Roma 15

Yeyeji kulya ti luŋaser an do ko yeyeju mugun

1Yi logon a iŋgo i yupet kulo A agu ködyö ŋaparakin se logon a lomunyak kulo i ’doggu na tomunyan nase. Yi ködyö ti yeyeju ’börik ka ’de.

2Kölumbö yi ködyö yeyeju luŋasirik lo yubbö kulo, anyen parakiŋdya lepeŋat i gwon ’bura ko i gweuŋdya na se ki i yupet. 3#Sau 69.9Kogwon Kristo köti a ko yeyeju mugun, ama gwoso na tuŋge kulya ti Ŋun na wurö kune adi, ’Dö’döyösi ti ŋutu logon ’dö ’döju do kilo aje pokin köyö loki. 4Kogwon kulya liŋ ti Ŋun na wurö köju ’beron kunu a wurö a todinesi kaŋ, anyen se böŋö togo ’yu yi anyen yi gwo ’dan go i yeŋdu na Ŋun. 5Ti Ŋun logon tiŋdu ŋutu i gwo ’dan go ko a katogolonit lo, ti lepeŋ tiŋdi ta i gwon ko yeyeet geleŋ ko ’börik i mirakiŋdya na Kristo Yesu,

6anyen ta böŋö gwon ko töili geleŋ ko gworo geleŋ i pupurja na Ŋun Monye Matat likaŋ Yesu Kristo.

Ŋutu ti jurön ködyö yiŋga Loŋe Lo ’but

7Nyenagon towune ta ko ’börik gwoso nagon Kristo a wuji ta na, anyen Ŋun bubula. 8Kogwon nan takiŋdya ta adi Kristo a wora a köliŋönit lo Yudayaki anyen kweja adi Ŋun a lo to ’diri, kogwon nye a tutuŋökiŋdyö ŋo nagon Ŋun köju a milyekin tiŋdu merenyejin kunu, 9#2 Sam 22.50; Sau 18.49a nye köti tiŋdi ŋutu ti jurön i pupurja na Ŋun kogwon nye a won konyen ko lepeŋat, gwoso na tuŋge kulya ti Ŋun na wurö kune adi. Nyenagon nan de yuöggu do i kiden na jurön,

a de yulukiŋdye do puresi ’diŋdya karin kunök.

10 # Nyö 32.43 Köti adi,

Ta ŋutu ti jurön, lyöŋi ta lyöŋön ko ŋutu kanyit i pirit na geleŋ.

11 # Sau 117.1 Köti adi,

Ta ŋutu ti jurön liŋ, pupurje ta Matat,

ko ti gweyajin liŋ ti ŋutu pupurje lepeŋ.

12 # Yis 11.10 A köti Yisaya iŋge kulya adi, Kene mo wiwilun i kokorite na Yisai,

ŋilo a nye logon mo ŋikin i tumatyan ko ŋutu ti jurön;a se mo yeŋdi lepeŋ.

13Ti Ŋun logon yenet gwon ko lepeŋ lo töjoreji ta ko lyöŋön liŋ se ko taliŋ liŋ kogwon yubbö nasu na lepeŋ, anyen yeŋdu nasu na lepeŋ ŋöŋdi a duma parik i riŋit na Mulökötyo Loke.

Kwe nagon Paulo a wuŋö ko topurwan

14Luŋasirik kwe, nan ko mugun nio a den ’bura adi ta a jore ko ’busan, ko a jore ko denesi liŋ, a ta bulöni bulö todiŋdyö ’börik. 15Ama i na leta nan a wurökiŋdyö ta ko topurwan anyen toyiyikiŋdyö ta kune kulya, kogwon ’busan na nyaŋu nagon Ŋun a tikin nan na, 16anyen nan gwon a köliŋönit lo Kristo Yesu, anyen nan kita i swöt lo ŋutu ti jurön i tokukiŋdyö na se Loŋe Lo ’but lo Ŋun. Nan gwon gwoso koane anyen wukiŋdya Ŋun ŋutu ti jurön a rubaŋga lo tulyöŋgu lepeŋ, ŋilo rubaŋga a tokela ko Mulökötyo Loke. 17Nan logon a lo Kristo Yesu lo bubulö bu ’ya mugun kogwon nan kitakiŋdya Ŋun.

18Nan kukujönö i jambu na kunie kulya, ama tuŋ nan jambu kulya nagon Kristo a kon köyö i mugun kune, anyen joŋdya ŋutu ti jurön i twöju na Ŋun. Nan tuŋ jambu ŋo nagon Kristo a kon köyö i mugun i kulyaesi ko i konesi, 19i riŋit na kweyesi ko na sörösi, se ko i riŋit na Mulökötyo Loke. Nyenagon nan a tutuŋgö tokujö Loŋe Lo ’but lo Kristo suluja Yerusalema a loraddi tojo ko Iluriko.

20Nan ŋupi tiŋdu tirikwet nio i tokuö ddu na Loŋe Lo ’but i piritön nagon ŋutu a ko nyuŋ yiŋ karin ti Kristo kunu, anyen nan gwon ti ’dukö i pipilesi logon lele ŋuto lo ’bokakiŋdya kulo. 21#Yis 52.15Ama nan koŋdya gwoso na tuŋge kulya ti Ŋun na wurö kune adi,

Ŋutu logon ’beron a ko tokuki kulya kanyit kulo mo memet kine kulya,

a se logon a ko yiŋ kulya kanyit kulo mo kuru kurun kine kulya.

Paulo ’dek ’yö ’yu kayupök lo gwon Roma

22 # Rom 1.13 Ko ŋina kwe, ŋina kita a teŋ nan daŋin jore i tu i ’yö ’yu na ta. 23Ama soŋinana nan aje tutuŋökiŋdyö kita i kune piritön, nyenagon kogwon nan gwon ko pusök kiŋajin jore i tu i meddya na ta nu, 24nan ’dek ’yölöddu ta i tu nio Sipania. A i mukök nagon nan aje lyöŋön i gwon ko ta ko diŋit a na ’dit nu, a nan yeŋdi adi ta mo ŋaparakin nan i jölö nio tojo nyu. 25#1 Kor 16.1-4Ama i na diŋit na, nan lo tu Yerusalema jakiŋdya ŋutu ti Ŋun ŋariet. 26Kogwon ŋutu ti Makedonia se ko ti Akaya a ruggö gwegwe ’ya ’dokesi anyen paraki ’e lomerika i kiden na ŋutu ti Ŋun lo gwon Yerusalema yu kulu. 27#1 Kor 9.11Lepeŋat ko ’börik lo yeyeju koŋdya sona, iŋkoi, lepeŋat gwon ko möri i parakiŋdya na se. Kogwon ko Yudayaki a parakiŋdya ŋutu ti jurön ko kulya ti Ŋun, a ŋutu ti jurön köti ködyö parakiŋdye Yudayaki ko ŋo ti mugun. 28Nyena ko nan aje tutuŋgö ŋina kita, a nan iŋge ŋutu kin lepeŋat kine pariesi, a nan mo iti Sipania, a ’yölöddi ta i tu nio nyu. 29Nan a den adi ko nan a tu kasu ŋini, nan mo ’durökin ko ’boriet duma na po ko Kristo.

30Böŋö nan mo ’yu ta luŋasirik i karin ti Matat likaŋ Yesu Kristo, se ko i nyaŋu na po ko Mulökötyo Loke adi, Möŋi ta parik i kwakwaddu na Ŋun i kulya kwe, gwoso nagon nan mömöŋi i kwakwaddu na, 31anyen nan böŋö lwölwökö i ŋutu ti Yudaya logon ’bayin a kayupök kulu, ko anyen kita nio nagon nan konakin ŋutu ti Yerusalema na böŋö tulyöŋgu ŋutu ti Ŋun.

32Nyena ko Ŋun ’de ’dekan, nan mo tutu kasu ŋini ko lyöŋön anyen yukan ko ta i pirit na geleŋ. 33Ti Ŋun logon taliŋ gwon ko lepeŋ lo gwe kasu liŋ. Amin.

Currently Selected:

Roma 15: BBE

Highlight

Copy