da mo a bga Eyesu.

Eshki moare akaŋ atam

7Eyesu pa la moanwyeotum baŋ a gre akaŋ atam ba Egalili, nga moare nzenze a lu ŋa ma. Moare a zgi obiŋ ba Egalili, ta la Eyahuda, 8ta la osku ba Orushalima, ta la obiŋ ba Edumiya, ta la ongre ondzu ba Ordu, ta la akekaŋ ba esku ba Ataya, ta la Esidoŋ. Moare nzenze a ba okro Eyesu okyku eshi moa a gno oshpa ayakplo baŋ a la a kpo. 9Eshki moare e gre eshri nga, okyku eka he Eyesu a nyuŋ moanwyeotum baŋ ma moa a nyuŋ amgblami a dze adzadzi a daŋ a tspi ma okyku o da moare a fye ŋa mbo. 10Eyesu a shaŋ moare nzenze, okyku eka he moare la a no olo a la a mu emo, okyku o da mo a tka ŋa. 11Ombayaŋ a mbo moa ba egbgabi andandandim e kpo otum pa la mo a ka Eyesu, moa a kpo nga a tsu a gbu obiŋ nga a ta enzi angyangyeŋ a lu mi le, Eyesu aŋo o wo Anwye Ahogbrẽ angyiŋ. 12Eyesu a jygu egbgabi lo odaŋ osheshye, a lu mi ma moa a lu baŋ a wo Anwye Ahogbrẽ a da arekyeŋ mbo.

Eyesu a sla moanwyeotum otsko

13Eyesu a vre akũ nga, a bzi moare baŋ a klo a da mo a ba okro baŋ. 14A sla otsko eskhi mo, nga a bzi moahi lo Moa la a nyum oshpa. A nyuŋ mo a lu mi le, Ame e sla gimi okyku o da gimi e dzu pa la me nga e hom gimi otum e da gimi e nyum oshpa. 15Agimi é hwiŋ ekʼpo okyku o se egbgabi andandandim o sku moare. 16Moa otsko baŋ a sla a ri Esima ba Eyesu a bzi ŋa Ebitru, 17ta la Eyakubu, ta la Eyohana moanwye Azabadi. Eyesu a bzi mo Obonigis. O dzu Moanwye la a wo eka Angyum Ogbu. 18Andru, ta la Efilibu, ta la Abatalamawu, ta la Amatiyu, ta la Otoma, ta la Eyakubu anwye Alafus, ta la Atadas, ta la Esima anwye obiŋ. 19Ta la Eyahuda Eskariyoti la a yla Eyesu.

Eyesu ta la Ebilazabuba

20Eyesu a kso akaŋ atam Egalili a gre odne, nga eshki e shki nzenze nga Eyesu ta la moanwyeotum baŋ a hwiŋ anvaŋ moa a ri algo mbo. 21Moare a la a lu mi le, Eyesu a dro. Omba moanáŋ Eyesu a gno eka he nga moa a gre eshki lo okyku o shri ŋa o ba odne. 22Moa la a nye odaŋ akyeŋ la a zgi Orushalima a ba a lu mi ma Ebilazabuba a kpo otum ta la Eyesu. Moakyeŋ a lu mi ma areŋ egbgabi angyiŋ a shri ekʼpo a da Eyesu eshri egbgabi, nga a la a se mo. 23Eyesu a bzi moare nga a ta egŋe andandandim ta la mo a zhĩ mo a lu mi le, Eshitaŋ e kpo anyu e se Eshitaŋ? 24Eyesu a sa a lu mi le, O wo ba obiŋ-okyeŋ o gʼba eŋa nga moa kpo ambgu ta la emo le, obiŋ lo ó tsu ó gbu. 25O wo ba ogu-okyeŋ o gʼba emo nga moa a la a kpo ambgu ta la emo le, ogu lo ó tsu ó gbu. 26O wo ba oreŋ ba Eshitaŋ o gʼba eŋa le, ó tspi gbagbu mbo, ó tsu ó gbu.

27Arekyeŋ a kpo a gbu baŋ a gom odne are la a wo oshye a yi a si esi ma mbo, o wo le a vu are odne lo a bʼbu endzi ayga dne a kpo a gbu baŋ a gom lo nga a si. 28Agimi e tne aga e ka! Ahogbrẽ á kyu moare abgo ayakplobi moa a la a kpo pyeŋ, ta la ayakplobi la a zgi anyu mo la a wo nzenze ekayaŋ a mbo. 29Ambo are la a lu odlobi eshri Ogbgaodzi le, Ahogbrẽ á kyu ŋa abgo ombgu mbo ku-ku. Odlobi baŋ ó dzu eshri baŋ gbagbu-amo. 30Eyesu a lu eka he okyku eshi moakyeŋ a lu mi ma aŋa a kpo otum ta la ogbgabi.

Anaŋ Eyesu ta la moanáŋ

31Ambla fi nga anaŋ Eyesu ta moanáŋ a gbu. Moa a tspi ekpazhi nga moa a bzi Eyesu a daŋ a ba. 32Moare la a shki a ta Eyesu a kpaŋ a lu a daŋ a lu mi le, Eyesu, anoŋ, ta la moanóŋ a klo ŋo edzi. 33Eyesu a zhĩ mo a lu mi le, Ayi angyiŋ a wo anungu? Moayi angyiŋ a wo moanime? 34Eyesu a ka eshki tki nga a lu mi le, E ka, agimi angyiŋ e wo anungu pa la moanime. 35Are la a la a kpo ekplo ba Ahogbrẽ a klo angyiŋ a wo anime-alalom, ta la anime-alashle, ta la anungu.

Currently Selected:

Amarku 3: EGONT74

Highlight

Copy