HEBRU 9

Ki niam ki rukom ka jingmane blei kaba ha kane ka pyrthei bad kaba kynja bneng

1 # Eks. 25:10-40. Mynta wat kata ka jutang ka banyngkong ruh ka la don ki niam ki rukom ka jingmane blei, bad ka ïing kyntang, kaba na kane ka pyrthei. 2#Eks. 25:23-40; 26:1-30; Leb. 24:5.Namar la pynlong ïa Ka Tabernakl, kata ka banyngkong, ha kaba la don kata ka dieng pynïeng sharak, bad kata ka miej, bad kita ki 'pu pyni; ïa kaba la khot “ka Jaka kyntang.” 3#Eks. 26:31-33.Bad shadien ka jingkah ka ba-ar Ka Tabernakl ïa kaba la khot “ka Jaka kyntang tam”; 4#Eks. 16:32-33; 25:10-16; 30:1-6; Jkñ. 17:8-10; Deu. 10:3-5.kaba don ka pliang ksiar bathang iwbih, bad ka synduk ka jutang ïa kaba la suit baroh sawdong da ka ksiar, ha kaba la don u khiew ksiar uba don kata ka manna, bad uta u diengduh u Aaron uba la phuh, bad kita ki maw lyngkniap jong ka jutang; 5#Eks. 25:18-22.bad halor jong ka, ki Kherub ka burom ki kah ïa ka jingtap-isynei; shaphang kita ngim lah mynta ban kren ha la ka bynta bynta.

6 # Jkñ. 18:2-6. Te haba la pynlong ïa kine kiei kiei ruh kumta, kita ki lyngdoh ki ju leit bsut ha la ka sngi sha kata Ka Tabernakl ka banyngkong, haba ki ïa-pyndep ïa ki niam ki rukom. 7#Leb. 16:1-34.Hynrei, sha kata ka ba-ar, tang u rangbah lyngdoh hi shi sien shi snem, ym khlem ka snam, ïa kaba u ainguh na ka bynta ïa lade, bad na ka bynta ka lait ka let jong u paidlang; 8U Mynsiem Bakhuid u da pyni ïa kane, ba ym pat pynpaw ïa ka lynti sha kata ka Bakyntang tam, katba kata Ka Tabernakl ka banyngkong ka dang ïeng; 9kaba long ka pharshi haduh ka aïom kaba mynta; ha kaba la ainguh ki jingainguh ruh bad ki jingkñia ki bym lah ban pynjanai ïa ka jingïatiplem jong uta uba mane, 10haba ki long tang (da ki jingbam bad ki jingdih bad ki jingsait babun jaid) ki niam ki rukom bakynja doh, ba la buh tad ynda ka Ïa ka jingpynbha.

11Hynrei, U Khrist haba u la wan long U Rangbah lyngdoh kita kiei kiei ki babha ki ban sa wan, da Ka Tabernakl kaba kham khraw bad kham janai, ka bym shym la thaw da ki kti, kata ka long, ym na ka jong kane ka pyrthei, 12lymne da ka snam ki blang bad ki khun masi, hynrei, da ka snam jong u hi, u leit rung tang shi sien sha kata ka Jaka kyntang, haba u la ïoh ïa ka jingsiewspah bymjukut. 13#Leb. 16:6,15,16; Jkñ. 19:9,17-19.Namar lada ka snam ki blang bad ki masi kyrtong, bad ka dpei ka masi lud ba la synreit ïa kita ïa kiba la pyntngit, ka pynkhuid sha ka jingpynkhuid ïa ka doh, 14da katno tam ka snam U Khrist, uba da U Mynsiem bymjukut u la ainguh ïa lade ba khlem jingduna ha U Blei, kan pynkhuid ïa ka jingïatiplem jong phi na ki jingleh baïap, ïa ka ban shakri ïa U Blei ba-im?

15Te namar kane, u long U Ksiang ka jutang bathymmai, ba haba la jia ka jingïap ïa ka ban siewspah ïa kita ki jingpalat kiba hapoh kata ka jutang ka banyngkong, kita ïa kiba la khot, kin ïoh pdiang ïa ka jingkular ïa kata ka bynta bymjukut. 16Namar ha kaba don ka testament, ka la dei hi ba u la ïap uta uba thaw ïa ka. 17Namar ka testament ka don bor haba la jia ka jingïap; namar mynno ka la don bor haba dang im uta uba la thaw ïa ka? 18Naba kumta, ym shym la pynkyntang wat ïa ka jutang ka banyngkong khlem ka snam. 19#Eks. 24:6-8.Namar ynda u Moses u la lah kren ïa ka hukum baroh ha uta u paidlang baroh katba kum ka hukum, u la shim ka snam ki khun masi bad ki blang, lem bad ka um, bad u 'ñiuh langbrot basaw hain, bad u Hyssop, bad u la synreit ïa kata Ka Kitab hi ruh bad ïa uta u paidlang baroh, 20u da ong, “Kane ka long ka snam jong kata ka jutang ïa kaba U Blei u la hukum ha phi.” 21#Leb. 8:15.Nalor kane, u la synreit halor kata Ka Tabernakl bad ki pliang niam baroh da ka snam kumjuh. 22#Leb. 17:11.Bad katba kum ka hukum, nga lah ban ong, ba la jan kiei kiei baroh la pynkhuid da ka snam, bad khlem kaba pynmih snam ym don jingmap.

Ka jingkñia ainguh ïa U Khrist ka pyndam noh ïa ka pop

23La donkam, namar kata, ban pynkhuid ïa ki dur jong kita kiei kiei kiba ha bneng da kine; hynrei, ïa kita kiei kiei kiba kynja bneng hi da ki jingkñia ba kham bha ban ïa kine. 24Namar U Khrist u la leit rung ym sha ka Jaka kyntang ba la thaw da ki kti, kaba syriem ïa kata kaba shisha; hynrei, sha kata ka bneng hi, mynta ban paw ha khmat U Blei na ka bynta jong ngi: 25hynrei, ym ba un ainguh ïa lade bunsien, kumba u rangbah lyngdoh u leit rung sha kata ka Jaka kyntang ha la ka snem ym da la ka jong ka snam; 26lymda kumta, ka la dei ïa u ban shah bunsien naduh myndanglong ka pyrthei; hynrei, mynta, tang shi sien la pynpaw ïa u ha ka bakut ki Ïa, ïa ka ban pyndam noh ïa ka pop da kaba kñia ïa lade. 27Te kumba la buh ha ki briew ban ïap tang shi sien, bad hadien kane ka wan ka jingbishar; 28kumta, U Khrist ruh, haba la kñia ainguh tang shi sien ïa u, ïa ka ban bah noh ïa ki pop jong kiba bun, un mihpaw ha ka ba-ar sien, khlem bah ka pop, ha kita kiba khmih lynti ïa u, ïa ka jingpynim.

Currently Selected:

HEBRU 9: KHB

Highlight

Copy