Oluka 6:27-49

Ambo ame e lu e da gimi la e gno odlo me. O klo moafpu ŋo, nga o kpo odzi pa la moa la a klo ŋo mbo. O fa anyuadzi o ygi moa la a la a ta anyuabi a ygi ŋo. O fa olu okyku moa la a kpo ofpu ka la ŋo. O wo ba arekyeŋ a yla ŋo obgo agba le, o daŋ a yla ŋo agba ba oha a mbo. Nga o wo ba arekyeŋ a ngʼga anyuŋ ariga boŋ o daŋ a yga ariga atsitsi boŋ a mbo a ta ma. O kpo o ghwo areyaŋ a mbo la a vẽ ŋo emakyeŋ. Nga o wo ba arekyeŋ a sko ema boŋ le, o bla alo o yga mbo. O kpo moahwõ edgu ayakplo boŋ o klo moa a kpo ŋo. O wo boŋ o klo moare la a klo ŋo sha le, okyku eshi aŋo o klo moa a shri owlama a shri a doŋ? Moa la a kpo odlobi a mbo a klo moa la a klo mo sha! Nga o wo boŋ o la o kpo odlodzi pa la moare la a la a kpo odlodzi ka la ŋo sha le, okyku eshi aŋo o klo moa a shri owlama a shri a doŋ? Moa la a kpo odlobi a mbo, a la a kpo ekakahelo! Nga o wo boŋ o kʼpo moare anzho la aga ba moa á ba a bla á hre ŋo le, okyku eshi aŋo o klo moa a shri owlama a shri a doŋ? Moa ba odlobi a mbo a la a kʼpo moare la a wo eka mo, la aga ba moa á ba a bla ekplo moa a shri a da mo á ba a shri á da mo! O klo moafpu ŋo, nga o kpo mo odlodzi. O kʼpo mo anzho, la aga moa á ba a bla alo á doŋ mbo. O wo boŋ o kpo eka he le, aŋo ó hwiŋ anyuŋ egbre. Nga ó dzu anwye Ahogbrẽ la a wo Esesla a gre pyeŋ, okyku eshi Ahogbrẽ a la a ka moa la a vye la ŋa mbo, pa la moa ba odlobi pyeŋ angyiŋ ayiekŋe. O ka ayiekŋe, eka ba Adoŋ a mbo a ka ayiekŋe. O sõ arekyeŋ ombgu mbo okyku o da Ahogbrẽ a sõ ŋo ombgu mbo. O shraŋ moahwõ mbo okyku o da Ahogbrẽ a mbo a shraŋ ŋo mbo. O kyu moahwõ abgo akpu ba moa a la a ta egi ayi boŋ, Ahogbrẽ nga á kyu ŋo abgo odlobi boŋ o kpo egi ayi baŋ. O kpo o ghwo la moahwõ, Ahogbrẽ nga á kpo á ghwo la ŋo. Ahogbrẽ á kpo á ghwo la ŋo nzenze. Okpoghwo ba esõ-ekyekyeŋ angyiŋ aŋo ó ba o hwiŋ. Eka boŋ o kpo pa la moahwõ, ekakehelo angyiŋ moa á ba a kpo ka la ŋo. Eyesu a sa a ta egŋe a lu mi le, Avgayi a kpo a gbu baŋ a shri avgayi opi mbo. O wo ba avgayi a shri avgayi opi le, moaha lo pyeŋ moa á tsi á gbu enzhe. Anwye-engla a wo anyuanyuŋ a gre are la a nye ŋa mbo. Ambla baŋ a nye a khwo bgu le, á dzu eka are la a nye ŋa. Okyku eshi aŋo o dzu o ka aso la a wo eyi anóŋ, ambo aŋo o dzu ogbuokõ la o wo eyi boŋ o zga? Aŋo ó kpo ekayaŋ ó ba o lut a la anóŋ o lu mi le, O da me e se ŋo aso eyi, ambo aŋo o dzu ogbuokõ la o wo eyi boŋ o zga? Aŋo are la o kpo abibli. O se ogbuokõ la o wo eyi boŋ ayga okyku o doŋ o kpo o gbu o ka nga o se aso la o wo eyi anóŋ. Esĩ aki la e wo edzi e fu agbro abi mbo. Esi aki la e wo ebi e fu agbro adzi mbo. Moa á yi edgu esi akiyaŋ a mbo okyku edgu agbro baŋ e la e fu. Ezga e fu agbro anga mbo. Eklu nga e fu agbro etspi mbo. Areodlodzi a lu odlodzi la o wo eso baŋ angyiŋ a ba edzi, nga areodlobi a lu odlobi la o wo eso baŋ angyiŋ a ba edzi. Ekplo la e zgi anyu are angyiŋ, e wo ekplo la e bli eso baŋ. Okyku eshi agimi e la e bzi me ma Adigi-odne, Adigi-odne, ambo agimi e kpo ekplo ba ame e klo bimi e kpo mbo? Areyaŋ a mbo la a ba okro me, nga a ngli atuŋ a gno odlo he nga a kpaŋ lo le, aŋa a wo eka ba are la a mbdzi odne baŋ onmwre. A kʼpo adga lo a da alo a gyuŋ adzadzi, nga a ta ahwim odne lo onmwre. Omba ba ondzu o bli o fu akaŋ nga, o ndza ahwim aku lo o gbu mbo, okyku eshi moa a mbdzi lo onmwre. Are la a gno odlo me ambo baŋ a kpaŋ lo mbo a wo eka ba are la a mbdzi odne baŋ endase ototno, nga a nyuŋ ahwim ba odne a ta ayga mbo. Omba ba ondzu o bli o vu adga, odne lo o ta abyi ayga o kypi mbo. Okyukypi ba odne la o kypi o wo ekplo eyli o gre eshri!