SEKHARAÏAH 14
14
Ka Jerusalem bad ka jingpynjot ïa ki nongshun jong ka
1“Ha khmih, ka sngi U Trai ka wan, haba yn ïasam ïa ka jinglute jong pha hapdeng jong pha. 2Naba ngan lum lang ïa ki jaid bynriew baroh ban ïaleh thma ïa ka Jerusalem; te yn jop ïa ka nongbah, bad yn lute ïa ki ïing, bad yn khñiot tnga ïa ki kynthei: bad shiteng ka nongbah kin leit noh ban long mraw, bad kita kiba la pynsah na u paidbah yn ym pynduh noh na ka nongbah. 3Ynda kumta, U Trai un mih, bad un ïaleh ïa kita ki jaid bynriew, kumba u la ïaleh ha kata ka sngi ka jingïaleh thma. 4Te ha kata ka sngi ki kjat jong u kin ïeng halor u lum Olib, uba ha pyrshah ka Jerusalem shaphang mihngi, bad u lum Olib un kad napdeng jong u shaphang mihngi bad shaphang sepngi, te kan don ka them kaba khraw; te shiliang u lum kan kynriah shaphang shatei, bad shiliang shaphang shathie. 5Te phin ïoh phet noh na kata ka them ki lum jong nga; naba kata ka them jong ki lum kan kot haduh Asel: shisha, phin phet ïap noh, kumba phi la phet ïap noh na kata ka jingkhynñiuh jumai ha ki sngi u Ussiah u syiem ka Judah: bad U Trai U Blei jong nga un wan, bad kita ki bakhuid baroh lem bad me.
6“Bad kan long ha kata ka sngi, ba ka jingshai kan ym long kaba phyrnai, bad kaba dum: 7hynrei, kan long kawei ka sngi kaba U Trai keiñ un ithuh; sngi ruh em, miet ruh em: hynrei, la janmiet hi kan long shai.
8 #
Ese. 47:1; Ïoan. 7:38; Jpw. 22:1. “Bad ha kata ka sngi, ki um kiba im kin mih noh na Jerusalem; shiteng jong ki shaphang ka duriaw mihngi, bad shiteng shaphang ka duriaw sepngi: mynlyiur bad myntlang ruh kan long.”
9Bad U Trai un long u syiem halor ka khyndew baroh: ha kata ka sngi, U Trai un long uwei, bad ka kyrteng jong u kawei.
10Bad ïa ka ri baroh yn pynkylla kum ka madan, naduh Geba haduh Rimmon shaphang shathie ka Jerusalem; bad yn pynkyntiew ïa ka, bad kan shong ha la ka jaka, naduh ka khyrdop u Benjamin haduh ka jaka ka khyrdop ka banyngkong, haduh ka khyrdop ka dong, bad naduh ka kut u Hananil haduh ki jingtylliat Waiñ u syiem. 11#Jpw. 22:3.Bad ki briew kin shong ha ka, bad kan ym don ka jingtim shuh; hynrei, ka Jerusalem kan shongsuk skhem.
12Te kane kan long kata ka jingïapkhlam da kaba U Trai un shoh ïa kita ki paidbah kiba la ïaleh thma ïa ka Jerusalem: ka doh jong ki kan ringswai noh haba ki dang ïeng ha la ki kjat, bad ki khmat jong ki kin duh noh na la ki thliew, bad u thylliej jong ki un ran noh ha ka shyntur. 13Bad kan jia ha kata ka sngi, ba ka jingkhihwin kaba khraw na U Trai kan long hapdeng jong ki; te kin ïabat uwei uwei ïa ka kti u paramarjan jong u, bad ka kti jong u kan ïeng pyrshah ïa ka kti u paramarjan jong u. 14Bad ka Judah ruh kan ïaleh pyrshah ïa ka Jerusalem; bad yn lum lang ïa ka spah jong ki jaid bynriew baroh sawdong, ïa ka ksiar, bad ïa ka rupa, bad ki jaiñkup jaiñsem, shibun eh. 15Bad kumta kan long ka jingïapkhlam ka kulai, ka khashor, ka ut, bad ka kadda, bad ki mrad baroh kat kiba ha kita ki jaka shong dara, kum kane ka jingïapkhlam keiñ.
16 #
Leb. 23:39-43. Bad uwei uwei baroh ïa uba la pynsah na kita ki jaid bynriew baroh kiba la wan ïaleh ïa ka Jerusalem, un leit kiew na ka snem sha ka snem ban mane ïa U Syiem, U Trai ki paid, bad ban rakhe ïa Ka Jingkhawai Niam Ki Ïingtrep. 17Te kino kino na ki kur ka khyndew baroh ki ban ym leit sha Jerusalem ban mane ïa U Syiem, U Trai ki paid, halor kita kan ym long slap shuh. 18#Isa. 19:1-25; Jer. 46:1-28; Ese. 29:1—32:32.Bad lada ka kur ka ri Ijipt kam leit kiew, bad kam wan, hato ka jingïapkhlam kan ym long halor jong ki? da kaba U Trai un shoh ïa kita ki jaid bynriew ki bym leit kiew ban rakhe ïa Ka Jingkhawai Niam Ki Ïingtrep. 19Kane kan long ka jingpynshitom ka Ijipt, bad ka jingpynshitom ki jaid bynriew baroh ki bym leit kiew ban rakhe ïa Ka Jingkhawai Niam Ki Ïingtrep.
20Ha kata ka sngi, kan long “Ka Jingkhuid Ha U Trai” ha ki shakuriaw ki kulai; bad ki khiew shet ha ïing U Trai kin long kum kita ki khuri ha khmat ka duwan. 21Shisha keiñ, u khiew shet baroh ha Jerusalem bad ha Judah un long khuid ha U Trai ki paid: bad kita baroh kiba kñia kin wan shim na ki, bad kin shet ha ki; bad ha kata ka sngi, u kynja Kanaan un ym don shuh ha ïing U Trai ki paid.
Currently Selected:
SEKHARAÏAH 14: KHB
Highlight
Share
Copy
Want to have your highlights saved across all your devices? Sign up or sign in
The Bible Society of India
