LOUKAS 14

U Jisu u pynkhiah ïa u bapang at top

1 # Luk. 7:36; 11:37; Mrk. 3:2. Ka la jia ruh, haba U la leit hapoh ka ïing uwei na ki nongsynshar, uba na ki Pharisi, ban bam jingbam ha ka Sabbaton, ba ki la ïathap ïa U. 2Ha khmih ruh, don ha khmat jong U, uwei u briew uba la pang at top. 3#Mat. 12:10; Mrk. 3:4; Luk. 6:9.Te U Jisu u da ïathuh U la ong ha ki riewsaid bad ha ki Pharisi, U da kylli, “Ka dei ne em ban pynkhiah ha ka Sabbaton?” 4Ki te ki la shu sngap jar. Te U la shim ïa u, U la pynkhiah ïa u bad U la pyllait noh ruh. 5#Mat. 12:11; Luk. 13:15.Bad U la ong ha ki, “Uei na phi uba don kadda lane masi ba la hap ha ka thliew, u ban ym paring habar ïa u kumne kumne ruh ha ka sngi Sabbaton?” 6Te kim nang shuh ban phai ktien kylliang shaphang kine kiei kiei.

Ka jinghikai shaphang ka jingsngewrit

7Te u la kren ka pharshi ha kita ïa kiba la khot, haba u la khmih thuh kumno ba ki ïajied ïa ki jaka shong ba kham donburom, u da ong ïa ki, 8#Pro. 25:6-7; Luk. 11:43; 20:46.“Haba uno uno u khot ïa me sha ka jingkhawai shongkurim, wat shong ha ka jaka bakor tam, ïoh don lehse uba kham donburom ban ïa me ba la khot da u; 9bad ba uta uba la khot ïa me bad ïa u un wan, bad un ong ïa me, ‘To ai jaka ïa une’; ynda kumta te, men sdang da kaba lehrain ban shim ïa ka jaka kaba kham poh. 10Hynrei, haba la khot ïa me, leit shong ha ka jaka kaba kham poh; ba ynda un wan uta uba la khot ïa me, un ïoh ong ïa me, ‘Ko lok, to kiew sha kaba kham haneng’; haba kumta, men ïoh burom ha khmat kita baroh kiba ïashong bam lem bad me. 11#Mat. 23:12; Luk. 18:14; Mat. 18:4; 1 Pet. 5:6.Naba ïa uno uno baroh uba pynkhraw ïa lade, yn pynpoh; te ïa uba pynpoh ïa lade, yn pynkhraw.”

12 # Jak. 2:2-4. Te U la ong ruh ha uta uba la khot ïa U, “Haba me khreh ïa ka jingkhawai mynsngi ne mynmiet, wat khot ïa ki lok jong me, lymne ïa ki hynmen hynbew jong me lymne ïa ki kur jong me, lymne ïa ki paramarjan bariewspah jong me, ïoh lehse ki ruh kin khot kylliang ïa me, bad kumta kan long noh ka jingsiew kylliang ïa me. 13#Luk. 14:21.Hynrei, haba me khreh ïa ka jingkhawai, khot ïa ki baduk, ïa ki bakynriang, ïa ki ba-dkoh, ïa ki bamatlah: 14kumta men long uba suk; namar kim don ei ei ruh ban siew kylliang ïa me; naba yn siew kylliang ïa me ha ka jingmihpat jong ki bahok.”

Ka pharshi shaphang ka jingkhawai kaba khraw

(Mat. 22:1-10)

15 # Jpw. 19:9. Te haba uwei na kita kiba ïashong bam lem u la ïohsngew ïa kine kiei kiei, u la ong ha U, “Suk uta u ban bam jingbam ha ka hima U Blei!” 16#Mat. 22:1-10.U te U la ong ha u, “Don uwei u briew uba la khreh ïa ka jingkhawai miet kaba khraw, bad u la khot bun briew. 17Bad u la phah ïa la u shakri ha ka por kata ka jingkhawai miet, ïa ka ban ong ha kita ïa kiba la khot, ‘To wan, naba la lah khreh ïa kiei kiei baroh.’ 18Te baroh ki la sdang na kawei ka jingmut ban ïakren dong. Uba nyngkong u la ong ïa u, ‘Nga la thied ïa ka lyngkha, nga donkam ruh ban leit jngoh ïa ka; nga kyrpad ïa me, to pyllait ïa nga.’ 19Uwei pat ruh u la ong, ‘Nga la thied san jur ki masi, ngan sa leit ruh ïa ka ban tynjuh ïa ki; nga kyrpad ïa me, to pyllait ïa nga.’ 20#Deu. 24:5; 1 Kor. 7:33.Uwei pat de u la ong, ‘Nga la shongkurim ïa ka briew, te namar kata, ngam lah ban wan.’ 21#Luk. 14:13.Te uta u shakri u la wan bad u la ïathuh ha u kynrad jong u ïa kine kiei kiei ruh. Ynda kumta, uta u trai ïing ba u da sngewbitar, u la ong ha la u shakri, ‘Khie leit kumne kumne ruh sha ki lynti bah bad ki lynti rit ka shnong, bad wallam shapoh shane ïa ki baduk, ki bakynriang, ki bamatlah, bad ïa ki ba-dkoh.’ 22Uta u shakri te u la ong, ‘Ko Kynrad, la leh kumba me la hukum: hynrei, dang don jaka.’ 23Uta u kynrad u la ong te ha uta u shakri, ‘Khie leit sha ki lynti bah bad ki lynti lyngkha, to pynbor ïa ki ban wan hapoh, ba yn pyndap ïa ka ïing jong nga. 24Naba nga ong ïa phi ba ym don uwei na kita ki briew ïa kiba la khot, u ban ïoh mad ïa ka jingkhawai miet jong nga.’ ”

Ka dor ka jinglong synran

(Mat. 10:37-38)

25Te bun ki paidbah ki la ïaleit lem bad u; bad haba u la kyrtiang dien, u la ong ha ki, 26#Mat. 10:37-38.“Lada uno uno ruh u wan ha nga, bad u bym isih ïa la u kpa bad ïa la ka kmie, bad ïa la ka tnga bad ïa la ki khun, bad ïa la ki hynmen hynbew ruh shynrang bad kynthei, ho-oid bad ïa la ka jong ka jingim ruh, um lah ban long u synran jong nga. 27#Mat. 10:38; 16:24; Mrk. 8:34; Luk. 9:23.Uno uno ruh de u bym bah ruh ïa la ka jong ka diengphna, bad ba wan bud nadien jong nga, um lah ban long u synran jong nga. 28Naba uno na phi uba mut ban tei ïa ka kut, u bym da shong khop shuwa ban kheiñ ïa kaba lut, la u don biang ne em ïa ka ban pyndep? 29ïoh, haba u la seng ïa ka nongrim bad ba um lah ban pyndep, baroh kiba ïohi kin sdang ban ïarkhiebeiñ ïa u, 30ki da ong, ‘Une u briew u la sdang ban tei, te um lah du ban pyndep.’ 31Lane uno u syiem haba u leit ban ïaleh thma bad uwei pat u syiem, u bym da shong khop shuwa ban pyrkhat bha, la u lah ne em da ki shiphew hajar, ban ïeng ïaleh bad uta uba wan ïaleh ïa u da ki arphew hajar? 32Lymda kumta, mynba uta uwei u dang jngai, u da phah noh ïa ki nongleit pan ïasuk, u pan ruh da kaba kumno ban ïasuk noh. 33#Luk. 18:29-30; Php. 3:7.Kumta ruh, uno uno uba na phi, u bymñiew duh noh ïa kiei kiei baroh kiba u don, um lah ban long u synran jong nga.”

Ka mluh ba la kylla blad noh

(Mat. 5:13; Mrk. 9:50)

34 # Mat. 5:13; Mrk. 9:49-50; Mat. 11:15. “Ka mluh ka bha: hynrei, lada ka mluh ka la kylla blad, da ei yn pynthiang ïa ka? 35Kam bit, lymne ïa ka khyndew, lymne ïa ka thliew sboh; hynrei, ki bred noh shabar ïa ka. Uba don ki shkor ban sngew, to un sngew.”

Currently Selected:

LOUKAS 14: KHB

Highlight

Copy