Amarku 1

Oshpa ba Eyohana la a kpo abaptisma a nyum

1Esĩ ba Oshpaodzadzi ba Eyesu Ekristi Anwye Ahogbrẽ. 2Oshpa lo o zga esĩ eka ba Eshaya arehwĩ ba Ahogbrẽ a hom otum a ta akpa baŋ a lu mi le,

Ahogbrẽ a lu mi le, Anwyeadga me a wo ahe. Ame e hom ŋa otum okyku o gre ŋo ozhẽ nga okyku o daŋ a hwile ozhẽ okyku ŋo.

3Arekyeŋ a la a su osu akla a lu mi le,

E nyuŋ ozhẽ Adigi-odne e kpo okyku ŋa,

E kpo ozhẽ la o wo tsoŋ okyku o daŋ a dzi ma.

4Eyohana a gre akla nga a la a kpo moare abaptisma nga a nyum oshpa. Eyohana a nyuŋ moare a lu mi le, Agimi e nyiŋ odzudzu bimi okyku o da me e kpo gimi abaptisma. Ahogbrẽ nga á kyu gimi abgo odlobi bimi. 5Areyaŋ a mbo a zgi obiŋ ba Eyahuda ta la osku ba Orushalima a gre akla okyku o gno oshpa lo. Moarehwi a zgi egŋe odlobi mo nga Eyohana a kpo mo abaptisma ondzu ba Ordu.

6Eyohana a ygi aknye moa a ngʼgo lo la amasẽ ebyi moa a bzi lo ma arakumi. Nga a kpmye ashye akpa osĩ baŋ. A taŋ amgbatso nga a ri eso. 7A su a da moare a lu mi le, Are la á ba ambla me, a wo ekʼpo ma a gre me, ame e tse ma ba ame e gbyle e ngla akpadga baŋ mbo. 8Ame e la e kpo gimi abaptisma la amihĩ, ambo aŋa á kpo gimi abaptisma la Ogbgaodzi.

Abaptisma ta la ombambga ba Eyesu

9Ambla fi nga, Eyesu a zgi Anazarata obiŋ ba Egalili a ba okro Eyohana, nga Eyohana a kpo ŋa abaptisma ondzu ba Ordu. 10Ambla ba Eyesu a zgi ami nga, a ka Ongyeŋ o hwile, nga Ogbgaodzi eka aklungu o gile o ba eshri baŋ. 11A gno enzi e zgi Ongyeŋ e lu mi le, Eyesu aŋo o wo anwye esõ me angyiŋ, ame e gno oraŋ ka la ŋo e gre eshri.

12Ogbgaodzi o da Eyesu a gre akla ebuebu. 13Eyesu a wo akla ta la ebyi akla elum ekʼpoenyi. Eshitaŋ e mbga ŋa e ka. Ambla he nga moanwyeadga ba Ahogbrẽ a ba a kpo a ghwo la ŋa.

Eyesu a bzi moare anyi la a kpo atsa

14Ambla moa a vu Eyohana la a kpo abaptisma a ta aku, Eyesu a gre Egalili nga a nyum Oshpaodzadzi la o zgi okro Ahogbrẽ. 15Eyesu a lu mi le, Omba lo o ba bgu, nga Oreŋ Ahogbrẽ o wo osusku a mo. Agimi e kyu odlobi abgo nga e yga Oshpaodzadzi he lo.

16Omba ba Eyesu a dzi akaŋ atam ba Egalili nga, a ka moaha la a vu atsa ba eshko mo e ri Esima ta la anáŋ Andru moa a la a vu atsa atam la ekyeŋ. 17Eyesu a lu mi le, E lu me ma, ame é da gimi é dzu moa la a vu moarehwi. 18Ebuebu moa a ndba ekyeŋ atsa mo a ygi nga a lu Eyesu ma.

19A dzi a gre fi nga, a ka Eyakubu ta la anáŋ, Eyohana, moanwye Azabadi. Moa a wo amgblami a la a nyiŋ ekyeŋ mo a kpo. 20Eyesu a ka mo nga a bzi mo. Moa a kso a dzu adimo ta la moarehwi la a kpo mo otum a zga, nga a lu Eyesu ma.

Are ba ogbgabi o kpo ŋa ewu

21Eyesu pa la moare la a lu ŋa ma a ba osku ba Akafanahum, onda Asabat#Olum moaEyahuda a la a dzu a dum. nga a gre anwyeakulu nga a nye moare odlo Ahogbrẽ. 22Moare la a wo ma, a ka egbregbre nzenze, okyku eka baŋ a nye mo. O wo eka moahwõ la a nye odaŋ Ahogbrẽ mbo, ambo a nye mo la ekʼpo Ogbgaodzi.

23Omba he lo nga alomakyeŋ ba ogbgabi o kpo otum ka la ŋa a ba anwyeakulu nga, ogbgabi lo o ta enzi angyangyeŋ o lu mi le, 24Eyesu ba Anazarata, o klo eshi ka la gi? O ba okyku o bga gi angyiŋ? Ame e yi ŋo, aŋo o wo Anwyeadga ba esesla ba Ahogbrẽ angyiŋ. 25Eyesu a shrom ogbgabi lo a lu mi le, Aŋo o dzu tki nga o zgi o sku ŋa. 26Ogbgabi lo nga o da alom a sheŋ ayaŋ a dga, nga o ta enzi angyangyeŋ, nga o zgi o sku ŋa. 27Moarehwi a ka egbregbre a gre eshri nga a zhĩ emo ma, Eshi eka he? Onyenye ohekyeŋ mi e tu? E ka, alom he a wo ekʼpo ma baŋ a shrom egbgabi nga e gno ŋa. 28Nga oshpa ba Eyesu o ngla o tsi o gre obiŋ ba Egalili.

Eyesu a shaŋ moare nzenze

29Eyesu pa la moanwyeotum baŋ anyi a zgi akulu nga a gre odne ba Esima ta la Andru otsotse, ta la Eyakubu, ta la Eyohana. 30Anaŋ ashe Esima a lom obiŋ okyku eshi ogbga o vu ŋa. Omba ba Eyesu a gbu odne lo nga, moa a lu a daŋ. 31Eyesu a gre osusku ka la ŋa, nga a vu ŋa obgo, nga a si ŋa a daŋ a dzu okũ, nga a shaŋ ŋa. Ashe lo nga a shri algo a da mo a ri.

32Olum-ore, omba ba olum o gbu nga, moare a shri moa la a no olo, pa la moa ba egbgabi e kpo mo ewu, a ba okro Eyesu. 33Moare nzenze ba osku ba Akafanahum a ba a tspi akaŋ odne ba Esima ta la Andru. 34Eyesu a shaŋ moa la a no olo andandandim, nga a se egbgabi nzenze. Eyesu a da mo ozhẽ a lu akplokyeŋ mbo, okyku eshi moa a yi ŋa.

Eyesu a nyum oshpa Egalili

35Endigigiŋ onda oha nga, Eyesu a zgi a sku odne lo, nga a zgi a sku osku lo a gre okrokyeŋ la o wo yoŋ, okyku o fa olu. 36Esima pa la moakyeŋazba a klo Eyesu. 37Omba moa a hwiŋ ŋa nga, moa a lu mi le, Areyaŋ a mbo a klo ŋo ba anyanye. 38Eyesu a tno mo ma lu mi le, Agimi e da gi e yi e nyum oshpa anwye esku la a wo akekaŋ ahe. O dzu omgbybi ba ame e nyum oshpa e da mo a mbo, okyku eshi ame e ba okyku lo angyiŋ. 39Eyesu a gre esku andandandim obiŋ ba Egalili nga a nyum oshpa anwyeakulu, nga a se egbgabi nzenze.

Eyesu a shaŋ agbueshru

40Agbueshrukyeŋ a ba a kʼpu obiŋ egi ayi Eyesu nga a nyuŋ ŋa a lu mi le, O wo boŋ o klo le, aŋo o wo ekʼpo ma boŋ o shaŋ me. 41Eyesu a ka ayiekŋe baŋ nga a ndba obgo a tka ŋa nga a lu mi le, Ame e bmi, o shaŋ. 42Ebuebu nga alom he lo a shaŋ. 43Omba baŋ á ba a yi a mo, Eyesu a shĩ ŋa a lu mi le, 44O gno, o lu o da arekyeŋ ku-ku mbo. Ambo o yi okro ba andakʼpo olu ba Ahogbrẽ okyku o daŋ a mbga ŋo a ka, nga o shri oshriondba ba ebyi eka ba Omusa a lu, o shri o di okyku o da areyaŋ a mbo a yi boŋ o shaŋ. 45Alom lo a zhiŋ ogbu a khwo nga a lu ekplo la e kpo ka la ŋa a da areyaŋ a mbo. Oshpa otum ba Eyesu o gbu edzi o gre eshri, okyku eka he a kpo a gbu baŋ a yi osku lo la eyayi mbo, ambo a dzu ekro la e wo yoŋ, nga moare a zgi ekro andandandim a ba okro baŋ.

Currently Selected:

Amarku 1: EGONT74

Highlight

Copy