MALAKHI 3
3
1 #
Mat. 11:10; Mrk. 1:2; Luk. 1:76; 7:27. “Ha khmih, nga phah ïa la u nonglam-ktien, bad un khreh ïa ka lynti ha shuwa jong nga: bad U Trai, uba phi ïawad, un wan kyndit sha la ka ïing: bad uta u angel ka jutang, ha uba phi ïasngewbha, ha khmih, u wan,” ong U Trai ki paid. 2#Jpw. 6:17.“Hynrei, uei uba lah ban shah ïa ka sngi ka jingwan jong u? bad uei u ban ïeng haba u mihpaw? Naba u long kum ka ding u nongpynphrang, bad kum ka sabon ki nongsait jaiñ: 3bad un shong kum u nongpynphrang bad u nongpynkhuid rupa, bad un pynkhuid ïa ki khun u Lebi, bad un pynphrang ïa ki, kum ïa ka ksiar bad ka rupa; te kin ainguh ha U Trai ïa ki jingainguh ha ka hok. 4Kumta, ka jingainguh u Judah bad ka Jerusalem kan long kaba sngewbha ha U Trai, kum ha kita ki sngi ki bamynshuwa, bad kum ha kita ki snem kiba mynbarim.
5“Bad ngan wan hajan jong phi ïa ka jingbishar; bad ngan long u sakhi uba stet pyrshah ïa kiba leh byrtong, bad pyrshah ïa kiba klim, bad pyrshah ïa kiba smai lamler; bad pyrshah ïa kita kiba banbeiñ ïa u nongbylla ha ka bainong jong u, ïa ka riewkynthei, bad ïa u khunswet, bad kita kiba pynkynriah noh ïa u nongwei na la ka hok, bad ki bymsheptieng ïa nga,” ong U Trai ki paid.
Kaba ai ïa kaba shiphew
6“Naba nga U Trai ngam ju kylla; namar kata keiñ, ba ym shym la bam duh noh ïa phi, ko phi ki khun u Jakob. 7Naduh ki sngi ki kpa jong phi, phi la phai noh na ki aiñ jong nga, bad phim shym sumar ïa ki. To phai pat sha nga, te nga ruh ngan phai pat sha phi,” ong Trai ki paid. “Hynrei, phi ong, ‘Ha kaba kumno ngin phai pat?’ 8U briew un lute ïa U Blei ne em? Pynban, phi la lute ïa nga. Hynrei, phi ong, ‘Ha kaba kumno ngi la lute ïa me?’ Ha kiba shiphew bad ki jingainguh keiñ. 9Phi long ba la tim da ka jingtim keiñ; naba phi la lute ïa nga, ma phi keiñ kane ka jaid bynriew baroh. 10#Leb. 27:30; Jkñ. 18:21-24; Deu. 12:5-7; 14:22-29; Neh. 13:12.Wallam ïa kaba shiphew baroh sha ka ïing jingkynshew, khnang ban long ka jingbam ha ka ïing jong nga, bad to tynjuh ïa nga te ha kane,” ong U Trai ki paid, “la ngan plie ne em ïa ki jingkhang jong ka bneng ha phi, bad theh noh buk ha phi ïa ka jingkyrkhu, kat ban ym ngiam jaka shuh. 11Bad ngan sneng ïa u nongbam duh na ka bynta jong phi, te un ym ïoh pynsniew ïa ki soh ka khyndew jong phi; lymne u dieng Waiñ jong phi ha lyngkha un ym pynhap ïa la u soh ha bym pat biang ka aïom,” ong U Trai ki paid. 12“Bad ki jaid bynriew baroh kin khot ïa phi kiba suk: naba phin long ka ri kaba sngewbha, ong U Trai ki paid.
Ka jingïapher hapdeng u bahok bad uba bymman
13“Ki ktien jong phi ki la eh than pyrshah ïa nga,” ong U Trai. “Pynban, phi ong, ‘Ngi la kren aïu pyrshah ïa me?’ 14Phi la ong, ‘Ka long kaba thala kaba shakri ïa U Blei: bad ka myntoi aïu ba ngi la sumar ïa ka hukum jong u, bad ba ngi la ïaid sngewsih ha khmat U Trai ki paid? 15Mynta te, ngi khot suk ïa kiba sarong; bad ki nongleh bymman ïa kita keiñ la tei; shisha, ki pynshoi ïa U Blei, te la pynim ïa ki.’ ”
16Ynda kumta, kita kiba la sheptieng ïa U Trai ki la ïakren paralok: bad U Trai u la shahshkor, bad u la ïohsngew, bad la thoh ïa Ka Kitab Ka Jingkynmaw ha khmat jong u, ïa kita kiba la sheptieng ïa U Trai, bad kiba la pyrkhat ïa ka kyrteng jong u. 17“Bad kin long ki jong nga,” ong U Trai ki paid, “ha kata ka sngi, ha kaba nga pynlong ïa ka jingkynshew la ka jong hi; bad ngan isynei ïa ki, kumba isynei u briew ïa la u khun uba shakri ïa u. 18Hangta te phin phai bad phin sngewthuh ïa u bahok na u bymman, bad ïa uba shakri ïa U Blei na uta u bym shakri ïa u.”
Currently Selected:
MALAKHI 3: KHB
Highlight
Share
Copy
Want to have your highlights saved across all your devices? Sign up or sign in
The Bible Society of India
