Amarku 13
13
Eyesu a lu ba Anyuŋ-akulu á ba a kypi
1Omba ba Eyesu a zgi Anyuŋ-akulu nga, anwyeotum baŋ akyeŋ a nyuŋ ŋa a lu mi le, O ka, Andakʼpo, anyuŋ ézhim ta la adne he. 2Eyesu a tno ŋa ma a lu mi le, Anyuŋ adne, ta la anyuŋ ézhim boŋ o ka lo he, moa á kypi á ygi obiŋ mvye.
Ewu andandandim
3Omba ba Eyesu a vre a dzu akũ ba olivi a wo ma, a ka Anyuŋ-akulu, nga Ebitru ta la Eyakubu ta la Eyohana ta la Andru a ba okro baŋ shu. 4Moa a zhĩ ŋa a lu mi le, O lu o da gi omba ba akplo he lo á ba a kpo, nga eshi é ba e tsa gi omba ba akplo he lo á ba a kpo? 5Eyesu a shĩ mo a lu mi le, Agimi e nyuŋ e ka, e da arekyeŋ a bile gimi mbo. 6Moare nzenze á ba a ba eshko me á lu mi le, Ame angyiŋ e wo Ekristi. Nga moa á bile moare. 7Agimi e kpo eyli omba bimi e gno oshpa ba eko obiŋ bimi, ta la ebiŋ ehwõ mbo. O dzu omgbybi ba edgu ayakplo he lo á ba a kpo, ambo omba ba obiŋ ó kso angyiŋ a wo mbo. 8Obiŋ ó ta eko ta la obiŋ, oreŋ ó ta eko ta la oreŋ. Obiŋ ó suŋ ayaŋ a mbo nga embyle é kpo. Akplo he lo á vu olo eka ewu ba ashe a kpo omba baŋ a mbre.
9Agimi e nyuŋ e ka, okyku eshi moare á vu gimi nga á shri gimi á yi aku ombgu. Moa á bga gimi akulu nga agimi é zgi egŋe Oshpaodzadzi me egi ayi moareŋ, ta la moanyuŋ-areŋ. 10O dzu omgbybi ba moa á nyum Oshpaodzadzi á ygi moare mvye ayga. 11Omba moa a vu gimi a shri a gre aku ombgu le, e kpo esõ bimi ewu e tne aga ekplo bimi é lu mbo. Omba bimi e gre, ekployaŋ a mbo bimi é ba e lu, Ogbgaodzi angyiŋ ó tsa gimi. 12Moare á rʼgu moanimo á da mo a bga mo. Moadimoanwye á rʼgu moanwye moa nga á da mo a bga mo. Moanwye á rʼgu moadimo nga á da mo a bga mo. 13Moare mvye á tla gimi okyku me. Ambo, are la a kom odlo me la osheshye esõ baŋ o tsa onda amom-abgo le, á ba a gro.
Akplo ba Eyli Nzenze
14Agimi é ka Akplo ba Eyli Nzenze á tspi okro la o raŋ baŋ a tspi ma mbo. Are la a tsi okro he lo a tne adzadzi a ka. Omba he lo moa la a wo Eyahuda á zgi á knye á yi akukũ. 15Are la a wo eshri aku ongyeŋ le, o raŋ o gre baŋ a tpi omba ayi a gile a yi a sko emakyeŋ odne mbo. 16Are la a wo agbi a knye a yi a sko arigakyeŋ odne mbo. 17Omba he lo moa la a kpo onyi, pa la moa la a shri moanwye able á kpo ewu nzenze. 18E fa olu okyku o da omba he lo o gbu omba ogbu o ba mbo. 19Ewu ba omba he lo é gre edgu ewuyaŋ a mbo moare a yi, a zga omba ba Ahogbrẽ a kpo obiŋ hi. Ambla he nga ekplokyeŋ eka he lo é kpo nga mbo. 20Ambo Ahogbrẽ a fa omba a ra, o wo baŋ a kpo eka he mbo e mbi arekyeŋ á gro mbo. Ambo okyku moarehwi ba Ahogbrẽ a sla a fa omba a ra.
21Eyesu a lu mi le, O wo ba arekyeŋ a lu a da gimi a lu mi le, E ka, Emisiya a wo ahe! O mbo le, Emisiya a wo a mi! Agimi e bmi ba adlidzi ka la ŋ a mbo. 22Emisiya ba akpro é zgi nzenze, pa la moarehwi la á ba a sheŋ akpro ma Ahogbrẽ a hom mo otum. Moahi lo á kpo ayakplo egbregbre okyku o bile moarehwi ba Ahogbrẽ a sla. 23Ambo, agimi e dzu e kʼpu, ame e sheŋ e lu e da gimi.
Oba-ba Anwye Arehwĩ
24Ambla ba ewu he lo, olum ó tra mbo, oha a mbo ó tra mbo. 25Eyienzo é gʼbu é ygi obiŋ nga ayakplo egbregbre la a wo ongyeŋ é knye é sku ozhẽ moa a la a sõ. 26Nga Anwye Arehwĩ á ra á tspa nga á gile etabro la ekʼpo, la esesla, á ba. 27Á hom moanwyeadga otum á yi emvygi enyi ba obiŋ hi lo mvye, nga moa a pla moarehwi ba Ahogbrẽ a sla pyeŋ.
Onyenye eshri esi ebro
28Agimi e da esĩ ebro e nye gimi. Omba ba embgu lo e jygu ayeya lgilgilgi, agimi e yi ba ongʼbo o wo osusku a mo. 29Ekakahelo, o wo bimi e ka edgu ayakplo hi a kpo le, agimi e dzu la aga ba omba o wo osusku a mo. 30E gno, moarehwi ba omba he lo á kpu mbo, o wo le akplo ahi lo á bli ayga dne. 31Ongyeŋ, ta la obiŋ hi, ó bre ó yi, ambo odlo me ó bre ó yi ku-ku mbo.
Arekyeŋ a yi omba lo mbo
32Eyesu a lu mi le, Arekyeŋ a yi onda o mbo le awa lo ku-ku mbo. Moanwyeadga Ahogbrẽ la a wo Ongyeŋ, ta la Anwye a mbo, moa a yi mbo, o wo le Ada sha. 33E dzu e kʼpu okyku eshi agimi e yi omba lo mbo. 34O dzu eka ba arekyeŋ a shri otum a ghwo moanwye-odne baŋ abgo nga a gre odzi, nga baŋ a da are la a kʼpu ayizhẽ odne lo a kʼpu. 35Agimi e dzu e kʼpu ngre okyku eshi agimi e yi omba ba are-odne á ba mbo. Á ba olum-ore a mu, á ba ekpatspe okyukyku a mu, á ba la engo etko a mu, á ba la etetne a mu, 36agimi e dzu e kʼpu, okyku o daŋ a gnyu gimi omba bimi e wo enu e ndze mbo. 37Oshĩ ba ame e lu e da gimi, e lu e da areyaŋ a mbo. E dzu e kʼpu!
Currently Selected:
Amarku 13: EGONT74
Highlight
Share
Copy
Want to have your highlights saved across all your devices? Sign up or sign in
Eggon New Testament © United Bible Societies, 1974. Bible Society of Nigeria
