HEBRU 12

U Blei Uba U Kpa jong ngi

1Naba kumta, ma ngi ruh, haba la ker tawiar ïa ngi da u lyoh ki sakhi katne katne, to ngin bred noh ïa ka jingpynwit baroh, bad ïa kata ka pop kaba shait snoh ha ngi, bad to ngin ïaphet da ka jingïaishah ïa ka jingïaphet thong ïa kaba la buh ha khmat jong ngi; 2#Salm. 110:1.da kaba khmih sha U Jisu U Nongpynlong bad U Nongpynjanai ïa ka jingngeit jong ngi, uba namar kata ka jingkmen ïa kaba la buh ha khmat jong u, u la shah ïa ka diengphna, u da ibeiñ ïa ka jinglehrain, bad u la shong ha ka kti kamon ka khet U Blei.

3Namar to phin pyrkhat ïa uta uba la shah ïa kaba katne ka jingkren pyrshah ïa lade da ki bapop, ba phin ym man thait da kaba sngewtlot ngai-ly-ngai ha ki mynsiem jong phi. 4Phim pat ïaleh pyrshah ha ban da mihsnam, da kaba ïa-pyneh pyrshah bad ka pop: 5#Job. 5:17; Pro. 3:11-12.bad phi la klet noh ïa kata ka jingkyntu, kaba pyni ha phi kumba ha ki khun:

“Ko khun jong nga,

wat ñiew sting

ïa ka jingsneng sympat

na U Trai,

lymne wat sngewtlot

ngai-ly-ngai

haba da sneng ïa me da u;

6namar ïa uba U Trai u ieit,

U sneng,

bad U sympat ïa u khun baroh

ïa uba U pdiang.”

7Dei na ka bynta ka jingpynbha, ba phi ïaishah; U Blei u leh ïa phi kum ïa ki khun; namar uno uta u khun ïa uba u kpa jong u um ju sneng sympat? 8Hynrei, lada phi long khlem ka jingsneng sympat, na kaba baroh ki long ki nongïoh bynta, kumta, phi long ki khun pongka, hynrei, ym ki khun kha burom. 9Nalor kane, ngi la ju don kita ki kpa ka doh jong ngi ban sneng sympat ïa ngi, bad ngi la ju burom ïa ki: hato ngin ym kham long shibun hapoh U Kpa ki mynsiem jong ngi, bad ban im? 10Namar, ki, shisha, tang khyndiat ki sngi, ki la sneng sympat ïa ngi katba ki ibit ma ki; hynrei, ma u, khnang ïa ka ban pynmyntoi ïa ngi, ba ngin ïoh bynta na ka jingkhuid jong u. 11Te ka jingsneng sympat baroh kam imat mynta ba ka long kaba kmen, hynrei, kaba sngewsih: pynban, hadien, ka pynmih ïa u soh basuk ha kita kiba la trei ma ka, u soh ka hok keiñ.

12 # Isa. 35:3. Naba kumta, to phin rah ïa ki kti ba la pynhap kyr-iap, bad ïa ki khohsiew ïa kiba la sator; 13#Pro. 4:26.bad to pynlong ïa ki lynti ba-beit ïa ki kjat jong phi, ba yn ym pynphai noh ïa kata ka ba-dkoh na ka lynti, hynrei, kham tam ba yn pynkhiah.

Ki jingkyntu bad ki jingmaham

14To beh brai ïa ka jinglong suk bad ki briew baroh, bad ïa ka jingpynkhuid, khlem kata, uno uno ruh un ym ïohi ïa U Trai: 15#Deu. 29:18.da kaba khmih bniah ïoh don uno uno u briew u ban ym kot sha ka jingaiei U Blei; ïoh ba uno uno ruh u thied ka jingkthang uba da mih shluiñ un pynkhuslai ïa phi, bad da uta, yn ïoh pyntngit ïa kiba bun: 16#Jen. 25:29-34.ïoh ba don uno uno ruh uba klim, lane uba leh beiñ niam, kum u Iso, uba, namar kaba shi sien bam jingbam u la die noh ïa ka jinglong hynmen jong u hi. 17#Jen. 27:30-40.Namar phi tip ba hadien kata, wat haba u la kwah ruh ban ïoh ïa kata ka jingkyrkhu, la kyntait noh ïa u; namar um shym shem jaka ïa ka jingkylla-ka-bamut, la u la wad eh ïa ka, da ki jingjaw ummat.

18 # Eks. 19:12-22; 20:18-21; Deu. 4:11-12; 5:22-27. Namar phim shym wan ha u lum ïa uba lah ban tba, bad ba la ing da ka ding, bad ha ka jingïong, bad ha ka jingdum, bad ha ka 'erïong, 19bad ha ka jingsawa ka turoi, bad ha ka jingpyrta ki ktien; ïa kaba kita kiba la ïohsngew ki la ïakyrpad ba yn ym kren kawei ka ktien shuh ha ki: 20#Eks. 19:12-13.namar kim lah shah keiñ ïa kata ba la hukum, “Wat lada u mrad un ktah ïa uta u lum, yn lynthem ïa u.” 21#Deu. 9:19.Te kata ka jingipaw ka la long kaba itieng katta katta, katba u Moses u la ong, “Nga sheptieng shikatdei eh bad nga khynñiuh:” 22hynrei, phi la wan ha u lum Seïon, bad ha ka nongbah U Blei ba-im, ha ka Jerusalem bakynja bneng, bad ha ki bun paidbah ki angel ki bym lah ñiew shuh, 23ha ka jingïaseng bah bad ka balang jong kiba la kha nyngkong, ïa kiba la thoh kyrteng ha bneng; bad ha U Blei U Nongbishar ki bynriew baroh, bad ha ki mynsiem ki bahok ba la pynjanai, 24#Jen. 4:10.bad ha U Jisu U Ksiang ka jutang bathymmai, bad ha ka snam ka jingsynreit, kaba kren ïa kiei kiei kiba kham bha ban ïa ka jong u Abel.

25 # Eks. 20:19. To sumar ba phin ym kyntait noh ïa uta uba kren. Namar lada kita kim shym lait, haba ki la kyntait ïa uta uba la maham ïa ki ha ka khyndew, sa katno tam te ma ngi kiba phai noh na uta uba maham na bneng: 26#Hag. 2:6.uba kata ka ktien jong u mynkata ka la pynkhih ïa ka khyndew; hynrei, mynta, u la kular, u da ong: “Sa shi wat shuh ngan pynkhynñiuh ym tang ïa ka khyndew, hynrei, ïa ka bneng ruh.” 27Te kane ka ktien, “Sa shi wat shuh”, ka pyni ïa kata ka jingpynkynriah ïa kita kiei kiei ruh ïa kiba la pynkhih, kum ïa kiei kiei ruh ba la shu thaw, khnang ba kita kiei kiei ruh ïa ki bym shym pynkhih, kin ïoh sah. 28Naba kumta, haba ngi pdiang ïa ka hima ka bym lah pynkhih, to ngin ïoh ka jingsngewnguh, da kaba ngin ai ka jingshakri kaba pynsngewbha ïa U Blei da ka burom bad ka jingtieng burom; 29#Deu. 4:24.namar U Blei jong ngi u long ka ding kaba bam duh noh.

Currently Selected:

HEBRU 12: KHB

Highlight

Copy