SEKHARAÏAH 10
10
Ka jingsiewspah U Blei ïa la ki briew
1To pan slap na U Trai
ha ka aïom u slap bakhatduh,
na U Trai uba pynlong
ïa ka leilieh;
te un ai ha ki, ïa u 'lap praw,
ha uwei uwei baroh
ïa u phlang ha lyngkha.
2 #
Mat. 9:36; Mrk. 6:34. Naba ki teraph ki la kren
ka jingthala,
bad ki nongkren byrtong
ki la ïohi ïa ka lamler;
bad ki la ïathuh
ïa ki jingphohsniew
kiba shukor,
ki pyntngen lehnohei:
namar kata, ki la leit la ka lynti
kum ki langbrot,
la pynjynjar ïa ki,
namar bymdon u nongsharai.
3“Ka jingbitar jong nga
ka la meh pyrshah
ïa ki nongsharai,
te ngan pynshitom
ïa ki 'lang shynrang:
naba U Trai ki paid
u la wan-i ïa la ka kynhun,
ka ïing Judah,
bad un pynlong ïa ki
kum la u kulai ba-itynnad
ha ka thma.
4Na u, un mih u mawdong,
na u, u prek,
na u, ka ryntieh ïaleh thma,
na u, u nongsynshar,
baroh lang.
5Bad kin long
kum ki rangbah bakhlaiñ,
ki da ïaïuh roit
ïa la ki nongshun
ha ka ktieh ki lynti shnong
ha ka thma; te kin ïaleh,
namar U Trai u don
lem bad ki:
bad kita kiba shong
halor ki kulai kin duh buit.
6“Bad ngan pynkhlaiñ
ïa ka ïing Judah,
bad ngan pynim
ïa ka ïing u Joseph,
bad ngan wallam ïa ki pat,
naba nga la isynei ïa ki;
bad kin long kumta
kumba ngam shym la kyntait
ïa ki:
naba nga long U Trai
U Blei jong ki,
bad ngan shahshkor ïa ki.
7Bad ki jong ki Ephraim
kin long
kum u rangbah bakhlaiñ,
bad ki dohnud jong ki
kin shadkmen
kum da ka Waiñ:
shisha keiñ, ki khun jong ki
kin ïohi ïa kata,
bad kin shadkmen;
ka dohnud jong ki
kan leh kmen ha U Trai.
8“Ngan siaw ha ki,
bad ngan lum ïa ki;
namar nga la siewspah ïa ki:
te kin nang roi
kumba ki la ju roi.
9Bad ngan bet ïa ki
hapdeng ki kynja bynriew;
bad kin kynmaw ïa nga
ha ki ri kiba jngai:
bad kin ïashong
lem bad la ki khun,
bad kin ïoh phai pat.
10Ngan wallam ïa ki pat
na ka ri Ijipt,
bad ngan lum ïa ki
na ka Assyria;
bad ngan wallam ïa ki
sha ka ri Gilead
bad Lebanon;
te yn ym ngiam jaka shuh
ïa ki.
11Te un ïaid lyngba
ïa ka duriaw ka jingjynjar,
bad un shoh
ïa ki jingat phyllung
ha ka duriaw,
bad ki jingjylliew baroh
jong ka Neil
kin rngad noh:
bad yn pynhiar noh
ïa ka jingsarong ka Assyria,
bad u dieng synshar ka Ijipt
un jah noh.
12Bad ngan pynkhlaiñ ïa ki
ha U Trai;
te kin ïaid sharum shaneng
ha ka kyrteng jong u,”
ong U Trai.
Currently Selected:
SEKHARAÏAH 10: KHB
Highlight
Share
Copy
Want to have your highlights saved across all your devices? Sign up or sign in
The Bible Society of India
