Matayo 8

Yesu a toke ’ya ŋuto lo rimajin

(Köti Marako 1.40-45; Luka 5.12-16)

1A Yesu ko kiyene kak i mere, a ŋutu jore parik kepoddi lepeŋ.

2Nyena a ŋuto lo rimajin poŋdi ko lepeŋ ni, a rugwuŋökine kak kanyit i komor, a kulyani adi, Pon MATAT, ko do nyanyar do bubulö toke ’ya nan.

3A Yesu riöddi könin lonyit a ’bo ’yi lepeŋ kulya adi, Iŋkoi, nan nyanyar; ti do kele kelan. ’De ’de a rimajin kanyit iŋge tokela. 4#Lew 14.1-32A Yesu kulyani ko lepeŋ adi, Meddi ’bura an do ko jamakin lele ŋuto kine kulya; ama iti, kweki mugun ko kijane, ko tiŋdi ’doket gwoso na sarakiŋdye Mose nu, anyen ŋutu deden adi do aje tokela.

Yesu a toke ’ya koliponit lo duma lokamörök ti Roma

(Köti Luka 7.1-10)

5A Yesu ko tulöddi Kapernauma, a duma lo kamörök ti Roma mia geleŋ iti ko lepeŋ yu, a mamaŋdi lepeŋ, 6adi, MATAT, kölipönit liŋ lu rogga kak midi, a bata mugun a twan, ŋoŋoŋga parik parik. 7A Yesu kulyani ko lepeŋ adi, Nan de tutu i toke ’ya na lepeŋ. 8Ama a duma lo kamörök waddi lepeŋ adi, MATAT, nan ti jukin i ruköddu na do köyö mede; ama tuŋ jamuŋdye kulyaet a kölipönit liŋ de kele kelan. 9Kogwon nan a ŋuto logon sara ko temejik kwe, a nan köti gwe ko kamörök lo gwon köyö i mukök. Ko nan takiŋdya lele adi, Iti, a nye iti tu; a ko nan luŋgu lele adi, Po, a nye poŋdi po; a ko nan takiŋdya ’dupiet liŋ adi, Koŋdi na ŋo, a nye koŋdi koŋdya. 10A na yiŋge Yesu ŋilo ŋuto i kulya sona nu, a nye iŋge söŋu, a kulyani ko ŋutu lo kipuŋdyö nye kulo adi, ’Diri nan takiŋdya ta adi, nan a ko ryö yupet duma gwoso na ’bayin ma ’di i Yisaraele. 11#Luk 13.29Nan takiŋdya ta adi, ŋutu jore mo popo i swöt lo ’yure ko i swöt lo tokotyaŋ, a mo si ’dakine i nyesu ko Abarayama, ko Yisaka, ko Yakobo i Tumatyan na Ki; 12#Mat 22.13; 25.30; Luk 13.28ama se logon a ŋutu ti Tumatyan kilo mo gubaji kaŋo i mudwe; a ŋutu mo gwine gwien a mo pije kala nyu. 13a Yesu kulyani ko duma lo kamörök adi, Iti, ti konakine do gwoso na yubbe do na; a kölipönit lonyit iŋge tokela i ŋinu saa gwak.

Yesu a toke ’ya ŋutu jore

(Köti Marako 1.29-34; Luka 4.38-41)

14A Yesu ko lupöni ko Petero kadi, a nye meddi moken na Petero rogga kak a gilö mugun sasa ’yu pape. 15a nye ’bo ’yi könin lo ŋina ŋuto, a sa ’yu na mugun kö ’yi lepeŋ, a nye ŋine ki a parakiŋdye lepeŋ.

16A i ŋilu koriri i sömukö, a ŋutu jakiŋdye lepeŋ ŋutu jore logon a moka ko mulökö lorok. A nye riköddi mulökö lorok kaŋo ko kulyaet ka ’de, a nye iŋge toke ’ya ŋutu liŋ logon a gigilötu, 17#Yis 53.4anyen ŋo na jam nebi Yisaya köju kunu ködyö kokona, nagon a jama adi, Lepeŋ a joŋga tomunyan nikaŋ, a iŋge sopa ko twana kaŋ.

Ŋutu logon jambu adi se ’de ’dekan kepoddu Yesu

(Köti Luka 9.57-62)

18Nyenagon a Yesu ko meddi ŋutu jore parik kanyit nyona, a nye saŋi ŋutu kanyit kajujumuk anyen se laŋaddu i nu pele na tör. 19a lele katodinönit lo Saresi ti Mose poŋdi ko lepeŋ ni, a kulyani adi, Katodinönit, nan de kekeporo do ko do tu da. 20a Yesu waddi lepeŋ adi, Liŋgojin gwon ko dilyö kase, kwen gwon ko kadijik kase, ama nan ŋuro lo ŋuto ’bak pirit nagon nan sukiŋdye kwe nio. 21a lele lo ŋutu kanyit kajujumuk kulyani ko lepeŋ adi, MATAT, a kokwe rukörö nan i tu i nugga na baba. 22Ama a Yesu waddi lepeŋ adi, Kipuŋdye nan, kölöki lo twatwa i nugga na lo twatwa kase.

Yesu a toyiŋaju köbuŋöt duma i tör

(Köti Marako 4.35-41; Luka 8.22-25)

23A Yesu ko kije i ki ’bo kata, a ŋutu kanyit kajujumuk moraddi ko lepeŋ. 24Mete, a köbuŋöt duma wukuŋdye wukuŋdyö i tör, a pioŋ ya ’yi i ki ’bö kata, a ki ’bö gwe nyona ko ’dirön; ama a lepeŋ gwe i doto. 25a se iti i topuruŋdyö na lepeŋ, a kulyani adi, MATAT, lwöki yi, yi kulo ’di ’dirön. 26A nye pije lepeŋat adi, Ta ŋutu logon ko yupet a na ’dit, nyo ta kukujönö? A kirut nye ŋine ŋien, a riŋge köbuŋöt se ko tör, a ŋo liŋ gwe taliŋ adi lii. 27A ŋutu kulo iŋge söŋu, a totopine adi, Ŋilo ŋuto a ŋa logon ma ’di köbuŋöt se ko tör yiyiŋ lepeŋ?

Yesu a toke ’ya Ŋutu murek lo gwon ko muloko lorok

(Koti Marako 5.1-20; Luka 8.26-39)

28A Yesu ko ’dure i nu pele na tor na Galilaya i jur lo ŋutu ti Gadara, a ŋutu murek logon a moka ko muloko lorok poŋdi kaŋo i pirit na gulomo i rum ko lepeŋ. Kilo ŋutu a kaŋajin parik a lele ŋuto tine buŋ Iwonoddu i nilu kiko. 29Mete, a se woŋe parik adi,

Do Ŋuro lo Ŋun, do ’dek nyo kayaŋ?

Do po ni i tomor na yi a kokwe nagon diŋit a ko nyuŋ temakiŋdya na?

30Nyena a teŋ duma na wuryo gwe i yuku pajo madaŋ ko se. 31A muloko lorok mamaŋdi Yesu adi, Ko do rikoddu yi kaŋo, sonye yi i teŋ na wuryo.

32A nye kulyani ko se adi, Iŋgo ta, iti ta. Nyena a se lupuŋdye kaŋo a lupöni i wuryo, a teŋ liŋ na wuryo rurumuŋdye kak ’de ’de i wi na merya tojo i tor kata, a ’dire ’diron. 33a kayukuk wöki wökön, a iti köji kata.A se nyönyöggi ŋo liŋ ko ŋo nagon a konaki ŋutu logon a moka ko muloko lorok kulo. 34Nyena a ŋutu liŋ ti köji poŋdi kaŋo i rum ko Yesu, a se ko meddi lepeŋ, a se mamaŋdi lepeŋ anyen koko jur lose.

Currently Selected:

Matayo 8: BBE

Highlight

Copy