Amatiyu 26

Moa a hwim ba o bga Eyesu

1Ambla ba Eyesu a nye moare a khwo nga, a nyuŋ moanwyeotum baŋ a lu mi le, 2Ambla ba elum eha, eka bimi e yi, moa á kpo abgo ba Apaska, nga moa á shri Anwye Arehwĩ á da mo a gŋe ŋa egŋe aki.

3Moandakʼpo olu ba Ahogbrẽ, pa la moandakʼpo moaEyahuda a gre a yi a kpo eshki odne ba Akayafa Anyuŋ andakʼpo olu ba Ahogbrẽ. 4Moa a fu eshri ba moa á ba a vu Eyesu nga á bga ŋa. 5Moa a hwim a zga ma a lu mi le, Agi é vu ŋa omba ba abgo ba Apaska he mbo, okyku o da moare á kpo ambgu mbo.

Moa a khwa Eyesu awargi osku ba Ebetanya

6Omba ba Eyesu a wo odne ba Esima la a gbu eshru osku ba Ebetanya, 7ashekyeŋ a shri embdzu ba ezhim alabasta, a bli lo la awargi la a shka efpi, la o wo egbmo nzenze. Omba ba Eyesu a ri algo nga, a shri lo a shri a khwa Eyesu eshri. 8Moanwyeotum baŋ a ka eka he nga esõ e tpi mo ayi, nga moa a zhĩ a lu mi le, Okyku eshi aŋo o tpi awargi hi ayi eka he? 9O raŋ o gre moa a shri awargi lo a gbmo la amgbaŋ nzenze nga a shri a gʼba moaekŋe o sku moa a tpi lo ayi eka he! 10Eyesu a ka ekplo moa a lu a bmye, okyku eka he a tno ma a lu mi le, Okyku eshi agimi e kpo ashe he ewu? Aŋa a kpo ekplo la e wo edzadzi angyiŋ okyku me. 11Agimi e dzu pa la moaekŋe ombamba mvye, ambo ame é dzu ka la gimi ombamba mvye mbo. 12Ashe he lo a khwa me awargi he lo egʼba okyku moa á ba a ngybi me. 13Agimi e tne e ka! Okroyaŋ a mbo, ba moa a nyum oshpa he lo ma, moa á tne aga ashe he lo.

Eyahuda Eskariyoti a bmi a yla Eyesu

14Akyeŋ eshki moanwyeotum otsko ba Eyesu, eshko baŋ e ri Eyahuda Eskariyoti, a gre okro moandakʼpo olu ba Aho-gbrẽ, 15nga a lu mi le, O wo ba ame e shri Eyesu e da gimi le, agimi é shri eshi é da me? Moandakʼpo olu ba Ahogbrẽ a tsi amgbaŋ azurfa ekʼpoetra a shri a daŋ. 16A zga omba ba Eyahuda a yga amgbaŋ he lo a khwo nga, a klo ozhẽ okyku o daŋ a yla Eyesu.

Eyesu a ri abgo Apaska pa la moanwyeotum baŋ

17Olum ori ba moa a ri abgo o taŋ agbrotsa la a nyom mbo, moanwyeotum a gre okro Eyesu a zhĩ ŋa a lu mi le, O klo bi e yi e ri abgo ba Apaska ayaŋ angyiŋ? 18Eyesu a nyuŋ moanwyeotum baŋ a lu mi le, Agimi e yi okro álomakyeŋ osku ba Orushalima, nga e nyuŋ ŋa e lu mi le, Andakʼpo a lu mi ma omba baŋ o kpo bgu, okyku eka he, ma aŋa a klo o ri abgo Apaska pa la moanwyeotum baŋ odne boŋ. 19Moanwyeotum baŋ a kpo eka baŋ a tsa mo, nga moa a nyuŋ okro a kpo okyku o ri abgo Apaska.

20Olum-ore nga, Eyesu pa la moanwyeotum baŋ otsko a gre o yi o ri abgo. 21Omba ba moa a ri abgo lo nga, Eyesu a nyuŋ moanwyeotum baŋ a lu mi le, Ame e lu e da gimi, akyeŋ eshki bimi á yla me. 22Amgboŋ odlo he lo a tpi moanwyeotum baŋ esõ ayi nzenze. Moa a zhĩ ŋa ba akya-kyakyeŋ a lu mi le, Adigi, eka boŋ o ka, ame angyiŋ? 23Eyesu a tno mo ma a lu mi le, Are la a ri algo otsotse pa la me angyiŋ á ba a yla me. 24Anwye Arehwĩ á kpu eka ba Akpa ba Aho-gbrẽ a lu. Ambo a ba eshri are la á ba a yla Anwye Arehwĩ! O raŋ o gre e mbi moa a mbre are he lo mbo! 25Eyahuda la a yla Eyesu a zhĩ a lu mi le, Andakʼpo, ame angyiŋ e wo are la á ba a yla ŋo? Eyesu a tno ma a lu mi le, Aŋo o lu shasha.

Abgoeku ba Adigi-odne

26Omba ba moa a la a ri abgo Apaska, Eyesu a sko agbrotsa nga a vye la Ahogbrẽ a khwo nga, a buŋ lo agbu nga a shri a da moanwyeotum baŋ, nga a lu mi le, Agimi e yga e taŋ, alo a dzu egʼba me angyiŋ. 27A sa a sko etku ami nga, a vye Ahogbrẽ a khwo nga a shri lo a da mo nga a lu mi le, Agimi e yga e wa. 28Alo a dzu amanzhli me angyiŋ, alo angyiŋ á bli ohwihwim ba Ahogbrẽ. Moa á zhiŋ amanzhli me á ygi a bi okyku o da Ahogbrẽ a kyu moare nzenze abgo odlobi mo. 29Ame e lu e da gimi, ame é wa ami he lo nga mbo ku-ku, o wo le onda mi lo dne a mo, omba ba ame é ba e wa lo otsotse ka la gimi Oreŋ ba Adugu. 30Ambla moa a ri abgo a khwo nga, moa a fu abmo nga, moa a zgi a gre Akũ ba Olivi.

Eyesu a yi ba Ebitru á ba a dzu evom baŋ

31Ambla he nga Eyesu a nyuŋ moanwyeotum baŋ a lu mi le, Okyukyku hi, agimi mvye é knye é dzu me é zga okyku eshi moa a ta Akpa ba Ahogbrẽ a lu mi le, Ahogbrẽ á bga are la a kpaŋ ékylu nga ékylu lo é som ayi. 32Ambo ambla ba moa á kso me ongybi, ame é yi Egalili é sku gimi. 33Ambo Ebitru a nyuŋ Eyesu a lu mi le, Moahwõ á knye á dzu ŋo á zga, ambo ame é knye é dzu ŋo é zga ko mbo! 34Eyesu a tno Ebitru ma a lu mi le, Ebitru, aŋo ó dzu evom me engyi etra ayga engo é ba e tko okyukyku hi! 35Ebitru a tno ma a lu mi le, Ame é dzu evom boŋ tsi mbo ku-ku. O wo ba ame e kpu ka la ŋo a mbo, ame e bmi! Moanwyeotum ahwõ a mbo a lu ekakahelo.

Eyesu a fa olu agbi ba Egetsemani

36Eyesu pa la moanwyeotum baŋ a gre agbi ba Egetsemani, nga a nyuŋ mo a lu mi le, Agimi e dzu ahe e bli me. Ame é yi okro mi é fa olu ayga. 37Eyesu a da Ebitru pa la moanwye Azabadi aha a gre ka la ŋa. Omba he lo esõ e bili ŋa e gre eshri. 38Eyesu a nyuŋ moanwyeotum baŋ a lu mi le, Esõ e bili me e gre eshri, o wo me eka ame é ba e kpu! Agimi e dzu ahe, nga e kʼpu pa la me. 39Eyesu a kye a gre fi nga, a dzu obiŋ, nga a ghwo eshri obiŋ nga, a fa olu a lu mi le, Adugu, o wo ba alo o kpo o gbu e mbi, o sko ewu he lo o sku me! O kpo ekplo ba ame e klo angyiŋ mbo, ambo o kpo ekplo boŋ o klo.

40Aŋa a bla a gre okro moanwyeotum atra nga, a ka mo a ndze enu. A nyuŋ Ebitru a lu mi le, Eshi eka he, agimi atra e kpo e gbu bimi e dzu e kʼpu pa la me okyku awa akyeŋ a mbo mbo? 41Agimi e kʼpu nga e fa olu, okyku o da gimi e tsu e gbu ombambga mbo. Ame e ka, agimi e bmi la esõ bimi, ambo, agimi e da egʼba e shki gimi ami.

42Eyesu a bla a gre okro lo odgo oha, nga a fa olu a lu mi le, Adugu, o wo boŋ o ka ba alo o raŋ o gre ba ame e kpo ewu he lo, o kpo ekplo la e raŋ ŋo esõ. 43A bla a ba nga a ka moanwyeotum baŋ atra lo a ndze enu. Moa a dzu a kʼpu ta la Eyesu a gbu mbo.

44Eyesu a bla a gre odgo otra nga a dzu mo a zga, nga a fa olu eka baŋ a fa oriori. 45A sa a bla a ba okro moanwyeotum atra lo nga a zhĩ a lu mi le, Ma-me o ta ohuhuhi agimi e wo odzudum ibu enu bimi e la e ndze? E ka! Omba o kpo ba moa á vu Anwye Arehwĩ á shri á da moarehwĩ ba odlobi bgu. 46E kso, e da gi e yi. E ka, are la a la a yla me a wo osusku a mo!

Moa a vu Eyesu

47Omba ba Eyesu a la a kpla egba, Eyahuda, akyeŋ eshki moanwyeotum otsko a gbu. Moare nzenze la a shri akõ, ta la emgbu api, moa a ba ta la Eyahuda. Moandakʼpo olu ba Ahogbrẽ pa la moandakʼpo moaEyahuda angyiŋ a hom mo otum okyku o da mo a vu Eyesu. 48Are la a yla Eyesu a sheŋ a tsa moare lo a lu mi le, Are ba ame e shri anyu me e tka a baŋ, aŋa angyiŋ a wo a bimi é ba e vu ŋa. E vu ŋa! 49Omba ba Eyahuda a gbu nga, a ba okro Eyesu nga a nyuŋ ŋa a lu mi le, Andakʼpo, o da esõ e gbu ŋo obiŋ. Ambla he nga a gre a shri anyu baŋ a tka a ba Eyesu. 50Eyesu a tno ŋa ma a lu mi le, Alom! O tpi omba ayi mbo! Moare a ba nga, a vu Eyesu nga a fye ŋa gaŋ. 51Akyeŋ eshki moanwyeotum ba Eyesu a se akõ baŋ nga, a hli otuŋ ba anwye-odne ba anyuŋ andakʼpo olu. 52Ambo Eyesu a nyuŋ ŋa a lu mi le, O bla akõ boŋ o ghwo ohre lo. Areyaŋ a mbo la a bga la akõ á kpu la akõ. 53Aŋo o yi mbo? O wo ba ame e vẽ Adugu ohuhuhi, a kpo a gbu baŋ a shri eshki moanwyeadga la e gre otsko, a da mo a ba a kpo a ghwo la me. 54Ambo, o wo ba ame e kpo eka he le, ayakplo ba moa a ta Akpa ba Ahogbrẽ ma alo é kpo é bli nga?

55Eyesu a lu odlo pa la moare a lu mi le, Agimi e shri akõ, ta la emgbu api e ba okyku o vu me? Ame e wo arehwĩ la a gre abgo angyiŋ? Ombayaŋ a mbo ame e dzu e nye gimi Anyuŋ-akulu ambo agimi e vu me mbo. 56Ahi lo o kpo mvye, okyku o da ayakplo ba moarehwĩ ba Ahogbrẽ a hom otum, a ta Akpa ba Ahogbrẽ a bli angyiŋ.

Omba he lo, moanwyeotum baŋ mvye a knye a dzu ŋa a zga.

Moa a sõ Eyesu ombgu

57Moa la a vu Eyesu a shri ŋa a gre odne anyuŋ andakʼpo olu ba Ahogbrẽ, eshko baŋ e ri Akayafa. Moa la a nye odaŋ, pa la moandakʼpo a wo odne lo okyku o sõ ombgu. 58Ebi-tru a lu Eyesu ma ambla ma-me nga a gre ekpazhi anyuŋ andakʼpo olu ba Ahogbrẽ. A gre a yi a dzu pa la moanwyea-kyuŋ la a kʼpu odne anyuŋ andakʼpo olu ekpazhi otsotse, okyku o daŋ a ka eka ekplo la é ba e kpo. 59Moandakʼpo olu, pa la moa la a sõ ombgu mvye a klo moaegŋe akpro eshri Eyesu, okyku o da mo a sheŋ ombgu eku eshri baŋ. 60Ambo moa a kpo a gbu a hwiŋ ozhẽ mbo, o ba alo o wo moare nzenze a ba a zgi egŋe akprokpro eshri baŋ. Ambla ekpyemgbyeŋ nga, moarehwĩ aha a ba, 61moa a lu mi ma Eyesu a lu mi ma aŋa á kpo á gbu baŋ á kypi Anyuŋ-akulu ba Ahogbrẽ nga, á bla alo á mbdzi á khwo ambla ba elum etra.

62Anyuŋ andakʼpo olu ba Ahogbrẽ a kso a zhĩ Eyesu a lu mi le, Aŋo o wo otnoma eshri odlo moa a lu eshri boŋ he mbo? 63Eyesu a dzu ŋa tki, nga anyuŋ andakʼpo olu ba Ahogbrẽ a nyuŋ ŋa a lu mi le, Ame e vẽ ŋo eshko Ahogbrẽ la a wo esõ ma, o wo boŋ o wo Emisiya Anwye Ahogbrẽ angyiŋ le, o lu o da gi. 64Eyesu a tno ŋa ma a lu mi le, Aŋo o lu shasha. Ambo ame e lu e da gimi, omba ó yi o ba ba agimi é ba e ka Anwye Arehwĩ á dzu obgori ba Ahogbrẽ la a wo ekʼpo pyeŋ, nga aŋa á gile etabro ba ongyeŋ á sa á ba! 65Eyesu a lu eka he a khwo nga, anyuŋ andakʼpo olu ba Ahogbrẽ a dle ariga baŋ nga a lu mi le, Agimi andakʼpo e gno baŋ a lu odlobi eshri Ahogbrẽ! Agi e klo moaegŋekyeŋ e gre eka he nga mbo! Agimi e sheŋ e gno odlo ototno baŋ a lu! 66Anyuŋ andakʼpo olu ba Ahogbrẽ lo a zhĩ mo a lu mi le, Agimi andakʼpo mvye e ka anyu? Moa a tno ma a lu mi le, Ombgu o vu ŋa. O dzu omgbybi moa a bga ŋa.

67Ambla he nga, moa a ta akyi a ygi ŋa eyayi, nga moa a yla ŋa, nga moa a lu mi le, 68Emisiya, o lu o da gi, ayi angyiŋ a yla ŋo andzu?

Ebitru a dzu evom Eyesu

69Omba ba Ebitru a dzu ekpazhi odne ba anyuŋ andakʼpo olu ba Ahogbrẽ nga, anwyeshe-odne he lo a ba a lu ka la ŋa, a lu mi le, Aŋo bubgu o wo ta la Eyesu alom ba Egalili. 70Ambo Ebitru a tla egi ayi moare la a wo ekpazhi pyeŋ a lu mi le, Ame e yi ekplo boŋ o lu tsi a mbo mbo. 71Ebitru a gre a yi a tspi ayizhẽ esakpa. Anwyeshe-odne akyeŋ a ka ŋa nga a lu a da moarealom la a wo ma, a lu mi le, Aŋa a wo ta la Eyesu ba Anazarata angyiŋ. 72Ebitru a dzu evom gaŋ, nga a lu mi le, Ame e yi alom he lo ku-ku mbo! 73Ambla fi nga, moarealom la a wo ekpazhi lo a ba okro Ebitru nga moa a nyuŋ ŋa a lu mi le, Aŋo o wo akyeŋ eshki moanwyeotum baŋ angyiŋ, okyku eshi edgu odlo boŋ o lu o zgi egŋe boŋ o wo ta la Eyesu angyiŋ! 74Ebitru a kʼpi ashum a lu mi le, Ahogbrẽ a da ewu e hwiŋ me, o wo ba ame e sheŋ akpro angyiŋ! Ame e yi alom hi lo mbo! Omba he lo nga engo e tko, 75nga Ebitru a tne aga eka odlo ba Eyesu a lu a daŋ, Aŋo ó dzu evom me engyi etra ayga engo é ba e tko. Aŋa a zgi nga a wu okũ la o vu olo nzenze.

Currently Selected:

Amatiyu 26: EGONT74

Highlight

Copy