Matayo 10

Luyökie puök wot murek

(Koti Marako 3.13-19; Luka 6.12-16)

1A Yesu lupundye ŋutu kanyit kajujumuk puök wot murek kulo kanyit ni, a tiŋdi se kido anyen riŋge muloko lorok kaŋo, ko anyen toke ’yi twana liŋ ka ’de ka ’de se ko gilosi liŋ. 2Kune a karin ti luyökie puek wot murek: lo kokwe a Simona lo luŋu a Petero, ko Apöalea luŋaser lonyit; ko Yakobo ŋuro lo Jebedayo, ko Yoane luŋaser lonyit; 3ko Pilipo, ko Bartolomayo; ko Toma, ko Matayo kapepenanit lo usur; ko Yakobo ŋuro lo Alapayo, ko Tadayo; 4ko Simona Kawelonit, ko Yuda Isikariota lo tiŋdu lepeŋ i tatua lo.

Yesu a sonyoddu luyökie puök wot murek i tokuöddu

(Koti Marako 6.7-13; Luka 9.1-6)

5A Yesu soŋdi kulo ŋutu puök wot murek, a sarakiŋdye se adi, Ko tiri ta i kiko lo tu i jurön ti Lwaka, ko lupö ta i nene köji na ŋutu ti Samaria; 6ama kölumbö iti ta i yidin ti kotumit na Yisaraele nagon a likin kunu. 7Na tiri ta nu, tukoddi ta adi, Tumatyan na Ki aje yepuŋdya. 8Tokele ta ŋutu lo gilö, toŋiyu ta ŋutu logon a twatwa, tokele ta ŋutu ti rimajin, rikörö ta mulöko lorok kaŋo. Ta a wu ’bak ropet, tiki ta ’bak ropet.

9Ko joŋga ta ginejin, kode asarajin, kode taripajin kasu i likitiat ti goman,

10 # 1 Kor 9.14; 1 Tim 5.18 ko joŋga ta jurakan i jölö nasu, kode jolobiyajin murek murek, kode kamuka, kode turya; kogwon kakitanit kodyö tiki kinyo lonyit. 11A ko ta a lupö i nan köji kode i lon tur, galu ta kaŋo ko ta ryöryö ŋuto logon a lo ’but, mönuŋdye ta ko lepeŋ yu tojo ta a ŋiörö. 12A na lupöri ta kadi nu, rome ta roman ko ŋutu ti ŋinu mede, 13a ko ŋutu ti ŋinu mede a lo ’but, ti taliŋ nasu poki ko lepeŋat, ama ko se ’bayin a lo ’but, ti taliŋ nasu yitwene bot kasu ni. 14#Kon 13.51A ko lele ŋuto mo ti ’bön wuju ta kode ti ’bön yiŋga kulyaesi kasu, ko ta ŋiörö ŋiörö i ŋinu mede kode i ŋinu köji, nanane ta kujöŋ na ryoryok ta ko mokosi kasu kine kaŋo. 15#Mat 11.24; Sul 19.24-28#Luk 10.4-12’Diri nan takiŋdya ta adi, i lor ’duŋet kulya ti jur lo Sodoma ko lo Gomora mo ’duŋöki pölilyö Iwolwöŋ ’duŋöki na kulya ti na köji.

Yöyöŋesi se ko sasanyesi popo

(Köti Marako 13.9-13; Luka 12.11-12; 21.12-17)

16 # Luk 10.3 Mete ta, nan ŋilo soŋdu ta kaŋo gwoso köbilu i kiden na lujin. Nyena gwe ta a lokoŋ gwoso munuö, ko gwe ta gwoso gureki nagon ti konakiŋdya ŋutu arabat. 17#Mar 13.9-11; Luk 12.11, 12; 21.12-15Meddi ta ’bura i kulya ti ŋutu; kogwon se mo momok ta a joŋgi ta i putet, a se mo ’biddye ta i kadijik kase momoresi ko kurubasi logon a kwara,

18a ta mo dudukajine ko mödirön i komor ko i moran kogwon kulya kwe, anyen tokurukiŋdyö kine kulya kase i komor ko i Lwaka. 19A na wukiŋdye lepeŋat ta nu, an ta ko wiwinya ta ko ta kulya ada kode ko ta jambu nyo, kogwon i ŋinu diŋit ta mo titiki ŋo nagon ta jajam. 20Kogwon mo ’bayin a ta lo jambu, ama Mulökötyo lo Monye losu lo jambu kasu i mugunya. 21#Mar 13.12; Luk 21.16A luŋaser mo wukiŋdye luŋaser i tatua, a monye mo wukiŋdye ŋuro lonyit, a ŋwajik mo ŋiki i mörö ko monye lose ko ŋote nase, a tiŋdi lepeŋat i tatua.

22 # Mat 24.9; Mar 13.13; Luk 21.17; Mat 24.13; Mar 13.13 A ŋutu liŋ mo mane man ta kogwon karin kwe; ama ŋuto logon a ŋoŋga tojo ko ’dutet lo mo lwölwökö. 23a na sasaŋdi se ta i nene köji nu, wöki ta i nene, kogwon ’diri nan takiŋdya ta adi ta mo ti tutuŋ köjinö liŋ ti Yisaraele a kokwe na poŋdi nan ŋuro lo ŋuto.

24 # Luk 6.40; Yoa 13.16; 15.20 Kajujumunit ti bulö lwöŋgu katodinönit lonyit, kode ’dupiet ti lwöŋ duma lonyit. 25#Mat 9.34; 12.24; Mar 3.22; Luk 11.15Ködyö a na ’but ko kajujumunit gwon jojo gwoso katodinönit lonyit, köti a na ’but ko ’dupiet gwon gwoso duma lonyit. Ko ŋutu luŋgu monye mede a Belejebula, a se mo luŋgi ŋutu ti mede nanyit ko karin nagon a narok bia parik!

Ko ta ködyö kujönö ŋa

(Köti Luka 12.2-9)

26 # Mar 4.22; Luk 8.17 Nyenagem ko kujönö ta lepeŋat. Kogwon nene ŋo ’bayin na mukö nagon mo ti kweya, a nene ŋo gwe ’bayin na ’dela nagon mo ti dena. 27Ŋo nagon nan tukökin ta i mudwe kine tuke ta i parara; ŋo nagon a moŋaki kasu i swo kine laŋe ta i loteko ti kadijik. 28Köti ko kujönö ta ŋutu logon tatuja kune mugunya ama ti bulö tatuja kodudwölön; kolumbö kujönöni ta ŋun logon bubulö tukaŋu ko ködudwö ko mugun i Geena.

29Liliitan murek ti gwörö ko milinte geleŋ le? Ama nene nase ti ’doro kak nagon Monye losu a ko den. 30Ama i kulya kasu kupir kasu liŋ ti kusik aje kena. 31Nyenagon ko kujönö ta; ta gwon ko ’bulit lwölwoŋ liliitan jore.

Ŋuto logon ruggö adi nye a lo Kristo kode renya adi nye ’bayin a lonyit

(Köti Luka 12.8-9)

32Nyena ŋutu liŋ geleŋ geleŋ logon ruggo nan ko ŋutu i komor, nan köti mo ruruk lepeŋat ko Baba lo gwon ki lu i komor; 33#2 Tim 2.12ama ko ŋa lo renya nan ko ŋutu i komor, nan köti mo rerenya lepeŋ ko Baba lo gwon ki lu i komor.

Nan a ko joŋdya taliŋ ama kölumbö nan joŋdya baŋdu

(Köti Luka 12.51-53; 14.26-27)

34Ko yeyeju ta adi nan a po i joŋdya na taliŋ i kak ni; nan a ko po i joŋdya na taliŋ ama kölumbö baŋdu.

35 # Mik 7.6 Kogwon nan a po i tiŋdu na ŋuto i ŋisa ko monye lonyit, ko ŋuro nakwan i ŋisa ko ŋote, ko nakwan na tore i ŋisa ko moken; 36a merok ti monye mede gwe a ŋutu ti mede nanyit. 37Ŋuto lo nyaŋu monye kode ŋote lwölwöŋ nan lo ti jukin i nan, köti nye lo nyaŋu ŋuro lonyit kode ŋuro nanyit lwölwöŋ nan lo ti jukin i nan. 38#Mat 16.24; Mar 8.34; Luk 9.23Koti ko ŋuto a ko ’doggu ködini na görö nanyit a kepoddi nan a nye tine jukin i nan.

39 # Mat 16.25; Mar 8.35; Luk 9.24; 17.33; Yoa 12.25 ŋuto lo ryeju ru nanyit lo mo totolikin ru nanyit, ama ko ŋa lo tolikiŋdyö ru nanyit kogwon kulya kwe mo ryöryö lepeŋ.

Ropet

(Köti Marako 9.41)

40 # Luk 10.16; Yoa 13.20; Mar 9.37; Luk 9.48 ŋuto lo wuju ta lo wuju nan, koti nye lo wuju nan lo wuju lepeŋ sunyuŋdyö nan lo. 41ŋuto lo wuju nebi kogwon lepeŋ a nebi lo mo wuju ropet nagon ropaki nebi, koti nye lo wuju ŋuto lo loti lo rigwo kogwon lepeŋ a ŋuto lo loti lo rigwo lo mo wuju ropet nagon ropaki ŋuto lo löti lo rigwo. 42’Diri nan takiŋdya ta adi, ko ŋa lo tiŋdu lele geleŋ lo kilo lo ’di ’dik kopo lo piŋo nalilik anyen mamat kogwon lepeŋ a ŋuto liŋ kajujumunit, ŋilo ŋuto mo ti jaran i ropaki.

Currently Selected:

Matayo 10: BBE

Highlight

Copy