Jakaria 14

Yerusalema se ko jurön

1Mete, lor lo MATAT lo popo, logon po na ryakaji kasu kune mo kökora a ta memeddya. 2A MATAT mo moinoruŋdye jurön liŋ i mörö ko.Yerusalema, a köji mo mokani moka, a kadijik ryakani ryaka, a wate kase lupöni lupö; a swöt lo köji mo jopani a ’dupi, ama a pitönö kulo mo tine ’dupoji kapo i nu köji. 3A MATAT mo iti ŋerot i möro ko kulo jurön gwoso na möröri nye i lor möriet lu. 4I ŋilu lor a nye mo gwo ’de i mere lo Jeitun logon komorga Yerusalema i swöt lo ’yure; a mere lo Jeitun mo kilani swötön murek a gwe a pirit na ’dir nagalaŋ parik, suluja i ’yure tojo i tokotyaŋ; a lele swöt lo mere mo ’dakara i swöt lo lobot, ko lele swöt i swöt lo loki. 5A pirit na ’dir na merya kanyit ti MATAT mo yiköni yiko, kogwon nu pirit na ’dir na merya mo yeŋga tojo Asela; a ta mo wöki gwoso na woggiri ta i rigirigi lo pokin i perok ti Ujiya mor lo Yuda lu. A MATAT ŋun lio mo poŋdi po se ko ŋutu loke liŋ ko lepeŋ i pirit na geleŋ.

6A i ŋilu lor a tupape na kolor kode lik na kak kode luru lo lilik parik mo gwe ’bayin. 7A kak mo yeŋe a tuparan, (kine kulya MATAT a den) a tine gwon kode a tuparan kode a tukwaje, ama a sömukö mo worani a tuparan.

8 # Ejk 47.1; Yoa 7.38; Kwe 22.1 A i ŋilu lor a pioŋ na lelek mo lele-kara kaŋo i Yerusalema, lele swöt lose ’dokon i swöt lo tör na ’yure, ko lele swöt ’dokon i tör na tokotyaŋ; a mo yeŋe sona ja ’be ko meliŋ.

9A MATAT mo worani a mor lo kak ’bukuluŋ; a i ŋilu lor a MATAT mo gwe geleŋ ko karin kanyit geleŋ.

10A kak liŋ mo worani a ’dar suluja Geba tojo ko Rimon na gwon i swöt lo loki lo Yerusalema. Ama a Yerusalema mo yeŋe a ko ’du kanyit i pirit, suluja i kötumit lupet na luŋu ko karin ti Benyamina tojo i pirit na kötumit lupet na köju nu, tojo ko kötumit lupet na gwon i goŋet, ko i bilili lo kadi lo luŋu a Kananele tojo ko piritön ryokesi ti binyo ti mor. 11#Kwe 22.3A se mo si ’dani lukata, kogwon tukaret mo tine gwon köti; ama a Yerusalema mo gwolore taliŋ.

12A ŋilo mo gwe a twanti iŋgo logon MATAT mo riŋge gweyajin ti ŋutu liŋ logon mörö ko Yerusalema, kweja adi mugunya kase mo ’bu ’burön ki gwogwo, a konyen kase mo ’burörö kase i diliö, a ŋedepa kase mo ’buroki kase i kutusen.

13A mo gwe sona i ŋilu lor, a köburet na po ko MATAT mo poki kase loki. a ŋutu liŋ geleŋ geleŋ mo totomoke könisi i mörö ko maratejin kase, iŋkoi, a se mo ’bilikiŋdye könisi kase ki i to gwut ko maratejin kase; 14ma ’di köti jur lo Yuda mo poki i mörö ko Yerusalema. A tukwörien na gweyajin liŋ ti ŋutu lo gwon nyona kulo mo morakine i pirit na geleŋ, kweja adi dakap ko pödö ko boŋgwat jore parik. 15A ŋilo twanti iŋgo mo ’duki i kusanjin, ko i kaineki dumalak, ko i kamilojin ko i kaineki, ko i toro ’bo liŋ na gwon i kunu merajin ti merok.

16 # Lew 23.39-43 A mo gwe sona, a ŋutu liŋ logon a pituŋdyö i kilo jurön liŋ logon a pokin i möro ko Yerusalema kilo, mo iti temba i kiŋa i dulaki kak i twöju na Mor logon a MATAT lo kurumi, ko i koŋdya na rorwe lo murugujin. 17A mo gwe sona adi ko nene kötumit na kak nagon a ko tu Yerusalema i dulaki kak i twöju na Mor logon a MATAT lo kurumi, a kudu mo tine ’don kase i pirit. 18A ko ködyö kötumit na Ejipeto ti tu, ko a karakin, a ŋina riŋet na geleŋ kodyö ’duki kase loki nagon MATAT a riŋge kilo jurön logon a ko tu i koŋdya na rorwe lo murugujin. 19A ŋina mo gwe a riŋet na riŋari Ejipeto, ko a riŋet na riŋari kilo jurön liŋ logon a ko tu i koŋdya na rorwe lo murugujin kilo.

20A i ŋilu lor a kilo kulyaesi mowurö-kine i luŋwö ti kusanjin adi, A gelwe a loke ti MATAT. A sapya ti kadi na MATAT mo gwe gwoso kalabajin nagon kitarikin i pirit ’yuret na rubaŋgajin,

21a sapya liŋ ti Yerusalema ko ti Yuda mo gwe a loke ti MATAT lo kurumi, anyen ŋutu liŋ logon a ’duŋgö rubaŋgajin kulo bubulö joŋga se a deresi kase ti rubaŋgajin. A i ŋilu lor a katujaranit mo gwe ’bayin köti i kadi na MATAT lo kurumi.

Currently Selected:

Jakaria 14: BBE

Highlight

Copy