Roma 13

Twöyö na miri

1Ti ŋutu liŋ geleŋ geleŋ twöji kasarak logon saŋu se kulo, kogwon kido saret liŋ Po ko Ŋun, iŋkoi, kasarak logon kata kulo Ŋun lo tiŋdu lepeŋat. 2Nyenagon ko ŋuto logon a renya kido saret, lepeŋ renya ŋo nagon Ŋun a sarakin na, a se lo renya kulo mojakiŋdye ’börik riŋet. 3Kogwon ŋutu lo koŋdya ’bura kulo kodyö ti kujönö kasarak, ama se lo koŋdya ŋo narok kulo kukujönö kasarak. Do ködyö nyanyar gwon ti kujönö kasaranit le? Nyena koŋdi ŋo na ’but a lepeŋ mo puŋe do, 4kogwon lepeŋ a kakitanit lo Ŋun i kitakiŋdya na do ŋo nagon a na ’but konut. Ama ko do a koŋdya toron a do kujönöni kujönö lepeŋ, kogwon morga nanyit na baŋdu ’bayin a ŋö kana. Lepeŋ a kakitanit lo Ŋun i ’duŋökiŋdyö na woran na ŋuni ŋutu lo koŋdya arabat kilo. 5Nyenagon ti ta agu twöji twöju, ’bayin kogwon ta kujönö woran na Ŋun ka ’de, ama köti kogwon töilyet kasu deden adi ta koŋdya ŋö na ’but. 6#Mat 22.21; Mar 12.17; Luk 20.25Ŋina köti a kwe nagon ta robbi usur, kogwon kasarak a kakitak ti Ŋun a ŋina gwe a kita nase.

7Nyenagon ropakiŋdye ta lepeŋat liŋ ŋö nagon ’de ’dekarikin kasu kine; ropaki ta usur i ŋutu lo pepeŋdya usur kulo, ropaki ta usur lo toro ’bo kasu i ŋutu logon pepeŋdya usur lo toro ’bo kulo, twöji ta ŋutu logon ta ködyö twötwö kulo, bu ’ye ta ŋutu logon ta ködyö bubu kulo.

Tunyar ko ’börik

8An ta ko gwon ta ko möri i nene ŋo nagon ta ködyö kökon na, ama tuŋ möri nagon ta ködyö gwon ko lepeŋ na a tunyar ko ’börik, kogwon nye lo nyaŋu marate lonyit lo a temakiŋdya i Saresi liŋ. 9#Yuö 20.14; Nyö 5.18; Yuö 20.13; Nyö 5.17; Yuö 20.15; Nyö 5.19; Yuö 20.17; Nyö 5.21; Lew 19.18Kogwon saresi logon tuggö adi, An do ko lubbö, An do ko tatuja ŋuto, An do ko koko ’ya, An do ko be ’ya, wat lele saret, se liŋ a tomoraki i ŋilo kulyaet adi, Do ködyö nyanyar marate ilot gwoso mugun inot. 10Nyaŋu ti toroŋdya marate, nyena ko do a kanyaranit, do a ka ’depanit lo Saresi liŋ.

11Köti dene ta den adi saa aje jukin, diŋit aje po nagon ta ködyö pupurwe ’i i doto. Kogwon soŋinana yi gwe nyona ko lwökö lwölwöŋ na yubbe yi a kokwe nu. 12Tukwaje aje ’baka, kak gwe nyona ko waran. Nyena ti yi rusuŋdye ta kaŋo konesi ti mudwe, ko ti yi jupukiŋdye ta tito möriesi logon a ti parara. 13Ti yi wöröni ta ’bura gwoso ŋutu lo wörö i tuparan, ’bayin i to ’betan, kode i meran, kode i toluŋ, kode i koŋdya na ŋo nagon a wuya kana, kode i mörö, kode i yulön. 14Ama jupukiŋdye ta Matat Yesu Kristo a tito kasu möriesi; an ta ko yeyeju ta i toyimönöju na ’dekesi ti mugunya kasu ti na kak.

Currently Selected:

Roma 13: BBE

Highlight

Copy